বোকাখাত,22 আগষ্ট : ৰাজ্য চৰকাৰে ঘোষণা কৰা অনুসৰি, অহা 1 চেপ্টেম্বৰৰ পৰা আৰম্ভ হ'ব অসম আৰক্ষীৰ কনিষ্টবল নিযুক্তি প্ৰক্ৰিয়া ৷ ইয়াৰ বাবে ৰাজ্যৰ সকলো জিলাতে যুৱক-যুৱতী সকলে চলাইছে ব্যাপক প্ৰস্তুতি ৷ আন জিলা সমূহৰ সমান্তৰালকৈ বোকাখাতত স্থানীয় মহাবিদ্যালয়ৰ শিক্ষক সকলৰ উমৈহতীয়া ক্ৰীড়া সংগঠন 'নামদৈয়াং ক্ৰীড়া সন্থা'ৰ দ্বাৰা চলিছে উপযুক্ত ছাত্ৰ-ছাত্ৰী সকলক প্ৰশিক্ষণ দিয়াৰ ব্যৱস্থা কৰা হৈছে ৷
বিশেষকৈ কম বয়সীয়া নিবনুৱা যুৱক-যুৱতী আৰু ছাত্ৰ-ছাত্ৰী সকলক দৌৰ, জাম্প, লিখিত পৰীক্ষাৰ সাধাৰণ জ্ঞানৰ চৰ্চা,মনোবল বৃদ্ধিৰ বাবে যোগভ্যাস, শাৰীৰিক দক্ষতা বৃদ্ধিৰ বিভিন্ন দিশৰ অনুশীলন কৰোৱা হৈছে এই শিবিৰত । বোকাখাতৰ বিশিষ্ট ক্ৰীড়া সংগঠক, প্ৰবক্তা সুবুধ বৰাৰ পৰিচালনাত জে. ডি. এছ. জি. মহাবিদ্যালয়ৰ খেলপথাৰত অনুষ্ঠিত এই নিযুক্তি অনুশীলন শিবিৰত শতাধিক ছাত্ৰ-ছাত্ৰীয়ে অনুশীলন চলাইছে ।
উল্লেখযোগ্য যে, বিগত সময়চোৱাত মহাবিদ্যালয়খনৰ এই খেল পথাৰত অনুষ্ঠিত হোৱা নিযুক্তি অনুশীলন শিবিৰৰ পৰা বহু প্ৰাৰ্থীয়ে ভাৰতীয় সেনা বাহিনী, অসম আৰক্ষীৰ বিভিন্ন পদত নিযুক্তি লাভ কৰিছে ৷ যাৰ বাবে উক্ত প্ৰশিক্ষণ শিবিৰৰ প্ৰতি স্বাভাৱিকতে আকৰ্ষণ আছে চাকৰি প্ৰত্যাশী যুৱক-যুৱতী সকলৰ ৷
মন কৰিবলগীয়া যে, মুখ্যমন্ত্ৰী হিমন্ত বিশ্ব শৰ্মাই মুখ্যমন্ত্ৰী হিচাপে দায়িত্ব গ্ৰহণ কৰাৰ পাছতে কম দিনৰ ভিতৰতে 1 লাখ শিক্ষিত যুৱক-যুৱতীক চৰকাৰী চাকৰিত নিযুক্তি দিয়া হ'ব বুলি এক ঘোষণা কৰিছিল ৷ তাৰ পাছৰে পৰা নিযুক্তি প্ৰক্ৰিয়াৰ বাবে তৎপৰ হৈ পৰিছিল বিত্তমন্ত্ৰী অজন্তা নেওগৰ নেতৃত্বত গঠন কৰি দিয়া নিযুক্তিৰ বিশেষ কমিটীখন ৷ ইয়াৰ মাজতে শেহতীয়াকৈ অসম আৰক্ষীত নিযুক্তি দিয়াৰ বাবে বিজ্ঞাপন মুকলি কৰিছিল অসম চৰকাৰে ৷
লগতে পঢ়কঃ ব্যৰ্থতা ঢাকিবলৈ বিজেপিয়ে 100 দিনৰ চৰকাৰ বুলি প্ৰচাৰ চলাইছে !