গুৱাহাটী, 7 জানুৱাৰী: সাৱধান ৷ ৰাজ্যত বৰ্তমানেও সক্ৰিয় হৈ আছে নাৰী দেহ ব্যৱসায়ীৰ বৃহৎ চক্ৰ । এই চক্ৰটোৱে প্ৰথমে টাৰ্গেট কৰি লয় এচাম যুৱতী অথবা মহিলাক ৷ বিশেষকৈ দৰিদ্ৰ পৰিয়ালৰ যুৱতী, মহিলাক কৰ্মসংস্থাপন দিয়াৰ প্ৰলোভন দি বহিঃৰাজ্যত বৃহৎ পৰিমাণৰ ধনৰ বিনিময়ত বিক্ৰী কৰা ঘটনা প্ৰায়ে সংঘটিত হৈ আহিছে । প্ৰথমে সামাজিক মাধ্যম বিশেষকৈ Facebook ৰ জৰিয়তে চা–চিনাকি হয় ৷ তাৰ পিছত প্ৰেমৰ প্ৰস্তাৱ দিয়ে । আৰু তাৰ পিছতে সুযোগ বুজি বিয়াৰ প্ৰস্তাৱ দি লৈ যায় বহিঃৰাজ্যলৈ । তাৰ পৰাই চক্ৰটোৱে যুৱতী অথবা মহিলাক গতাই দিয়ে নাৰীদেহ ব্যৱসায়ীৰ হাতত ।
শেহতীয়াকৈ তেনে এক নাৰী দেহ ব্যৱসায়ী চক্ৰ জালত পৰে মহানগৰ আৰক্ষীৰ (Women traffickers Arrested at Basistha)। এটা ব্যক্তিগত সংস্থা(NGO)ৰ সহযোগত CID আৰু পল্টন বজাৰ আৰক্ষীয়ে শুকুৰবাৰে এক অভিযান চলায় । অভিযান চলাই আটক কৰে আনোৱাৰ হুছেইন আৰু ৰাজেশ ভাই পেটেল নামৰ দুই সৰবৰাহকাৰীক (Women traffickers Arrested in Guwahati)। ধৃত আনোৱাৰ হুছেইনৰ ঘৰ হোজাইত আৰু ৰাজেশ ভাই পেটেলৰ ঘৰ মুম্বাইত ।
অভিযানকাৰী দলটোক সহযোগ কৰা এগৰাকী ভুক্তভোগী যুৱতীয়ে উল্লেখ কৰা অনুসৰি, ২০২০ চনতে আনোৱাৰ হুছেইন নামৰ ধৃত যুৱকৰ সৈতে Facebook ৰ জৰিয়তে চিনাকী হৈছিল । তাৰ পিছত যুৱকজনে বিয়াৰ প্ৰস্তাৱ দি লৈ গৈছিল মুম্বাইলৈ ৷ মুম্বাইলৈ নি যুৱতীগৰাকীক গতাই দিছিল নাৰীদেহ ব্যৱসায়ীৰ হাতত ।
পিছত মহাৰাষ্ট্ৰ আৰক্ষীয়ে যুৱতীগৰাকীক ৰেড লাইট এৰিয়াৰ পৰা উদ্ধাৰ কৰি অসমৰ এটা বেচৰকাৰী সংস্থাৰ হাতত গতাই দিছিল । ভুক্তভোগী যুৱতীগৰাকীৰ ভাষ্যৰ ভিত্তিত বেচৰকাৰী সংস্থাটোৱে মহানগৰীৰ পল্টন বজাৰ থানা আৰু CID ত এখন এজাহাৰ দাখিল কৰিছিল । এই এজাহাৰৰ ভিত্তিতে CID আৰু মহানগৰ আৰক্ষীয়ে সৰবৰাহকাৰীক জালত পেলাবলৈ আৰম্ভ কৰিছিল অভিযান (Guwahati police operation against Women trafficking) ৷
এই সমগ্ৰ অভিযানত মুখ্য ভূমিকা পালন কৰিছিল ভুক্তভোগী যুৱতীগৰাকীয়ে ৷ আৰক্ষীয়ে যুৱতীগৰাকীক পুনৰ সৰবৰাহকাৰীৰ সৈতে ফোনযোগে পুনৰ যোগাযোগ কৰিবলৈ নিৰ্দেশ দিছিল ৷ কিন্তু এয়া আছিল সৰবৰাহকাৰীক জালত পেলোৱাৰ এক পৰিকল্পনাহে মাথো ৷
আৰক্ষীয়ে কোৱা ধৰণেই ফোনযোগে পুনৰ যুৱতীগৰাকীয়ে যোগাযোগ কৰিছিল সৰবৰাহকাৰীক ৷ যুৱতীগৰাকীয়ে মুম্বাইলৈ যাব বুলি আশ্বাস প্ৰদান কৰিছিল সৰবৰাহকাৰীক ৷ আৰক্ষীক সহযোগৰ বাবে কিছুদিনৰ পৰা যুৱতীগৰাকীয়ে ধৃত আনোৱাৰ হুছেইনৰ লগত ভাল সম্পৰ্ক বজাই ৰাখিছিল । টকাৰ অভাৱ হোৱা বুলি কৈ পুনৰ মুম্বাইলৈ লৈ যাবলৈ অনুৰোধ জনাইছিল যুৱতীগৰাকীয়ে ৷
সেই অনুসৰি শুকুবাৰে যুৱতীগৰাকীক নিবলৈ অসমলৈ আহিছিল আনোৱাৰ হুছেইনৰ লগতে আন এজন সৰবৰাহকাৰী ৷ তাৰ পিছতেই CID আৰু মহানগৰ আৰক্ষীয়ে জালুকবাৰীৰ পৰা অনুসৰণ কৰি বশিষ্ঠ চাৰিআলিত আটক কৰে দুই সৰবৰাহকাৰীক । পৰৱৰ্তী সময়ত মহানগৰ আৰক্ষীয়ে এই দুই সৰবৰাহকাৰীক গ্ৰেপ্তাৰ কৰি অধিক তথ্যৰ বাবে জেৰা অব্যাহত ৰাখিছে ।
লগতে পঢ়ক: দলগাঁও আৰক্ষীৰ জালত নাৰী সৰবৰাহকাৰী