ডিফু, 11 জানুৱাৰী : কাৰ্বি আংলং জিলাত নতুনকৈ গঠন হ'ল অল হিলছ ট্ৰাইবচ চেম্বাৰ অৱ কমাৰ্চ এণ্ড ইণ্ডাষ্ট্ৰীজ নামৰ এটা সংগঠন (All hills tribes chember of commerce and industries formed) ৷ সোমবাৰে সন্ধিয়া ডিফুৰ সমীপৰ বিৰলাস্থিত পেৰেডাইজ ৰেষ্টুৰেণ্টত এক সংবাদমেল আয়োজন কৰি এই কথা সদৰি কৰে সংগঠনটোৰ নেতৃবৰ্গই ৷ নৱগঠিত সংগঠনটোৰ সম্পাদক জন টেনডন বে' ই সংবাদ মাধ্যমৰ আগত উল্লেখ কৰা অনুসৰি, অল হিলছ ট্ৰাইবচ চেম্বাৰ অৱ কমাৰ্চ ব্যৱসায় বাণিজ্যৰ লগত বিষয়সমূহ নিৰিক্ষণ কৰাৰ দায়িত্ব ল’ব ৷
জিলাখনত গা কৰি উঠা নথি পত্ৰ বিহীন অবৈধ ব্যৱসায়, বাণিজ্যিক অনুজ্ঞাপত্ৰবিহীন ব্যৱসায়িক প্ৰতিষ্ঠানসমূহৰ ওপৰতো তদন্ত চলাব বুলি মন্তব্য কৰে নৱ গঠিত সংগঠনটোৱে ৷ লগতে জিলাখনৰ নিবনুৱা যুৱক-যুৱতী সকলৰ বাবে স্কীল ট্ৰেইনিং, ক্ষুদ্ৰ উদ্যোগ আদিৰ বাবে প্ৰশিক্ষিত কৰাৰ বাবে ব্যৱস্থা গ্ৰহণ কৰিব সংগঠনটোৱে ৷ ইয়াৰোপৰি অবৈধ খননৰ পৰা আৰম্ভ কৰি স্বায়ত্বশাসিত পৰিষদৰ ৰাজহ বৃদ্ধি কৰাৰ দিশটোতো গুৰুত্ব আৰোপ কৰিব বুলি সংবাদমেল যোগে সংগঠনটোৰ নেতৃ বৰ্গই সদৰি কৰে ৷
উল্লেখ্য যে, নৱ গঠিত সংগঠনটোৰ অধ্যক্ষৰ দায়িত্বত আছে বিৰ্তন টেৰণ, সম্পাদকৰ দায়িত্বত আছে জন টেনডন বে’, বিত্ত সম্পাদক ৰাংচিনা বে’, কাৰ্যালয় সম্পাদক লংচিং টেৰণকে ধৰি আন কেইবাগৰাকীও সদস্য ৷ নৱগঠিত সংগঠনটোৰ নেতৃবৰ্গই ব্যৱসায়ী সকলক সংগঠনটোৰ সৈতে সহযোগিতা কৰিবলৈ এই সংবাদমেল যোগে আহ্বান জনায় ৷ আনহাতে, অল হিলছ ট্ৰাইবচ চেম্বাৰ অৱ কমাৰ্চ এণ্ড ইণ্ডাষ্ট্ৰীজ নামৰ সংগঠনটো ইণ্ডিয়ান চেম্বাৰ অৱ কমাৰ্চৰ সৈতে এফিলিয়েটেড হৈ আছে বুলি জানিব দিয়ে ৷
লগতে পঢ়ক : কাৰ্বি শান্তি চুক্তিত স্বাক্ষৰৰ পিছত প্ৰাক্তন KPLT(R) ৰ সদস্যই গঠন কৰিলে নতুন সংগঠন
