গোলাঘাট, 256 আগষ্ট : ঐতিহাসিক নুমলীগড় শোধনাগাৰৰ লগত দ্বিপাক্ষিক চুক্তি ভাৰত চৰকাৰৰ । অসম চুক্তিৰ আধাৰত প্ৰতিষ্ঠা হোৱা নুমলীগড় শোধনাগাৰ সম্প্ৰসাৰণ আৰু উন্নয়নৰ প্ৰতি লক্ষ্য ৰাখি এই চুক্তিত স্বাক্ষৰ কৰে ভাৰত চৰকাৰৰ আভ্যন্তৰীণ জল পৰিবহণ বিভাগে ।
দেশৰ বন্দৰ, জাহাজ আৰু জলপৰিবহণ মন্ত্ৰী সৰ্বানন্দ সোণোৱালৰ উপস্থিতিত এই চুক্তিত স্বাক্ষৰ কৰে নুমলীগড় তেল শোধনাগাৰ আৰু ভাৰত চৰকাৰৰ আভ্যন্তৰীণ জল পৰিবহণ বিভাগৰ বিষয়াই । উল্লেখ্য যে, নুমলীগড় শোধনাগাৰলৈ কাৰ্গ পৰিবহণৰ বাবে জলপথৰ ব্যৱহাৰৰ ওপৰত গুৰুত্ব আৰোপ কৰি স্বাক্ষৰিত হৈছে এই বুজাবুজিৰ চুক্তি ৷
লগতে পঢ়ক: চাৰি দশকত জব্দ-উদ্ধাৰ কৰা গঁড়ৰ খৰ্গ ধ্বংস কৰাৰ পৰিকল্পনা বন বিভাগৰ
বিশেষকৈ নুমলীগড় তেল শোধনাগাৰলৈ বিশ্বৰ ভিন্ন প্ৰান্তৰ পৰা সামগ্ৰী আমদানি আৰু ইয়াৰ লগতে তেল ৰপ্তানিৰ ক্ষেত্ৰত ব্যৱহাৰ হ'ব এই জলপথ ৷
বিভিন্ন ক্ষেত্ৰত স্থলপথেৰে গধুৰ সামগ্ৰী সৰবৰাহ কৰাটো সম্ভৱ নহয় । ইয়াৰ উপৰিও স্থলপথ আৰু বায়ুপথতকৈ জল পথৰ পৰিবহণ খৰছ অতি কম । সেয়েহে এই সমূহ সুবিধা হোৱাকৈ নুমলীগড় শোধনাগাৰৰ সৈতে জলপৰিবহণ বিভাগে স্বাক্ষৰ কৰে এই চুক্তিত ৷
নুমলীগড়ৰ ধনশিৰি নদীৰ কাষৰ জাহাজঘাট পৰিদৰ্শন কৰি সৰ্বানন্দ সোণোৱালে শোধনাগাৰৰ নগৰাঞ্চলত আয়োজন কৰা অনুষ্ঠানত আনুস্থানিকভাৱে শোধনাগাৰৰ সৈতে বুজাবুজি চুক্তিত স্বাক্ষৰ কৰে । উক্ত অনুষ্ঠানত অংশগ্ৰহণ কৰে কৃষি মন্ত্ৰী অতুল বৰা, বিধায়ক বিশ্বজিৎ ফুকন আৰু ভৱেন্দ্ৰ নাথ ভৰালীৰ লগতে ভাৰত চৰকাৰৰ বিষয়া আৰু নুমলীগড় তেল শোধনাগাৰৰ বিষয়া সকলে ৷
লগতে পঢ়ক: ১ ছেপ্টেম্বৰত বিধায়ক পদ এৰিব ফণী তালুকদাৰে
