ৰঙিয়া, 14 জুলাই : ৰাজ্যৰ প্ৰথমটো বানত যথেষ্ট ক্ষতিগ্ৰস্ত হৈছে ৰাজ্যৰ বিভিন্ন প্ৰান্তৰ কৃষকসকল । বিশেষকৈ ৰঙিয়াৰ হাচানটুকত বিভিন্ন শাক-পাচলিৰ খেতি কৰা খেতিয়কসকলে এতিয়া মূৰে-কপালে হাত দিবলগীয়া পৰিস্থিতিৰ উদ্ভৱ হৈছে । কাৰণ কৃষকৰ সপোনৰ পথাৰখনত এতিয়া বালিৰ দম বান্ধিছে । বানে পথাৰ মহতিয়াই নিয়াই নহয়, এফালৰ পৰা শেষ কৰি গ'ল চহা খেতিয়কৰ ফচল । অঞ্চলটোৰ কেইবা শতাধিক কৃষকে ৰ'দ - বৰষুণক আওকাণ কৰি কপালৰ ঘাম মাটিত পেলাই আৰম্ভ কৰিছিল পাচলিৰ খেতি । কিন্তু ৰুদ্ৰ ৰূপ ধাৰণ কৰি অহা বানত লহপহকৈ বাঢ়ি অহা পথাৰৰ শস্য অকালতে মৰহি গ'ল ।
কিছুদিন পূৰ্বে শস্যৰে নদন বদন হৈ থকা খেতি পথাৰখনত এতিয়া চৌদিশে মৰুভূমি সদৃশ পৰিৱেশ । বৃহত্তৰ অঞ্চলটোত খেতিয়কৰ সপোন এনেদৰেই শেষ হৈ গৈছে বলিয়া বানত । কিছুদিন পূৰ্বে হোৱা প্ৰলয়ংকাৰী বানত বৰলীয়া বানে বুৰাই পেলাইছিল হাচানটুক অঞ্চল । যাৰ ফলত নষ্ট হ'ল প্ৰায় এহেজাৰ বিঘা ৰবি শস্যৰ ।
লাউ, জিকা, ভোল, কেৰেলা, তিয়হ, ভেন্দি আদি পাচলিৰ বিশাল খেতি পথাৰখনত এতিয়া ঠায়ে ঠায়ে বালিৰ দুইৰ পৰা সাত ফুট ওখ ডাঠ তৰপ পৰিছে । কিছু কিছু ঠাইত আকৌ পানীয়ে ডোঙা বান্ধি আছে কেইবা শতাধিক কৃষকৰ সপোনৰ খেতি পথাৰখনত । ঋণ লৈ খেতি কৰা কৃষকসকলৰ মাজত এতিয়া হাহাকাৰ পৰিস্থিতিৰ সৃষ্টি হৈছে । ঋণ পৰিশোধ কৰাৰ পৰা পৰিয়াল চলোৱালৈকে নানানটা চিন্তাই কৃষকসকলক জুমুৰি দি ধৰিছে ।
প্ৰায় এহেজাৰ বিঘা খেতি বানত নষ্ট হোৱাৰ পিছতো খেতিয়কৰ কল্যাণৰ বাবে দেদাউৰি দিয়া বিয়াগোম কৃষি বিভাগৰ কোনো লোকে অদ্যাপি খবৰ নোলোৱাৰ অভিযোগ উত্থাপিত হৈছে । ৰঙিয়া প্ৰশাসনেও খেতিয়কসকলৰ কোনো ধৰণৰ খবৰ নোলোৱাত উপায়ন্তৰ হৈ পৰিছে ৰঙিয়াৰ হাচানটুক অঞ্চলৰ খেতিয়কসকল ।
লগতে পঢ়ক : Erosion in Bongaigaon : মানাহ নদীৰ খহনীয়াত জাহ গৈছে হাজাৰ হাজাৰ কৃষিভূমি
