হোজাই,28 মে’: হোজাই জিলাৰ লংকা আৰক্ষীৰ বৃহৎ সফলতা । বৃহস্পতিবাৰে নিশা লংকা আৰক্ষীৰ জালত পৰিছে এজন ড্ৰাগছ ব্যৱসায়ী আৰু জব্দ কৰা হৈছে বৃহৎ পৰিমাণৰ ড্ৰাগছ তথা ব্ৰাউন চুগাৰ ।
এক গোপন সূত্ৰৰ পমখেদি লংকা আৰক্ষী বিষয়া বিশ্বজ্যোতি শৰ্মা আৰু হোজাইৰ আৰক্ষী অধীক্ষকৰ নেতৃত্বত লংকা পশ্চিম ডাবলঙত চলোৱা হয় ড্ৰাগছ বিৰোধী অভিযান । এই অভিযানত চামচুল হক নামৰ এজন লোকৰ বাসগৃহত তালাচী চলাই আৰক্ষীয়ে জব্দ কৰিবলৈ সক্ষম হয় বৃহৎ পৰিমাণৰ ব্ৰাউন চুগাৰ খিনি ।
উল্লেখ্য যে, 24 টা সৰু সৰু প্লাষ্টিক কণ্টেনাৰত ড্ৰাগছ সমূহ ভৰাই ৰখা অৱস্থাত উদ্ধাৰ কৰাৰ লগতে 74 টা খালী কণ্টেনাৰো জব্দ কৰে অৰক্ষীয়ে ৷ আৰক্ষীৰ সূত্ৰই প্ৰকাশ কৰা অনুসৰি, জব্দ হোৱা ড্ৰাগছখিনি চামচুল হকে বাৰীৰ পাছফালে ধান খেৰৰ মাজত লুকুৱাই ৰখা অৱস্থাত উদ্ধাৰ কৰা হয় ৷
জব্দকৃত ড্ৰাগছখিনিৰ অনুমানিক বজাৰ মূল্য প্ৰায় 50 হাজাৰ টকা বুলি সদৰি কৰে আৰক্ষীয়ে । এই সমগ্ৰ ঘটনা লগত জড়িত থকা চামচুল হক পলায়ন কৰে যদিও লংকা আৰক্ষীয়ে চামচুলৰ মাতৃ ছাইৰুন নেচাক আটক কৰাৰ লগতে তদন্ত অব্যাহত ৰাখিছে ৷
লগতে পঢ়ক: বাংলাদেশৰ যুৱতী নিৰ্যাতন : আৰক্ষীৰ জালত ৪ অভিযুক্ত
