ডিফু, ২৫ আগষ্ট : পশ্চিম কাৰ্বি আংলং জিলাৰ অসম-মেঘালয় সীমান্তৰ উমলাফেৰ অঞ্চলত বুধবাৰে পুনৰ সৃষ্টি হৈছে উত্তেজনাময় পৰিস্থিতিৰ । শতাধিক খাচী লোকে উমলাফেৰ অঞ্চলত প্ৰৱেশ কৰাৰ অপচেষ্টা চলোৱাৰ ঘটনাক কেন্দ্ৰ কৰি বিৰাজ কৰিছে উত্তেজনাই ।
জানিবপৰা মতে, আকস্মিকভাৱে খাচী লোকৰ বৃহৎ এটা দলে অসমৰ ভূমিত প্ৰৱেশ কৰাৰ চেষ্টা চলোৱাৰ সময়ত সীমান্তত থকা অসমৰ লোকে দলটোৰ প্ৰৱেশত বাধা আৰোপ কৰাক লৈ উত্তেজনা সৃষ্টি হয় । ইপিনে সীমান্তত উপস্থিত হোৱা খাচী লোক সকল শান্তি আলোচনাৰ উদ্দেশ্যৰে অহা বুলি তেওঁলোকে প্ৰকাশ কৰিছে যদিও সেয়া ৰহস্যময় হৈ আছে ।
আনহাতে, সীমান্তৰ অসমৰ ভূমিত খাচী লোকৰ প্ৰৱেশক লৈ সীমান্তবাসী নিৰাপত্তা হীনতাত ভুগি থকা বুলিও জানিব পৰা গৈছে । ইতিমধ্যে ঘটনাস্থলীত উপস্থিত হোৱা পশ্চিম কাৰ্বি আংলং আৰক্ষীৰ বৃহৎ এটা দলে খাচী লোকৰ দলটোক উভতাই পঠাইছে ।
লগতে পঢ়কঃ মৃত্যুৰে যুঁজি অৱশেষত হাৰ মানিলে নন্দিতাই
লক্ষণীয় যে, উমলাফেৰত অসম আৰক্ষীৰ দলটোৰ লগত মেঘালয় আৰক্ষীৰ মাজতো কথাৰ কটাকটি হোৱা দেখা যায় । অৱশ্যে অসম আৰক্ষীৰ তৎপৰতাত খাচী লোক সকল উভতি যোৱাত সীমান্তবাসী অসমীয়াই অসম আৰক্ষী জিন্দাবাদ, মেঘালয় আৰক্ষী মুর্দাবাদ ধ্বনি দিয়া পৰিলক্ষিত হয় ।
উল্লেখযোগ্য যে, সোমবাৰে দুগৰাকী খাচী লোকক উমলাফেৰ পহৰা চকীৰ আৰক্ষীয়ে তালাচী চলোৱাৰ ঘটনাৰ পিছৰ পৰা সীমান্তত আৰম্ভ হৈছিল উত্তেজনাময় পৰিস্থিতিৰ । আনহাতে সীমান্তত অব্যাহত থকা উত্তেজনাক লৈ কাৰ্বি ছাত্ৰ সন্থাৰ সভাপতি চেমচন তেৰনে প্ৰকাশ কৰিছে প্ৰতিক্ৰিয়া ।
মনকৰিবলগীয়া যে, কেৱল অসম-মেঘালয় সীমান্তই নহয় কিছু দিন পূৰ্বে অসম-মিজোৰাম সীমান্ততো এক হিংসাত্মক ঘটনা সংঘটিত হয় ৷ তাৰপাচতো সীমান্ত সমস্যা সামধান কৰাৰ ক্ষেত্ৰত অসম চৰকাৰে বিষয়টোৰ গম্ভীৰতা উপল্লব্ধি নকৰাৰ অভিযোগ উত্থাপন হৈছে ৷
