মৰাণ, 7 ডিচেম্বৰ: আলফাৰ শিবিৰত আলফা কেডাৰক মৃত্যুদণ্ড দিয়াৰ লগতে এজনৰ পাছত আন এজন আলফা সদস্যই পলায়ন কৰি আত্মসমৰ্পণ কৰিছে । আৰক্ষী সঞ্চালক প্ৰধান জিপি সিঙে শেহতীয়াকৈ বিভিন্ন কাৰ্যসূচী গ্ৰহণ কৰিছে যাতে আলফা স্বাধীনলৈ কোনো যুৱক-যুৱতী যাবলৈ ইচ্ছা প্ৰকাশ নকৰে । একে সময়তে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই আলফা সেনাধ্যক্ষ পৰেশ বৰুৱাক শান্তি আলোচনাৰ মাজলৈ আহ্বান জনাই আহিছে । ইয়াৰ পাছতো উজনিত সদস্যভৰ্তিৰ বাবে তৎপৰ হৈছে আলফা স্বাধীন ।
চৰাইদেউ জিলাখনৰ প্ৰায় সংখ্যক চাহ বাগিচাত বৃহৎ পৰিমাণৰ ধন বিচাৰি আলফা স্বাধীনে দাবী পত্ৰ দিছে শেহতীয়াকৈ । ইয়াৰ মাজতে ডিব্ৰুগড়ৰ নাহৰকটীয়াৰ এগৰাকী প্ৰতিষ্ঠিত সাংবাদিক বিদ্যুৎ মহন্তই বুধবাৰে পুৱাই ঘৰৰ পৰা নিজৰ মটৰ চাইকেলখন লৈ ওলাই যোৱাৰ পাছতে আলফা স্বাধীনত যোগদান কৰাৰ কথা সামাজিক মাধ্যমৰ জড়িয়তে ৰাজহুৱা কৰে ৷
এই কথা বিয়পি পৰাৰ লগে লগে ৰাজ্যৰ সচেতন মহলৰ মাজত তীব্ৰ প্ৰতিক্ৰিয়া সৃষ্টি হৈছে । সাংবাদিকৰ কলম এৰি কিয় হাতত অস্ত্ৰ তুলি লোৱাৰ দিশলৈ আগবাঢ়িল সাংবাদিক বিদ্যুৎ মহন্তই ! নিজে আলফা স্বাধীনত যোগদান কৰা বুলি এক দীঘলীয়া পোষ্ট সামাজিক মাধ্যমত দিয়াৰ পাছতে ডিব্ৰুগড় আৰক্ষী এই বিষয়টোক লৈ অধিক তৎপৰ হৈছে ।
এই ঘটনাক লৈ বৃহস্পতিবাৰে নাহৰকটীয়াৰ দুজন সাংবাদিকক নাহৰকটীয়া থানাত উপ-আৰক্ষী অধীক্ষক নৱ কুমাৰ বৰাই বহু সময় জেৰা চলায় । উপ-আৰক্ষী অধীক্ষক নৱ কুমাৰ বৰাই সংবাদ মাধ্যমৰ আগত কয় যে যেতিয়ালৈকে আলফা স্বাধীনৰ তৰফৰ পৰা স্পষ্টীকৰণ প্ৰদান নকৰে তেতিয়ালৈকে সমগ্ৰ ঘটনাক নিশ্চিত কৰিব নোৱাৰি ।
লগতে তেওঁ কয় যে সাংবাদিক গৰাকীৰ মোবাইলৰ শেহতীয়া স্থিতি নাগালেণ্ডৰ ম'ন জিলাত নিশ্চিত কৰা হৈছে । ইয়াৰ উপৰিও বিদ্যুৎ মহন্তই লৈ যোৱা বাইকখন বিচাৰি অভিযান অব্যাহত ৰখা হৈছে । আজিৰ দিনটোলৈকে সাংবাদিক বিদ্যুৎ মহন্তই আলফা স্বাধীনত যোগদান কৰিছে নে নাই সেই কথাত ডিব্ৰুগড় আৰক্ষী নিশ্চিত হ’ব পৰা নাই ৷
ইফালে সাংবাদিকগৰাকী আলফা স্বাধীনলৈ যোৱা বুলি চৰ্চা হোৱাৰ লগে লগেই তেওঁৰ ঘৰ তথা পৰিয়ালত হুৱাদুৱা লাগে ৷ শোক ভাগি পৰা বিদ্যুতৰ মাতৃ অজ্ঞান হৈ পৰাৰ লগতে কান্দোনত ভাগি পৰিছে সাংবাদিকগৰাকীৰ পিতৃ আৰু পত্নী ৷ সকলোৱে বিচাৰিছে ঘৰলৈ ঘূৰি আহক বিদ্যুৎ মহন্ত ৷ আলফা স্বাধীনৰ মুৰব্বী পৰেশ বৰুৱালৈও বিদ্যুতক ঘূৰাই পঠিওৱাৰ বাবে আহ্বান জনাইছে পৰিয়াল তথা সুহৃদবৃন্দই ৷
লগতে পঢ়ক: বিদ্যুৎ মহন্তৰ আলফা স্বাধীনত যোগদানৰ পিচতে নাহৰকটীয়াৰ দুই সাংবাদিকক আৰক্ষীৰ জেৰা
