বকো, ১০ ফেব্ৰুৱাৰী: প্ৰাকৃতিক সৌন্দৰ্যৰে সুশোভিত অসম-মেঘালয় সীমান্তৱৰ্তী অসমৰ পাহাৰীয়া ভূ-খণ্ড লাম্পীত মঙলবাৰৰ পৰা পুনৰ অশান্ত পৰিৱেশে বিৰাজ কৰিছে । বিভিন্ন চল-চাতুৰিৰে অসমৰ লাম্পীৰ ভূমি আগ্ৰাসনৰ চেষ্টা কৰি থকা চুবুৰীয়া ৰাজ্য মেঘালয়ে এইবাৰ অসমৰ সীমান্ত পহৰা চকী(বি অ' পি)ৰ জোৱানক বলাৎকাৰীৰ অপযশ দি অপমানিত কৰিলে ।
এইয়া মেঘালয়ৰ ভূমি আগ্ৰাসনৰ আন এক কৌশল বুলি সন্দেহ উপজিছে । দীৰ্ঘদিন ধৰি অসমৰ লাম্পীত থকা ৪ৰ্থ বেটেলিয়ন সীমান্ত পহৰা চকী উঠাই দিয়াৰ বাবে বিভিন্ন কৌশল অৱলম্বন কৰি আহিছে মেঘালয়ে ।
উক্ত সীমান্ত পহৰা চকীৰ ভাৰপ্ৰাপ্ত বিষয়া ভূপাল সিং অধিকাৰীয়ে সাংবাদিকৰ আগত প্ৰকাশ কৰে যে, সীমান্ত পহৰা চকীৰ তিনিজন জোৱানক নতুন কৌশলেৰে এইবাৰ টাৰ্গেট কৰি লোৱা হৈছে । মঙলবাৰে জোৱান কেইজন পহৰা চকীৰ বাহিৰত থকা দোকানলৈ বুলি ওলাই যোৱাৰ সময়তে তিনিগৰাকী খাচী জনগোষ্ঠীৰ মহিলাক ধৰ্ষণ কৰাৰ অভিযোগ উত্থাপন কৰে ।
অসমৰ লাম্পীত থকা মেঘালয়ৰ আৰক্ষী চকীৰ ভাৰপ্ৰাপ্ত আৰক্ষী বিষয়াসহ একাংশ লোকে আপাৰ লাম্পীৰ অসমৰ সীমান্ত পহৰা চকী ঘেৰাও কৰি জোৱান তিনিজনক গ্ৰেপ্তাৰ কৰাৰ বাবে দাবী উত্থাপন কৰে । আনহাতে, এই তিনিওজন জোৱান নিৰপৰাধী বুলি মন্তব্য কৰে ভূপাল সিং অধিকাৰীয়ে ।
উল্লেখ্য যে, বিগত কিছু দিন ধৰি উক্ত আৰক্ষী চকীৰ সমীপত খেতি কৰাৰ বাবে জংঘল চাফা কৰি ঠাই মুকলি কৰি থকা কাৰ্যত মেঘালয়ৰ একাংশ লোকক বাধা প্ৰদান কৰি আহিছিল অসমৰ জোৱানসকলে । ইয়াৰ পিছতে ক্ষুব্ধ হৈ পৰে সেই লোকসকল আনকি, আৰক্ষীৰ জোৱানসকলৰ বিৰুদ্ধে ধৰ্ষণৰ অভিযোগ তুলিব বুলিও খাচী জনগোষ্ঠীৰ লোকসকলে ভাবুকি দিয়ে ।
ইয়াৰ পিছতে মঙলবাৰে অসমৰ তিনিজন জোৱানৰ বিৰুদ্ধে ধৰ্ষণৰ মিছা অভিযোগ উত্থাপন কৰে সেই লোকসকলে । বুধবাৰে জোৱান তিনিজনক বেটেলিয়ন 'হেডকোৱাটাৰ ক্লজ' কৰে । বুধবাৰেও লাম্পীত উত্তেজনা অব্যাহত আছে ।
উল্লেখ্য যে, বিগত দিন বোৰত বিভিন্ন চক্ৰান্তৰে মেঘালয়ে লাম্পীত আগ্ৰাসন অব্যাহত ৰাখিছে । অসমৰ সীমান্ত আৰক্ষী চকী নিৰ্মাণৰ বাবে লাম্পীৰ উমালিত মাটি জৰীপ কৰিবলৈ যোৱা অসমৰ আৰক্ষীৰ সঁজাতি দলক মেঘালয় আৰক্ষীয়ে উভতাই পঠাইছিল ।অসমৰ ভূমিতে অসম আৰক্ষী নিৰুপায় হৈ উভতি আহিবলৈ বাধ্য হৈছিল ।
ইয়াৰ বিপৰীতে উমালিত মেঘালয়ে সীমান্ত আৰক্ষী চকী নিৰ্মাণ কৰি থকা দেখা গৈছে । মুঠতে, মেঘালয়ে চাৰ্ভে অৱ ইণ্ডিয়াৰ মানচিত্ৰ নামানে । একমাত্ৰ অসম চৰকাৰৰ চূড়ান্ত হেমাহিৰ বাবে অসম-মেঘালয় সীমান্তৱৰ্তী অসমৰ অঞ্চলসমূহত চুবুৰীয়া ৰাজ্যসমূহে আগ্ৰাসন চলাই আহিছে ।
লাম্পীৰ স্থানীয় যুৱক বিকাশ চেত্ৰীয়ে কয় যে, এয়া হৈছে মেঘালয়ৰ আগ্ৰাসনৰ আন এক কৌশল । লাম্পীখন মেঘালয়ৰ বুলি দাবী তুলি অসমৰ সীমান্ত আৰক্ষী চকী উঠাই দিয়াৰ বাবে এয়া মাথোঁ মেঘালয়ৰ ষড়যন্ত্ৰ ।
অসমৰ লাম্পীত বিভিন্ন চৰকাৰী আঁচনি ৰূপায়ণ কৰি অসমৰ সীমান্তৱৰ্তী অঞ্চলসমূহৰ ভোটাৰসকলক মেঘালয়ত ভোট প্ৰদান কৰাৰ বাবে বাধ্য কৰোৱা হৈছে । সীমান্তৰ পৰা অসমৰ প্ৰায় ১০ কিলোমিটাৰ ভিতৰলৈ আগ্ৰাসন চলাই লাম্পীত বাট-পথ, বিদ্যালয়, বিদ্যুৎ যোগান, খোৱাপানীৰ ব্যৱস্থা কৰি কৰিছে মেঘালয় চৰকাৰে ।
উল্লেখ্য যে, প্ৰাকৃতিক সৌন্দৰ্য্যৰে ভৰপূৰ দ্বিতীয় শ্বিলংখ্যাত অসমৰ লাম্পীখন মেঘালয়ৰ পশ্চিম খাচী পাহাৰ জিলাৰ অন্তৰ্ভুক্ত বুলি দাবী কৰি আহিছে মেঘালয়ে আৰু লাম্পীত বিভিন্ন ধৰণে অশান্তিৰ সৃষ্টি কৰি আহিছে । মেঘালয়ৰ প্ৰৰোচনাত লাম্পীত সংঘৰ্ষৰ সৃষ্টি হৈ ইতিমধ্যে বহুজনে প্ৰাণ হেৰুওৱাৰ লগতে বহুলোক আহত হ'বলগীয়া হৈছে ।
লগতে পঢ়ক:অমিত শ্বাহৰ চিৰাং ভ্ৰমণে প্ৰভাৱ পেলাৱ অসম, পশ্চিম বংগৰ নিৰ্বাচনত!
