গুৱাহাটী,৯ অক্টোবৰ: গুজৰাটত অনুষ্ঠিত হৈ থকা ৩৬ সংখ্যক ৰাষ্ট্ৰীয় ক্ৰীড়াত দেওবাৰৰ দিনটোত অসমৰ বক্সাৰ সকলে কঢ়িয়াই আনিলে কেইবাটাও ভাল খবৰ । তাৰকা বক্সাৰ লাভলীনা বৰগোঁহাই,ফুইলাও বসুমতাৰী আৰু শিৱ থাপাই অসমবাসীক দিলে ভাল খবৰ । প্ৰতিযোগিতাখনত তাৰকা বক্সাৰ লাভলীনা বৰগোহাঁইয়ে কোৱাৰ্টাৰ ফাইনেল মেচত কেৰালাৰ প্ৰতিদ্বন্দীক পৰাস্ত কৰি ছেমি ফাইনেলত প্ৰৱেশ কৰাৰ লগতে ব্ৰঞ্জৰ পদক নিশ্চিত কৰিছে(Lovlina Borgohain enters semi-finals) ।
একেদৰে অসমৰ আন এগৰাকী মহিলা বক্সাৰ ফুইলাও বসুমতাৰীয়েও হিমাচল প্ৰদেশৰ ডিম্পল উপাধ্যায়ক পৰাস্ত কৰি ছেমি ফাইনেলত প্ৰৱেশ কৰাৰ লগতে ব্ৰঞ্জৰ পদক নিশ্চিত কৰিছে । একেদৰে অৰ্জুন শিৱ থাপাও ছেমি ফাইনেলত প্ৰৱেশ কৰিছে । ইফালে দেওবাৰৰ দিনটোতে অসমৰ উশ্বু খেলুৱৈসকলে কেইবাটাও সফলতা লাভ কৰিছে(Success of wushu players in national sports) ।
দিনটোত অসমৰ উশ্বু খেলুৱৈসকলে ৩ টা পদক লাভ কৰিছে । উশ্বুত পদক লাভ কৰা এই খেলুৱৈসকল হৈছে ক্ৰমে চানমা ব্ৰহ্মই ৰূপ,ৰংগিলা দৈমাৰীয়ে ব্ৰঞ্জ আৰু সঞ্জীৱ কুমাৰ সিঙে ব্ৰঞ্জ পদক লাভ কৰে । উল্লেখ্য যে অসমে এই পৰ্যন্ত ৰাষ্ট্ৰীয় ক্ৰীড়াত ৭ টা সোণ, ৯ টা ৰূপ আৰু ৫ টা ব্ৰঞ্জৰ সৈতে মুঠ ২১ পদকৰ সৈতে পদকেৰে তালিকাৰ চতুৰ্দশ স্থানত আছে ।
লগতে পঢ়ক: অৱশেষত বিচাৰি পোৱা গ’ল ট্ৰাকৰ খুন্দাত আহত এশিঙীয়া গঁড়টো
