গুৱাহাটী, ১৩ নৱেম্বৰ : তিনি বছৰৰ তলৰ সন্তান থকা মহিলা কর্মচাৰী আৰু গর্ভৱতী কর্মচাৰীসকল এতিয়াৰে পৰা পুনৰ কার্যালয়লৈ যাব লাগিব ৷ ক’ভিড মহামাৰীৰ বাবে এই কর্মচাৰীসকলক ৰেহাই দিয়াৰ নিৰ্দেশনা প্ৰত্যাহাৰ কৰিছে ৰাজ্য চৰকাৰে ৷ চৰকাৰী কার্যালয়, ৰাজহুৱা খণ্ডৰ প্ৰতিষ্ঠান, বিত্তীয় প্ৰতিষ্ঠান আৰু ব্যক্তিগত কার্যালয়সমূহৰ ক্ষেত্ৰত এই নতুন নিৰ্দেশনা প্ৰযোজ্য হ’ব ৷ প্ৰাপ্ত ছুটীত থকা মহিলা কর্মচাৰীসকলৰ বাহিৰে আন সকলো চৰকাৰী কর্মচাৰীকে কার্যালয়ত উপস্থিত থাকিবলৈ নিৰ্দেশ দিয়া হৈছে ৷
লগতে চাওক: APDCL recruitment : অৱশেষত বাতিল হ'ল নিযুক্তি প্ৰক্ৰিয়া
ৰাজ্যৰ মুখ্য সচিবে জাৰি কৰা নিৰ্দেশনাত উল্লেখ কৰা হৈছে যে, ৰাজ্যৰ সামগ্ৰিক ক’ভিড পৰিস্থিতি পর্যালোচনা কৰা হৈছে আৰু ক’ভিড পৰিস্থিতিৰ উন্নতি ঘটিছে ৷ তদুপৰি ৰাজ্যত ভেকচিন লোৱাৰ বাবে যোগ্য ব্যক্তিসকলৰ ৯৫ শতাংশই লাভ কৰিছে প্ৰথম পালি ভেকচিন ৷ ভেকচিনৰ দুয়োটা ড’জ গ্ৰহণ কৰা লোকৰ সংখ্যাও ৩১ শতাংশলৈ বৃদ্ধি পাইছে ৷ যাৰ পৰিপ্ৰেক্ষিতত ৰাজ্য চৰকাৰে এই সিদ্ধান্ত গ্ৰহণ কৰিছে ৷
উল্লেখ্য যে, ক’ভিডৰ সংক্ৰমণৰ বাবে ঘোষণা কৰা দেশজোৰা লক ডাউনৰ অন্তত বিভিন্ন সেৱাৰ শিথিলতা প্ৰদান কৰা হৈছিল ৷ ক’ভিড পৰিস্থিতিৰ প্ৰতি লক্ষ্য ৰাখি বিভিন্ন সময়ত চৰকাৰী কর্মচাৰীসকলৰ ক্ষেত্ৰতো বিভিন্ন নিৰ্দেশনা প্ৰদান কৰা হৈছিল ৷ কিন্তু গর্ভৱতী কর্মচাৰী আৰু তিনি বছৰৰ তলৰ বয়সৰ সন্তান থকা মহিলা কর্মচাৰীসকলক কার্যালয়ত উপস্থিত থকাৰ পৰা ৰেহাই দিয়া হৈছিল ৷ তেওঁলোকক ঘৰৰ পৰাই কাম কৰিবলৈ অনুমতি প্ৰদান কৰিছিল চৰকাৰে ৷
কিন্তু অৱশেষত সেই শিথিলতা আঁতৰ কৰা হ'ল ৷ এতিয়াৰে পৰা গর্ভৱতী কর্মচাৰী আৰু তিনি বছৰৰ তলৰ বয়সৰ সন্তান থকা মহিলা কর্মচাৰীসকলো কাৰ্যালয়ত উপস্থিত থাকিব লাগিব ৷
লগতে চাওক: TET Teachar appoinment : কি পৰ্যায়ত বিটিআৰৰ শিক্ষক নিযুক্তি প্ৰক্ৰিয়া ?
