যোৰহাট, ৩ আগষ্ট: সম্প্ৰতি ৰাজ্যৰ বিভিন্ন প্ৰান্তত সুৰা, নিচাজাতীয় দ্ৰব্যৰ বিৰুদ্ধে প্ৰশাসনে অভিযান অব্যাহত ৰাখিছে । আৰক্ষীৰ জালত পৰিছে এই অবৈধ বেহাৰে জড়িত বহু লোক । লগতে লাখ লাখ টকাৰ সুৰা, নিচাজাতীয় দ্ৰব্য জব্দ কৰিছে আৰক্ষীয়ে । ড০ হিমন্ত বিশ্ব শৰ্মাই মুখ্যমন্ত্ৰীৰ দায়িত্ব লৈ চৰকাৰ গঠন কৰাৰ পাছতে নিচাজাতীয় দ্ৰব্য, অবৈধ সুৰাৰ ঘাটি উৎখাত কৰিবলৈ কঠোৰ নিৰ্দেশ জাৰি কৰিছিল । তেতিয়াৰে পৰা প্ৰশাসনে ৰাজ্যৰ বিভিন্ন জিলাত অভিযান তীব্ৰতৰ কৰি তুলিছে ।
যোৰহাট জিলাও ইয়াৰ ব্যতিক্রম নহয় । যোৰহাট জিলা আবকাৰী বিষয়াই জনোৱা মতে, বিভাগটোৱে যোৰহাট জিলা প্ৰশাসনৰ সহযোগত বিগত জুলাই মাহত জিলাখনৰ বিভিন্ন প্ৰান্তত ১৬৬ টা স্থানত অভিযান চালাই ১৬৩৫ লিটাৰ দেশীয় সুৰা নষ্ট কৰিছে । লগতে অবৈধভাৱে দেশীয় সুৰাৰ বেহা চলোৱাৰ অপৰাধত জিলাখনৰ ৪ জন লোকক জেল হাজোতলৈ প্ৰেৰণ কৰিছে । চুলাই প্ৰস্তুতত ব্যৱহৃত ৬৭,৩৩৫ লিটাৰ ফাৰ্মেন্টেড ৱাছো বিভাগটোৱে নষ্ট কৰে যোৱা জুলাই মাহত ।
কেৱল এয়াই নহয়, বিভাগটোৱে দেশীয় সুৰা প্ৰস্তুত কৰোঁতে ব্যৱহৃত ১২১ বিধ সঁজুলি জব্দ কৰিবলৈও সক্ষম হৈছে । আনহাতে, লাওপানী তৈয়াৰ কৰোঁতে প্ৰয়োজন হোৱা ১৪১ কিলোগ্ৰাম সামগ্রীও যোৱা মাহত যোৰহাট আবকাৰী বিভাগে নষ্ট কৰিছে ।
মুঠতে জিলাখনত দেশীয় সুৰাৰ অবৈধ বেহা বন্ধ কৰাৰ বাবে অভিযান তীব্ৰতৰ কৰি তুলিছে । তথাপিও একাংশ লোকে আবকাৰী বিভাগৰ নিৰ্দেশক অৱমাননা কৰি এই অবৈধ বেহা চলাই আহিছে । সেয়ে, আবকাৰী বিভাগেও এইসকল ব্যৱসায়ীক নাকী লগোৱাৰ বাবে অভিযান অব্যাহত ৰাখিছে । আনহাতে, ক'ভিড-১৯ৰ সংক্ৰমণ এই চুলাই ঘাটিবোৰৰ বাবে অধিক হোৱা বুলিও ধাৰণা কৰা হৈছিল ।
কিয়নো, সান্ধ্য আইনৰ বাবে মানুহ বজাৰ অথবা অন্য স্থানত একত্ৰিত হ'ব নোৱাৰে যদিও এই ঘাটিবোৰত ভিৰ কৰে । সেয়ে, সংক্ৰমণৰ আশংকা বৃদ্ধি পায় । লগতে এই ধৰণৰ সুৰা স্বাস্থ্যৰ বাবেও যথেষ্ট ক্ষতিকাৰক । সেয়ে, চৰকাৰে এই অবৈধ দেশীয় সুৰা বন্ধ কৰাৰ বাবে কঠোৰ পদক্ষেপ হাতত লৈছে ।
লগতে পঢ়ক:গাহৰি বাবেই সংঘটিত হ’ল হত্যাকাণ্ড
