মৰাণ, ৮ অক্টোবৰ : ৰাজ্য চৰকাৰে বিশেষভাৱে সক্ষম ব্যক্তিৰ সুবিধাৰ্থে গ্ৰহণ কৰিছে অভিলাষী আঁচনি । লগতে এই আঁচনিৰ সুবিধা লাভৰ পৰা যাতে কোনো দিব্যাংগ ব্যক্তি বঞ্চিত নহয়, সেয়া নিশ্চিত কৰাৰ বাবে মুখ্যমন্ত্ৰী ড০ হিমন্ত বিশ্ব শৰ্মাই মন্ত্ৰী-বিধায়কসকলক নিজ নিজ সমষ্টিত এই বিষয়ত দৃষ্টি ৰাখিবলৈ নিৰ্দেশ দিছে । বৃহস্পতিবাৰে, চৰাইদেউ জিলাৰ সমাজ কল্যাণ বিভাগ আৰু জিলা প্ৰশাসনৰ সহযোগত মৰাণৰ নাট্য মন্দিৰত এক অনুষ্ঠানৰ আয়োজন কৰা হয় ।
এই অনুষ্ঠানত মাহমৰা সমষ্টিৰ অন্তৰ্গত অঞ্চলৰ বিশেষভাৱে সক্ষম ব্যক্তিসকলৰ মাজত হুইল চেয়াৰ বিতৰণ কৰে ৰাজহ মন্ত্ৰী যোগেন মহনে । আনহাতে, ভাৰতীয় জনতা পাৰ্টীৰ খোৱাং মণ্ডল আৰু লৰুৱা মণ্ডলৰ সৌজন্যত তথা অসম চৰকাৰৰ সমাজ কল্যাণ বিভাগৰ সহযোগত মৰাণৰ বিধায়কৰ কাৰ্যালয়ত আন এক অনুষ্ঠানৰ আয়োজন কৰা হয় । এই অনুষ্ঠানত মৰাণ বিধানসভা সমষ্টিৰ দিব্যাংগ হিতাধিকাৰীক ট্ৰাই চাইকেল প্ৰদান কৰে মৰাণ সমষ্টিৰ বিধায়ক চক্ৰধৰ গগৈয়ে ।
এই অনুষ্ঠানত ভাৰতীয় জনতা পাৰ্টীৰ বহুকেইগৰাকী বিষয়ববীয়াৰ লগতে সমাজ কল্যাণ বিভাগৰ বিষয়াসকল আৰু জিলা পৰিষদৰ সদস্য, পঞ্চায়তৰ সভাপতি-সভানেত্ৰীসকল আৰু সমষ্টিৰ ৰাইজ উপস্থিত থাকে । চৰকাৰী আঁচনিৰ সুবিধা লাভ কৰি সন্তুষ্টি ব্যক্ত কৰে বিশেষভাৱে সক্ষম ব্যক্তিসকলে ।
লগতে পঢ়ক:সোণাৰিৰ ৰাজপথত জ্বলিল কেন্দ্ৰীয় পেট্ৰ’লিয়াম মন্ত্ৰীৰ পুত্তলিকা
