গুৱাহাটী, 4 জানুৱাৰীঃ আগন্তুক 10 জানুৱাৰীৰ পৰা 13 দিনীয়া কাৰ্যসূচীৰে গুৱাহাটীত অনুষ্ঠিত হ'ব খেলো ইণ্ডিয়া যুৱ ক্ৰীড়া সমাৰোহ ৷ ইতিমধ্যে এই সমাৰোহকলৈ প্ৰস্তুতি প্ৰায় সম্পূৰ্ণ হৈছে ৷ উল্লেখ্য যে, এই খেলো ইণ্ডিয়া সমাৰোহত 20 টাকৈ বিভিন্ন প্ৰতিযোগিতা অনুষ্ঠিত হ'ব য'ত প্ৰায় 6,500 গৰাকী খেলুৱৈয়ে অংশগ্ৰহণ কৰিব ৷
মুখ্যমন্ত্ৰী সৰ্বানন্দ সোণোৱালে মন্তব্য কৰা অনুসৰি গুৱাহাটীক খেলৰ ৰাজধানী হিচাপে প্ৰতিষ্ঠা কৰাৰ বাবেই তেওঁ এনেধৰণৰ পদক্ষেপ গ্ৰহণ কৰি আহিছে ৷ দেশৰ এই সৰ্ববৃহৎ ক্ৰীড়া সমাৰোহখনি যাতে সাফল্যমণ্ডিত হয়, তাৰ বাবে মুখ্যমন্ত্ৰী সোণোৱালে নিজেই সকলো দিশৰ পৰা এই সমাৰোহৰ তদাৰক কৰিছে । এই সমাৰোহে উঠি অহা খেলুৱৈসকলক এখন উপযুক্ত মঞ্চ প্ৰদান কৰিব বুলি আশাবাদী মুখ্যমন্ত্ৰী সৰ্বানন্দ সোণোৱাল ৷ লগতে সমাৰোহখন সফলতাৰে পাৰ কৰিবলৈ ৰাইজৰ সহায় সহযোগিতা কামনা কৰে মুখ্যমন্ত্ৰীগৰাকীয়ে ৷
উল্লেখ্য যে, খেলো ইণ্ডিয়া যুৱ ক্ৰীড়া সমাৰোহত অসমৰ 630 গৰাকী খেলুৱৈয়ে অংশগ্ৰহণ কৰিব ৷ অসমৰ এই দলটোৱে গুৱাহাটীৰ ইন্দিৰা গান্ধী এথলেটিকছ ষ্টেডিয়ামত অনুশীলন চলাই আছে ৷ ইপিনে অসমৰ খেলুৱৈসকলক উৎসাহিত কৰাৰ উদ্দেশ্যে মুখ্যমন্ত্ৰী সৰ্বানন্দ সোণোৱালে ইতিমধ্যে মেডেল লাভ কৰিব পৰা খেলুৱৈসকলৰ বাবে বিভিন্ন পুৰস্কাৰৰ প্ৰদানৰ কথা ঘোষণা কৰিছে ৷
লগতে পঢ়ক - তৰুণ গগৈ বিজেপিত আহিব বুলি মই শুনি আছোঃহিমন্ত বিশ্ব শৰ্মা
