মৰাণ, 31 মে’ : দুলীয়াজানত পুনৰ বাঘজান কাণ্ড সংঘটিত হোৱাৰ সম্ভাৱনা । সোমবাৰে নিশা অইলৰ তৈলখাদত সংঘটিত হয় এক অঘটন । অইলৰ 435 নম্বৰ তৈলখাদৰ পাইপ ফাটি নিৰ্গত হয় গেছ (Oil pipe bursts at Duliajan) আৰু খাৰুৱাতেল ।
এই ঘটনাক কেন্দ্ৰ কৰি দুলীয়াজান অইলৰ তৈলখাদৰ ভিতৰচ’ৰাত এক আতংকময় পৰিৱেশে বিৰাজ কৰা পৰিলক্ষিত হৈছে । আনকি এই ঘটনাক কেন্দ্ৰ কৰি আতংক বৃদ্ধি পাইছে স্থানীয় ৰাইজৰ মাজত ৷ স্থানীয় ৰাইজে সদৰি কৰা অনুসৰি, চলিত মাহৰ 12 তাৰিখেও সংঘটিত হৈছিল অনুৰূপ ঘটনা ৷
লগতে পঢ়ক : উদ্বোধনৰ এমাহতেই ভাগিল লখিমপুৰ কেন্সাৰ হাস্পতালৰ চিলিং
এমাহ নৌহওঁতেই পুনৰ এই ঘটনা সংঘটিত হোৱাৰ ফলত ক্ষোভিত হৈ পৰিছে অঞ্চলবাসী ৷ আনকি ক্ষোভিত ৰাইজে অইলৰ নিৰাপত্তাৰ দায়িত্বত থকা আৰক্ষী বিষয়াসকলক তৈলখাদৰ ভিতৰচ’ৰাত প্ৰৱেশত কৰাতো বাধা প্ৰয়োগ কৰা দেখিবলৈ পোৱা গৈছিল ৷
আনহাতে, ঘটনা সন্দৰ্ভত বাৰম্বাৰ বিভাগীয় কৰ্তৃপক্ষক এই সন্দৰ্ভত অৱগত কৰাৰ পাচতো কাণসাৰ নিদিয়াৰ এক গুৰুতৰ অভিযোগ উত্থাপিত কৰিছে অঞ্চলটোৰ ৰাইজে ৷ সোমবাৰে নিশাই অইল কৰ্তৃপক্ষই গেছ আৰু তেল নিৰ্গমন বন্ধ কৰিবলৈ চেষ্টা কৰিছিল যদিও বৰ্তমানলৈকে এয়া সম্পূৰ্ণকৈ বন্ধ কৰিবলৈ সক্ষম হোৱা নাই ৷ সোমবাৰে নিশা সংঘটিত হোৱা এই ঘটনাৰ ফলত এতিয়া ভয়ে-শংকায়ে দিন পাৰ কৰিবলগীয়া হৈছে অঞ্চলটোৰ ৰাইজে ৷
লগতে পঢ়ক : সৌভাগ্যক্ৰমে ৰক্ষা পৰিল দুলীয়াজানবাসী
