শিলচৰ,২২ এপ্ৰিল: ৰাজ্যৰ চাৰিওফালে বৃদ্ধি পাইছে কৰ'ণা আক্ৰান্তৰ সংখ্যা । তাৰ লগে লগে কঠোৰ হৈছে প্ৰশাসন তথা চৰকাৰ । স্বাস্থ্য বিভাগে বিভিন্ন ধৰণৰ পদক্ষেপ গ্ৰহণ কৰিছে । বিমানবন্দৰ, ৰে’ল ষ্টেচন আদিত ক'ভিড পৰীক্ষা ক্ষীপ্ৰতাৰে কৰি থকা হৈছে ।
অসম চৰকাৰে ৰাজ্যখনলৈ অহা সকলো বিমান যাত্ৰীৰ বাবে বিনামূলীয়া ৰেপিড এণ্টিজেন পৰীক্ষা কৰাটো বাধ্যতামূলক কৰিছে ৷ তাৰ পিছত আৰএটিৰ প্ৰতিবেদন নিগেটিভ হ'লেও ৫০০ টকাৰ আৰটিপিচিআৰ পৰীক্ষা কৰা হ'ব বুলি ঘোষণা কৰিছে । ইয়াৰ মাজতে শিলচৰত সংঘটিত হৈছে ৰহস্যজনক ঘটনা । শিলচৰৰ কুম্ভীৰগ্ৰাম বিমানবন্দৰত ক'ভিডৰ পৰীক্ষা আৰম্ভ হোৱাৰ দিনটোতে বৃহস্পতিবাৰে পলায়ন কৰে ৩০০ গৰাকী যাত্ৰীয়ে ।
বিমানবন্দৰটোত বুধবাৰৰ দিনটোত মুঠ ৬৯০ গৰাকী যাত্ৰীয়ে অৱতৰণ কৰিছিল । যাত্ৰীসকলক বিমানবন্দৰ আৰু ওচৰৰ টিকোল মডেল চিকিৎসালয়ত স্বাৱব পৰীক্ষা কৰাৰ কথা আছিল । তাৰ ভিতৰত ১৮৯ গৰাকী যাত্ৰীৰ পৰীক্ষা সম্পন্ন কৰা হয় । ইয়াৰে ৬ গৰাকীৰ দেহত ক'ভিড-১৯ ভাইৰাছৰ অৱস্থিতি ধৰা পৰে । কিন্তু বাকী প্ৰায় ৩০০ যাত্ৰীয়ে ৫০০ টকাৰ বিনিময়ত পৰীক্ষা কৰাক লৈ হুলস্থুল পৰিৱেশৰ সৃষ্টি কৰি পৰীক্ষা নকৰাকৈ পলায়ন কৰে ।
এই ঘটনাৰ পিছতে তীব্ৰ প্ৰতিক্ৰিয়াৰ সৃষ্টি হয় জিলাখনত । আটাইকেইজন যাত্ৰীৰ বিৰুদ্ধে কঠোৰ ব্যৱস্থা গ্ৰহণৰ ঘোষণা কৰে জিলা প্ৰশাসনে । সংবাদমেলযোগে এই কথা ঘোষমা কৰে অতিৰিক্ত জিলা উপায়ুক্ত সুমিত সত্যায়নে ।
লগতে পঢ়ক: চৰাইদেউত তিনি আলফাৰ আত্মসমৰ্পণ
