গুৱাহাটী,১ এপ্ৰিল : ইচ্ছাকৃতভাৱে ভোট নষ্ট কৰাৰ অভিযোগত কংগ্ৰেছৰ পৰা নিলম্বন কৰা বিধায়ক ছিদ্দিক আহমেদে (MLA Siddique Ahmed suspended from Congress) শুকুৰবাৰে কেতবোৰ বিস্ফোৰক অভিযোগ উত্থাপন কৰে । উল্লেখ্য যে বৃহস্পতিবাৰে অনুষ্ঠিত হোৱা ৰাজ্যসভাৰ নিৰ্বাচনত (Rajya Sabha election 2022) বিধায়ক ছিদ্দিক আহমেদে সংখ্যাৰ বিপৰীতে আখৰেৰে 'one' লিখি ভোট নষ্ট কৰা তথা দলীয় হুইপ অমান্য কৰাৰ অভিযোগত নিলম্বিত কৰিছিল । এই নিলম্বনৰ প্ৰসংগত সৰৱ হৈ পৰে বিধায়ক ছিদ্দিক আহমেদ ।
বিধানসভা চৌহদত সাংবাদিকৰ আগত তেওঁ মহাবিস্ফোৰণ ঘটায় (Congress MLA Siddique Ahmed blasts after suspends)। তেওঁ কয় যে কংগ্ৰেছক বেয়া পোৱা হ'লে ভোট নষ্ট কৰাৰ বিপৰীতে প্ৰত্যক্ষভাৱে বিজেপিক ভোট দিলে হয় । তেওঁ লগতে কয় যে কংগ্ৰেছৰ এজনে বিজেপিক ভোট দিছে । তেওঁৰ ভোট নষ্ট হোৱা নাই বুলি দৃঢ়তাৰে উল্লেখ কৰি তেওঁ কয় যে নিখিল ভাৰত কংগ্ৰেছ কমিটিৰ ওচৰত তেওঁ এজেণ্ট হিচাপে থকা পৃথ্বিৰাজ সাথেৰ বিৰুদ্ধে অভিযোগ দিব । লগতে তেওঁৰ ভোটতো পৰীক্ষা কৰাৰ বাবে দাবী জনাব ।
বিজেপি প্ৰাৰ্থীক জয়ী কৰোৱাৰ আঁৰত কংগ্ৰেছৰ কেইবাজনো জড়িত হৈ আছে বুলি উল্লেখ কৰি তেওঁ কয় যে ইয়াৰ চৰ্দাৰ হৈছে নিখিল ভাৰত কংগ্ৰেছ কমিটিৰ সম্পাদক পৃথ্বিৰাজ সাথে । তেওঁৰ ভোটতো যদি নষ্ট হৈছিল তেতিয়া কিয় লগে লগে প্ৰতিক্ৰিয়া প্ৰকাশ নকৰিলে বুলি উল্লেখ কৰি তেওঁ প্ৰশ্ন কৰে যে বিয়লি কিয় ক'লে । কংগ্ৰেছত এটা লবীকেন্দ্ৰিক ৰাজনীতিৰ সৃষ্টি হৈছে বুলি সদৰি কৰি তেওঁ কয় যে পৃথ্বিৰাজ সাথেই সকলো জানে কোনে কোনে গণ্ডগোল কৰিছে ।
কংগ্ৰেছৰ এই লবীত মেইন মেইন লিডাৰবোৰ জড়িত হৈ আছে । এতিয়া তেওঁলোকে এ আই ইউ ডি এফক জগৰীয়া কৰি আছে । তেওঁ বিস্ফোৰক অভিযোগ উত্থাপন কৰি কয় যে বিধানসভা নিৰ্বাচনৰ টিকট দিয়াৰ সময়ত কংগ্ৰেছৰ শীৰ্ষ নেতা জিতেন্দ্ৰ সিং আৰু পৃথ্বিৰাজ সাথেই তেওঁৰ পৰা ৫ কোটি টকা বিচাৰিছিল আৰু যাক লৈ কাজিয়া হৈছিল । তেওঁলোকে বহুতৰ পৰা টকা লৈছে বুলি তেওঁ গুৰুতৰ অভিযোগ উত্থাপন কৰি কয় যে তেতিয়াৰে পৰা তেওঁলোকৰ লগত ছিদ্দিক আহমেদৰ মনোমালিন্য আছিল ।
তেওঁলোকৰ এই লবীত কংগ্ৰেছৰ কেইবাজনো নেতা জড়িত হৈ আছে । তেওঁলোক যিমান দিন কংগ্ৰেছত থাকিব সিমান দিনলৈ কংগ্ৰেছ ক্ষমতাত নাহে । এই লবীটোত কমলাক্ষ্য দে পুৰকায়স্থই মধ্যস্থতাকাৰী হিচাপে মূখ্য ভূমিকা পালন কৰিছে । বৃহস্পতিবাৰৰ ঘটনাৰ পাছত কৰিমগঞ্জত কমলাক্ষ্যৰ লোকে তেওঁৰ পুত্তলিকা দাহ কৰিছে বুলি তেওঁ অভিযোগ কৰে ।
সাথেক বেপাৰী আখ্যা দি তেওঁ কয় যে সাথেই জানে কোনে কোনে বেপাৰ কৰি বিজেপিক ভোট দিছে । তেওঁ কংগ্ৰেছক ভোট দিয়া বুলি সদৰি কৰি প্ৰত্যাহ্বান জনাই কয় যে তেওঁ ভোট দিয়া পেপাৰখনত নম্বৰ আছে আৰু সেইটো চালেই গ'ম পাব তেওঁ ক'ত ভোট দিছে । তেওঁৰ ভোট কোনো কাৰণতে ভুল হ'ব নোৱাৰে বুলি উল্লেখ কৰি তেওঁ নিজৰ ৰাজনৈতিক অভিজ্ঞতাৰ কথা উল্লেখ কৰে । তেওঁ সংখ্যাৰ ওৱান লিখিছে বুলি দৃঢ়তাৰে কয় ।
তেওঁ লগতে কয় যে তেওঁলোকে পৰিকল্পিতভাৱে তেওঁক বলিৰ পঠা সজাব বিচাৰিছে । শ্ব'কজ নকৰাকৈ কেনেকৈ নিলম্বন কৰিব পাৰে বুলি প্ৰশ্ন কৰি তেওঁ কয় যে তেওঁক আৰু এ আই ইউ ডি এফক বলিৰ পঠা সজাব বিচাৰিছে । বিজেপিয়ে লাভ কৰা ভোটখিনি কংগ্ৰেছৰ বুলি অভিযোগ কৰি তেওঁ কয় যে এই কাম পৰিকল্পিতভাৱে পূৰ্বেই কৰা হৈছে । তেওঁলোকে পইচা লৈ দুই নম্বৰি কৰি আনৰ ওপৰত বদনাম জাপি দিছে ।
তেওঁ কয় যে বৰ্তমান কংগ্ৰেছত ৯০ শতাংশ মুছলিম ভোট আছে আৰু বৰাকত হোৱা কংগ্ৰেছৰ কমিটিবোৰৰ নেতৃত্বত মুছলিম নেতা নাই । কংগ্ৰেছত পদাধিকাৰ ল'বলৈ হ'লে পইচা দিব লাগে বুলি অভিযোগ কৰি তেওঁ কয় যে কংগ্ৰেছক পইচা দি পদ লোৱাৰ সংস্কৃতি আৰম্ভ হৈছে । নিলম্বন কৰা বাবে আজি এই কথাবোৰ কৈছো বুলি তেওঁ উল্লেখ কৰে ।
তেওঁৰ অভিযোগ ভূপেন বৰা অহাৰ পিছত পইচা দিয়াৰ কালচাৰটো বেছিকৈ হৈছে । আনহাতে উপ-নিৰ্বাচনটো তেওঁলোকে বিজেপিৰ পক্ষ লৈছিল বুলি তেওঁ গুৰুতৰ অভিযোগ উত্থাপন কৰে । বৰ্তমানৰ নেতাবোৰ থাকিলে কংগ্ৰেছ কেতিয়াও ক্ষমতাত নাহে ।
কংগ্ৰেছ এতিয়া এটা কোম্পানীত পৰিণত হৈছে আৰু কেইজনমান মানুহে চলাই আছে । নিলম্বন সন্দৰ্ভত তেওঁ কয় যে সমষ্টিবাসী ৰাইজৰ লগত আলোচনা কৰি ৰাইজৰ সিদ্ধান্ত মতে তেওঁ আগবাঢ়িব । পূৰ্বৰে পৰাই পৰিকল্পিতভাৱে তেওঁক বদনাম কৰাৰ চেষ্টা চলাই অৱশেষত ৰাজ্যসভাৰ নিৰ্বাচনৰ দিনা এই কাৰ্য কৰা হ'ল বুলি তেওঁ কয় ।
লগতে পঢ়ক :ৰাজ্যসভা নিৰ্বাচনতো বিধস্ত: অসমৰ পৰা নাথাকিল কোনো কংগ্ৰেছ সাংসদ
