গুৱাহাটী, 30 অক্টোবৰ : আজি অভিশপ্ত 30 অক্টোবৰ ৷ ধাৰাবাহিক বিস্ফোৰণৰ বিভীষিকাৰ 15 টা বছৰ ৷ 15 বছৰ পূৰ্বে আজিৰ দিনটোতে ধাৰাবাহিক বিস্ফোৰণত কঁপি উঠিছিল সমগ্ৰ অসম ৷ 2008 চনৰ 30 অক্টোবৰ অসমৰ ইতিহাসৰ বাবে এটা ক’লা দিন ৷
15 বছৰ পূৰ্বে আজিৰ দিনটোতেই গুৱাহাটী মহানগৰীৰ পানবজাৰ, ফাঁচী বজাৰ,গনেশগুৰিৰ লগতে বৰপেটাৰোড, কোকৰাঝাৰ, বঙাইগাঁও ধৰাবাহিক বিস্ফোৰণত কঁপি উঠিছিল ৷ ক'লা ধোঁৱাই আৱৰি ধৰিছিল ৰাজ্যৰ আকাশ, চাৰিওফালে লাগিছিল কেৱল হুৱাদুৱা ৷
ধাৰাবাহিক এই বোমা বিস্ফোৰণত বহুজনে হেৰুৱাইছিল জীৱন ৷ বহুজনে আকোঁৱালি লৈছিল পংগুত্ব ৷ বিস্ফোৰণৰ ফলত 81 জন লোকৰ মৃত্যু হোৱাৰ লগতে 470 জন লোক আঘাতপ্ৰাপ্ত হৈছিল ৷ অসমত মুঠ 9 টা বিস্ফোৰণ সংঘটিত হৈছিল ৷ গুৱাহাটী মহানগৰীত 3 টা, বৰপেটাৰোডত 2 টা, বঙাইগাঁৱত এটা আৰু কোকৰাঝাৰত 2 টাকৈ বিস্ফোৰণ সংঘটিত হৈছিল সেইদিনা ৷ এই বিস্ফোৰণৰ ফলত মৃত্যু হোৱা সকলক সুঁৱৰি সোমবাৰে গনেশগুৰিত ৰাজ্য চৰকাৰৰে আয়োজন কৰে শ্ৰদ্ধাঞ্জলি অনুষ্ঠান ৷
এই অনুষ্ঠানত উপস্থিত থাকে মন্ত্ৰী চন্দ্ৰমোহন পাটোৱাৰী, বিধায়ক অতুল বৰাকে ধৰি বিস্ফোৰণত আহত আৰু নিহত সকলৰ পৰিয়ালবৰ্গ ৷ তদুপৰি ৰাজ্যৰ বিভিন্ন স্থানত এই ক'লা দিনটোত নিহত সকললৈ শ্ৰদ্ধাঞ্জলি জ্ঞাপন কৰা হয় ৷ ইফালে এই অনুষ্ঠানত নিহত সকলক শ্ৰদ্ধাঞ্জলী জ্ঞাপন কৰি চৰকাৰক সমালোচনা কংগ্ৰেছ নেত্ৰী মীৰা বৰঠাকুৰৰ ৷
উল্লেখযোগ্য যে 30 অক্টোবৰৰ বোমা বিস্ফোৰণৰ মূল দোষীক শাস্তি বিহা হৈছে যদিও, সেই শাস্তিত সন্তুষ্ট নহয় অসমবাসীৰ লগতে ভুক্তভোগীৰ পৰিয়াল ৷ অভিযুক্ত ৰঞ্জন দৈমাৰীৰ পৰিকল্পনাত সংঘটিত হৈছিল এই ধাৰাবাহিক বোমা বিস্ফোৰণ ৷ CBI য়ে এই সমগ্ৰ ঘটনাৰ তদন্ত কৰি গ্ৰেপ্তাৰ কৰিছিল 15 জনক ৷
2010 চনত গ্ৰেপ্তাৰ কৰা হৈছিল এই ঘটনাৰ মূল অভিযুক্ত ৰঞ্জন দৈমাৰিক ৷ দীৰ্ঘদিন ধৰি চলা তদন্তৰ পিছত 2018 চনৰ 29 জানুৱাৰীত গুৱাহাটীৰ বিশেষ আদালতে দোষী সাব্যস্ত কৰিছিল ৷ কিন্তু পৰৱৰ্তী সময়ত উচ্চ ন্যায়ালয়ে ইয়াৰে কেইজনমানক দোষমুক্ত ঘোষণা কৰে ৷
লগতে পঢ়ক : NHPC Big Dam Impact : বৃহৎ নদীবান্ধে শুকুৱালে সোৱণশিৰি, আতংকৰ মাজতে শুকাইছে ৰঙানদীও
