লখিমপুৰ, ১১ এপ্ৰিল: দলৰ কেতবোৰ সিদ্ধান্তৰ বিৰোধিতা কৰি পদত্যাগ কৰিলে লখিমপুৰ জিলা কংগ্ৰেছৰ সভাপতি প্ৰদীপ গগৈয়ে ৷ সোমবাৰে পুৱাতে দলৰ শীর্ষ নেতৃত্বলৈ পদত্যাগ পত্ৰ প্ৰেৰণ কৰে কংগ্ৰেছৰ জ্যেষ্ঠ কৰ্মীগৰাকীয়ে (Lakhimpur district Congress president resigned)।
দলীয় নেতৃত্বৰ ভূমিকাত অসন্তুষ্ট হৈ পদত্যাগ কৰা বুলি জনায় সদ্য পদত্যাগী কংগ্ৰেছৰ সভাপতিগৰাকীয়ে । পদত্যাগ কৰিয়েই প্ৰদেশ কংগ্ৰেছৰ সভাপতি ভূপেন বৰাক চোকা সমালোচনা কৰে প্ৰদীপ গগৈয়ে (APCC president Bhupen Bora)৷ ভূপেন বৰাই গৃহ জিলাখনতে দলটোৰ প্ৰতি নিস্পৃহ মনোভাৱ লৈ প্ৰকাৰন্তৰে দলক ক্ষতি কৰাৰ অভিযোগ উত্থাপন কৰে প্ৰদীপ গগৈয়ে । আনকি বিগত পৌৰসভা নিৰ্বাচনতো লখিমপুৰ পৌৰসভাৰ কংগ্ৰেছৰ প্ৰাৰ্থীসকলক কোনো প্ৰকাৰে সহায়-সহযোগিতা আগনবঢ়োৱা বুলি ভূপেন বৰাৰ বিৰুদ্ধে অভিযোগ উত্থাপন কৰিলে সদ্য পদত্যাগী সভাপতিগৰাকীয়ে ৷
সভাপতি ভূপেন বৰাৰ প্ৰতি এক প্ৰকাৰে বিদ্ৰোহ ঘোষণা কৰে পদত্যাগী সভাপতিজনে । সভাপতি পদ ত্যাগ কৰিলেও দলৰ এজন সাধাৰণ কৰ্মী হিচাপে কাম কৰি যাব বুলিও মন্তব্য কৰে গগৈয়ে । কংগ্ৰেছ দল এৰি অন্য দলত যোগদান কৰাৰ সম্ভাৱনা নুই কৰে প্ৰদীপ গগৈয়ে ।
আনহাতে, প্ৰদীপ গগৈৰ পদত্যাগৰ লগেলগে প্ৰদেশ কংগ্ৰেছৰ সভাপতি ভূপেন বৰাই তাৎক্ষণিকভাৱে গগন চন্দ্ৰ বৰাক লখিমপুৰ জিলা কংগ্ৰেছৰ ভাৰপ্ৰাপ্ত সভাপতি হিচাপে নিযুক্তি দিয়ে আৰু গগন চন্দ্ৰ বৰাই কাৰ্যভাৰ গ্ৰহণ কৰে ৷
লগতে পঢ়ক: আজি ভাৰ্চুৱেল বৈঠকত মিলিত হ’ব মোডী-বাইডেন
