বিশ্বনাথ, 14 জুন : গহপুৰত শেহতীয়াকৈ পোহৰলৈ আহিছে মৰেল পুলিচৰ নৃশংসতাৰ এক হৃদয় বিদাৰক ঘটনা । এগৰাকী অসহায় মহিলাক শাৰীৰিক আৰু মানসিকভাৱে একাংশ পুৰুষ-মহিলাই চলোৱা আক্ৰমণৰ ঘটনাই নৃশংসতাৰ সকলো সীমা অতিক্ৰম কৰিলে । ঘটনাটো গহপুৰৰ কুহিমাৰীৰ । ভুক্তভোগী মহিলাগৰাকীৰ স্বামী কেশৱ দাসৰ নেতৃত্বত হৃদয়হীন এদল পুৰুষ-মহিলাই চলালে এই বৰ্বৰ আক্ৰমণ ।
প্ৰাপ্ত তথ্য অনুসৰি , পাৰিবাৰিক সংঘাতৰ বাবে কেইবামাহ ধৰি স্বামীগৃহৰ পৰা আঁতৰি থকা মহিলাগৰাকী স্বামী গৃহলৈ দুদিন পূৰ্বে উভতি আহে । উভতি অহাৰ পাছতে মহিলা গৰাকীক পুখুৰীৰ পানীত পেলাই বেত্ৰাঘাট কৰাৰ লগতে চুলিত ধৰি শাৰীৰিক-মানসিক অত্যাচাৰ চলায় ঘটনাস্থলীত উপস্থিত বহু লোকে ৷ তিনিটি কৈ সন্তানৰ মাতৃ গৰাকীৰ ওপৰত চলোৱাৰ এই বৰ্বৰ আক্ৰমণৰ ঘটনাৰ খবৰ লাভ কৰা মাত্ৰেই গহপুৰ আৰক্ষী ঘটনাস্থলীত উপস্থিত হৈ মহিলা গৰাকীক উদ্ধাৰ কৰি হাস্পতাললৈ প্ৰেৰণ কৰে । নিৰ্যাতিতা মহিলাগৰাকী বৰ্তমান তেজপুৰ চিকিৎসা মহাবিদ্যালয়ত চিকিৎসাধীন হৈ আছে ।
ইফালে ঘটনাৰে জড়িত পুৰুষ-মহিলাসহ সাতজনক গহপুৰ আৰক্ষীয়ে এই পৰ্যন্ত আটক কৰিছে । গহপুৰ আৰক্ষীয়ে বৰ্তমানেও ঘটনাৰে জড়িত অন্য সকলক কৰায়ত্ব কৰিবলৈ অভিযান অব্যাহত ৰাখিছে ।
লগতে পঢ়ক: জাগুণত অঘটন: পুখুৰীৰ পৰা মুমুৰ্ষ অৱস্থাত উদ্ধাৰ ৪ কিশোৰ
