গোৱালপাৰা, 14 ছেপ্টেম্বৰ: অসম আৰক্ষীৰ বিশেষ সঞ্চালক প্ৰধান জি পি সিঙে (ADGP G P Singh) আজি গোৱালপাৰাত উপস্থিত হৈ জেহাদী কাৰ্যকলাপ নাশ কৰা সন্দৰ্ভত জিলাখনৰ আৰক্ষী অধীক্ষকৰ (S P Goalpara) লগতে জেহাদী সম্পৰ্কে ৰুজু হোৱা গোচৰৰ তদন্তকাৰী বিষয়া সকলৰ সৈতে এক আলোচনাত মিলিত হয় ।
বুধবাৰে প্ৰথমে তেওঁ দুধনৈ থানাত উপস্থিত হৈ জেহাদী সম্পৰ্কে ৰুজু হোৱা গোচৰৰ সবিশেষ আলোচনা কৰি কিদৰে গোচৰ সমূহ আগুৱাই লৈ যাব লাগিব সেই সম্পৰ্কে পৰামৰ্শ দিয়ে । পিছত তেওঁ গোৱালপাৰাত উপস্থিত হৈ আৰক্ষী অধীক্ষকৰ সৈতে আলোচনাত মিলিত হয় ।
আলোচনাৰ অন্তত সংবাদ মাধ্যমৰ আগত শীৰ্ষ আৰক্ষী বিষয়াগৰাকীয়ে কয় যে জেহাদী সম্পৰ্কে (Jihadi activities in Assam) অসম আৰক্ষীয়ে যেতিয়ালৈকে খবৰ আৰু তথ্য পাই থাকিব তেতিয়ালৈকে অভিযানো অব্যাহত থাকিব । গোৱালপাৰাত গ্ৰেপ্তাৰ হোৱা জেহাদী সকলৰ পৰিকল্পনা আৰু ৰাজ্যৰ আন প্ৰান্তত ধৰা পৰা জেহাদী সকলৰ পৰিকল্পনাৰ মিল আছে নে নাই সেই সম্পৰ্কে অসম আৰক্ষীয়ে তদন্ত অব্যাহত ৰাখিছে বুলি তেওঁ জানিবলৈ দিয়ে ।
