গুৱাহাটী, ২৬ নৱেম্বৰ: ৰাজ্যত সদ্যহতে বৃদ্ধি নহয় বিদ্যুৎ মাচুল । এই সন্দৰ্ভত পুনৰ জাননী জাৰি কৰিলে অসম শক্তি বিতৰণ কোম্পানী লিমিটেড চমুকৈ এ পি ডি চি এলে (APDCL)। উল্লেখ যে ৰাজ্য চৰকাৰৰ অধীনস্থ অসম শক্তি বিতৰক কোম্পানী লিমিটেড চমুকৈ এ পি ডি চি এলে সকলো ধৰণৰ বিদ্যুৎ মাচুল প্ৰতি ইউনিটত ৭৯ পইচালৈ বৃদ্ধি কৰা বুলি এক জাননী জাৰি কৰিছিল । ডিচেম্বৰ মাহৰ পৰা গ্ৰাহকে এই বৰ্ধিত বিদ্যুৎ মাচুল আদায় দিব লাগিব আৰু ডিচেম্বৰৰ পৰা ফেব্ৰুৱাৰী পর্যন্ত তিনি মাহৰ বাবে এই বৰ্ধিত বিদ্যুৎ মাচুল বাহাল থাকিব বুলি এ পি ডি চি এলে জাননীত উল্লেখ কৰিছিল ।
এ পি ডি চি এলৰ এই বিদ্যুৎ মাচুল বৃদ্ধিৰ জাননীকলৈ ৰাজ্যজুৰি ব্যাপক প্ৰতিক্ৰিয়াৰ সৃষ্টি হৈছে । এই প্ৰতিক্ৰিয়াৰ মাজতে ২৪ ঘণ্টাৰ ভিতৰত এ পি ডি চি এলে সলনি কৰিলে সিদ্ধান্ত (APDCL withdrawn decision to increase electricity tariffs)। পুনৰ আন এক জাননী জাৰি কৰি বিদ্যুৎ মাচুল বৃদ্ধিৰ সিদ্ধান্ত প্ৰত্যাহাৰ কৰাৰ কথা সদৰি কৰে এ পি ডি চি এলে । উল্লেখ্য এ পি ডি চি এলে প্ৰতি ইউনিট বিদ্যুতৰ মাচুল ৩০ পইচাৰ পৰা একেকোবে ৭৯ পইচালৈ বৃদ্ধি কৰাৰ সিদ্ধান্ত গ্ৰহণ কৰিছিল । অর্থাৎ প্ৰতি ইউনিটত ৪৯ পইচা বিদ্যুৎ মাচুল বৃদ্ধি ।
এ পি ডি চি এলে জাননীত উল্লেখ কৰা অনুসৰি ইন্ধন আৰু শক্তি ক্ৰয়ৰ খৰচ বহন কৰিবলৈয়ে মাচুল বৃদ্ধিৰ সিদ্ধান্ত গ্ৰহণ কৰা হৈছিল । লক্ষণীয় বিষয় যে নিয়মীয়া বিদ্যুৎ যোগান ধৰাত ব্যৰ্থ হোৱা শক্তি বিভাগে প্ৰায়ে মাচুল বৃদ্ধিৰে উপভোক্তাক মাধমাৰ শোধোৱাৰ ব্যৱস্থা কৰি আহিছে । উল্লেখ যে আগষ্ট-ছেপ্টেম্বৰ মাহত অস্বাভাৱিকভাৱে উপভোক্তাৰ বিদ্যুতৰ বিল বৃদ্ধি পোৱাক লৈ ৰাজ্যজুৰি সৃষ্টি হৈছিল তীব্ৰ বিতৰ্কৰ । প্ৰায় ৪০-৫০ শতাংশকৈ বিদ্যুতৰ বিল বৃদ্ধি হোৱাত শক্তি বিভাগৰ বিৰুদ্ধে উত্থাপিত হৈছিল একাধিক অভিযোগ ।
এনে অভিযোগৰ পাছতে কিছু নৰম হোৱা অসম শক্তি বিতৰণ কোম্পানীয়ে বিদ্যুতৰ বিল পৰীক্ষা কৰাৰ প্ৰস্তাৱ দিছিল । এনে প্ৰস্তাৱ কাৰ্যকৰীকৰণ সম্পূৰ্ণ নোহোৱাৰ পূৰ্বেই এ পি ডি চি এলে পুনৰ ৭৯ পইচাকৈ প্ৰতি ইউনিটত বিদ্যুৎ মাচুল বৃদ্ধি কৰাৰ সিদ্ধান্ত গ্ৰহণ কৰিছিল । কিন্তু অৱশেষত সেই সিদ্ধান্ত প্ৰত্যাহাৰ কৰিলে এ পি ডি চি এলে ।
লগতে কয়: AAP protest in Guwahati : খোৱাপানী বিচাৰি মহানগৰীত আপৰ অভিনৱ প্ৰতিবাদ
