মৰাণ, ১৩ জুলাই : যুৱ প্ৰজন্মক কাৰিকৰী দিশত প্ৰশিক্ষণ প্ৰদান কৰি গ্ৰামাঞ্চলত শিল্প উদ্যোগৰ প্ৰসাৰৰ বাবে তৎপৰ হৈছে ডিব্ৰুগড় জিলা প্ৰশাসন । সেই উদ্দেশ্যে সোমবাৰে ডিব্ৰুগড় জিলা উপায়ুক্ত কাৰ্যালয়ৰ সভাকক্ষত ডিব্ৰুগড় জিলাভিত্তিক গ্ৰাম্য আত্ম কৰ্ম সংস্থাপন প্ৰশিক্ষণ প্ৰতিষ্ঠানৰ (Rural Self Employment Training Institute)ৰ উপদেষ্টা কমিটিৰ এখন গুৰুত্বপূৰ্ণ বৈঠক অনুষ্ঠিত হয় । জিলা উপায়ুক্ত পল্লৱ গোপাল ঝাৰ সভাপতিত্বত বৈঠকখন অনুষ্ঠিত হয় । গ্ৰামাঞ্চলত উন্নয়ন মন্ত্ৰালয়ৰ দ্বাৰা ৰূপায়িত এই প্ৰকল্পৰ মূল লক্ষ্য হৈছে গ্ৰামাঞ্চলৰ যুৱক-যুৱতীক উদ্যোগৰ জৰিয়তে স্বাৱলম্বী হোৱাত সহায় কৰা ।
এনে গোটসমূহক বেংকৰ দ্বাৰা পৰিচালনা আৰু কেন্দ্ৰীয় চৰকাৰ আৰু ৰাজ্য চৰকাৰৰ সক্ৰিয় ভূমিকা পালন কৰি থকা সংস্থাৰ দ্বাৰা প্ৰশিক্ষণ দিয়া হয় । ডিব্ৰুগড় জিলাত ইতিমধ্যে প্ৰশিক্ষিত গোটসমূহৰ বাবে অনাগত সময়ত আহিবলগীয়া এনে কিছুমান সা-সুবিধাৰ বিষয়ে সভাত আলোচনা কৰা হয় । লগতে জিলাখনত কেনেদৰে গ্ৰামাঞ্চলৰ যুৱক-যুৱতীক এইক্ষেত্ৰত আগবাঢ়াই নিব পাৰি সেই বিষয়ে বিশদভাৱে আলোচনা কৰা হয় ।
সহকাৰী আয়ুক্ত হেমা নায়ক, জিলা উদ্যোগিক আৰু বাণিজ্যিক প্ৰতিষ্ঠানৰ সাধাৰণ পৰিচালক, নাবাৰ্ডৰ জিলা উন্নয়ন বিষয়াৰ ওপৰিও পঞ্জাৱ নেশ্যনেল বেংকৰ বিষয়ববীয়াসকল এই বৈঠকত উপস্থিত থাকে ।
গাঁৱৰ যুৱক-যুৱতীক স্ব-নিৰ্ভৰশীল কৰাৰ বাবে প্ৰশিক্ষণ প্ৰদান কৰা হয় । ঘৰতে ক্ষুদ্ৰ উদ্যোগ স্থাপন কৰা আৰু উৎপাদিত সামগ্ৰীৰ বজাৰৰ ব্যৱস্থা কৰা আদিৰ ক্ষেত্ৰত এই যুৱক-যুৱতীসকলক প্ৰশিক্ষণ দিয়া হয় । কেৱল এয়া নহয়, প্ৰয়োজন সাপেক্ষে বেংকৰ পৰা কেনেদৰে ঋণ ল'ব পাৰিব সেই বিষয়েও বুজাই দিয়া হয় । মুঠতে চাকৰিৰ আশাত ঘৰতে এনেয়ে বহি থকাতকৈ কাম কৰিবলৈ যুৱক-যুৱতীসকলক উৎসাহ যোগোৱা হয় ।
লগতে পঢ়ক: মুখ্যমন্ত্ৰীক সাক্ষাৎ ডিব্ৰুগড় বিশ্ববিদ্যালয়ৰ ছাত্ৰ একতা সভাৰ
