প্ৰস্তুতি সম্পূৰ্ণ হৈ উঠিছে শ্ৰীমন্ত শংকৰদেৱ সংঘ অধিবেশনৰ

গোলাঘাট , 31 জানুৱাৰীঃ উত্তৰ-পূৰ্বাঞ্চলৰ সৰ্ববৃহৎ ধৰ্মীয় অনুষ্ঠান শ্ৰীমন্ত শংকৰদেৱ সংঘৰ ৮৯ সংখ্যক অধিৱেশনলৈ মাজত মাথোঁ ৪ টা দিন । উখল-মাখল পৰিবেশে বিৰাজ কৰিছে গোলাঘাট জিলাৰ মহুৰা-দিহীঙিয়া পথাৰৰ কাজিৰঙা সমন্বয় ক্ষেত্ৰত ৷ প্ৰতিকূল বতৰকো নেওচি ৰাজ্যৰ বিভিন্ন প্ৰান্তৰ পৰা আহিব লগা লক্ষ লক্ষ ভকত বৈষ্ণৱক আদৰিবলৈ দিনে নিশাই ব্যস্ত হৈ পৰিছে গোলাঘাট, বোকাখাট, কমাৰগাঁও, নুমলীগড়বাসী । ইতিমধ্যেই সম্পন্ন হৈছে মূল মণ্ডপ, মূল মঞ্চ, ৰন্ধনশাল, ভোজনালয় আৰু শিবিৰ সমূহৰ নিৰ্মাণৰ কাম ৷ আদৰণি সমিতি আৰু কেন্দ্ৰীয় সমিতিয়ে সম্পন্ন কৰি তুলিছে অধিৱেশনৰ ব্যৱস্থাপনা ।

ভকত বৈষ্ণৱৰ আশ্ৰয়ৰ বাবে সাজু কৰি তোলা হৈছে ২১৫ টা শিবিৰ, ১০ হাজাৰ ভকত বৈষ্ণৱে একেলগে আহাৰ গ্ৰহণ কৰিব পৰাকৈ সাজু কৰি তুলিছে বৃহৎ ভোজনালয় গৃহ ৷ একেদৰে ১০ হাজাৰ লোকে আসন গ্ৰহণ কৰিব পৰাকৈ আকৰ্ষণীয় ৰূপত সাজু কৰি তুলিছে অধিবেশনৰ মূল মণ্ডপ ৷ অধিৱেশন স্থলীলৈ অহা ভকত বৈষ্ণৱৰ বাবে সম্পূৰ্ণ বিনামূলীয়াকৈ হাজাৰ হাজাৰ যানবাহন ৰখাব পৰাকৈ ব্যৱস্থা কৰা হৈছে বৃহৎ স্থানৰ । গুৰুত্বপূৰ্ণ যে, অসমীয়া কৃষ্টি সংস্কৃতি,পৰম্পৰা আৰু শংকৰ সংঘৰ নীতি আদৰ্শ বুজি উঠিব পৰাকৈ দেশী বিদেশী পৰ্যটকৰ বাবে আহাৰ, আশ্ৰয়ৰ বাবে শিবিৰৰ লগতে মনোৰঞ্জনৰ বাবে অঙ্কীয়া নাট, শংকৰী কলা কৃষ্টি প্ৰদৰ্শন কৰাৰো ব্যৱস্থা কৰিছে মহুৰাবাসীয়ে ৷ ৰাজ্যৰ সকলো বৈষ্ণৱপ্ৰাণ ভক্তৰ উপস্থিতি কামনা কৰিছে উদ্যোক্তা সকলে ৷

লগতে পঢ়কঃপ্লাষ্টিক নিষেধাজ্ঞাৰ জৰিয়তে মৰাপাট শিল্পৰ পুনৰুদ্ধাৰ