গুৱাহাটী, ৫ অক্টোবৰ : আগন্তুক এটা বছৰলৈ কোনো ধৰণৰ সম্প্ৰসাৰণ নহয় মুখ্যমন্ত্ৰী ড৹ হিমন্তবিশ্ব শৰ্মাৰ মন্ত্ৰীসভাৰ । শুকুৰবাৰে গুৱাহাটীত এই কথা স্পষ্ট কৰি দিছে মুখ্যমন্ত্ৰী গৰাকীয়ে । তেওঁ কয় যে, বৰ্তমানৰ মন্ত্ৰীসভাখনৰ প্ৰতিজন সদস্যই যিহেতুকে নিয়াৰিকৈ সকলো কাম কৰি গৈছে গতিকে অন্ততঃ অহা এবছৰলৈ মন্ত্ৰীসভা সম্প্ৰসাৰণৰ কোনো পৰিকল্পনা কৰা নাই ।
মনকৰিবলগীয়া যে, মন্ত্ৰীসভাত এতিয়াও 6 খন আসন খালি হৈ আছে আৰু উপ-নিৰ্বাচনৰ পিছতে এই আসনকেইখন পূৰ্ণ কৰা হ'ব বুলি বিজেপিৰ ভিতৰে বাহিৰে চৰ্চা চলি আহিছিল । তেনে সময়তে শুকুৰবাৰে মুখ্যমন্ত্ৰীয়ে কৰা এই মন্তব্যই মন্ত্ৰী হ'বলৈ আশা পালি থকা কেইবাজনো বিধায়কৰ আশাত অন্ততঃ এবছৰলৈ চেঁচা পানী পৰিল ।
লগতে পঢ়ক:আজি সুধাকন্ঠ ড৹ ভূপেন হাজৰিকাৰ দশম সংখ্যক মৃত্যুবাৰ্ষিকী
উল্লেখ্য যে, মাত্ৰ তিনিদিন পূৰ্বে একেলগে ৩৬ টা নিগম নিকায়ৰ অধ্যক্ষ পদত কেইবাজনো বিধায়ক আৰু প্ৰাক্তন বিধায়কক নিযুক্তি দিয়া হৈছিল । যিসকলৰ মাজত বিজেপিৰ উপৰিও দুই মিত্ৰ দল অগপ আৰু ইউ পি পি এলৰ সদস্যও আছিল ।
আনহাতে, শুকুৰবাৰে চৰকাৰী বন্ধৰ দিন হোৱা হেতুকে মুখ্যমন্ত্ৰীয়ে জনতা ভৱনৰ পৰিৱৰ্তে অসম প্ৰশাসনিক পদাধিকাৰী মহাবিদ্যালয়তে একাংশ লোকক সাক্ষাৎ কৰে । মুখ্যমন্ত্ৰীক সাক্ষাৎ কৰা সকলৰ ভিতৰত কেইবাজনো নৱ নিযুক্ত নিগম নিকায়ৰ অধ্যক্ষও আছিল ।
লগতে পঢ়ক: শিৱ দৌলত কেন্দ্ৰীয় মন্ত্ৰী সৰ্বানন্দ সোণোৱালৰ পূজা-অৰ্চনা
