গুৱাহাটী, 23 নৱেম্বৰঃ যোৰাবাটত নিশা কৰ্তব্যৰত আৰক্ষীক প্ৰহাৰ পাঁচ যুৱকৰ ৷ ন-মাইল প্ৰথম গেটৰ সমীপত তুৰাৰ পৰা অহা যুৱককেইজনে প্ৰহাৰ কৰে আৰক্ষীক ৷ আৰক্ষীয়ে জনোৱা অনুসৰি, ন মাইলৰ সমীপত ৰাজপথতে নিজৰ বিলাসী বাহনখন ৰখাই পাঁচজন যুৱকৰ এজনক প্ৰহাৰ কৰি আছিল অন্য চাৰিজন যুৱকে ৷ তাকে দেখি কৰ্তব্যৰত আৰক্ষীয়ে কিয় মাৰপিট কৰিছে বুলি সোধাৰ লগে লগে তুৰাৰ পৰা অহা যুৱকৰ সুৰাসক্ত দলটোৱে উপৰ্যুপৰি আক্ৰমণ কৰে আৰক্ষীৰ দলটোক ৷ নিশা তহলদাৰী আৰক্ষীৰ দায়িত্বত আছিল আৰক্ষী নিৰ্মল দলে, মহাজল আলী, অধীৰ বৰ্মন, ধনমণি পাটগিৰি আৰু নুবুৰ আলী ৷ যুৱককেইজনৰ প্ৰহাৰত আঘাতপ্ৰাপ্ত হয় আৰক্ষী যোৱান কেইজন ৷
আনহাতে, ঘটনা সন্দৰ্ভত আৰক্ষীয়ে ২০০৬/১৯ নম্বৰত এক গোচৰ ৰুজু কৰে ৷ ধৃত যুৱককেইজন ক্ৰমে আৰ মমিন, সনল বাৰ্মা, ৰাক ৰাক জি মমিন, জয় ভট্টাচাৰ্য আৰু অভিশেক গুপ্তা ৷ ৰবিবাৰে পাঁচ অভিযুক্তক আদালতত হাজিৰ কৰাৰ পিছত ১৪ দিনৰ ন্যায়িক জিম্মালৈ প্ৰেৰণ কৰা হয় ৷ উল্লেখযোগ্য যে, নিশাই নম্বৰ প্লেট বিহীন বিলাসী বাহনখনো জব্দ কৰি থানালৈ লৈ অনা হয় ৷
