বজালী, 23 জুন : সমগ্ৰ দেশত কৰ’ণা মহামাৰীৰ সৈতে আনুসাংগিকভাৱে অৰ্থনৈতিক দুৰৱস্থাই চুই গৈছে বহু উদ্যোগক ৷ ব্যক্তিগত খণ্ডত কাম কৰা বহুলোকে নিতৌ হেৰুৱাইছে চাকৰি ৷ জীৱিকা হেৰুওৱাৰ পিছত ঘৰ-সংসাৰ চলোৱাৰ চিন্তাই টোপনি হেৰুৱাইছে বহু লোকৰ ৷ এনে এক অস্থিৰ অৱস্থাই জোকাৰি গৈছে পৃথিৱী বিখ্যাৎ অসমৰ ভ্ৰাম্যমান থিয়েটাৰ উদ্যোগ(mobile theater industry of Assam)কো ৷ মূলত 2019 চনৰ ডিচেম্বৰ মাহত কা’ বিৰোধী আন্দোলনে(anti CAA movement ) আনি দিয়া স্থৱিৰতাৰ পিছতেই কৰ’ণা মহামাৰীৰ বাবে নাট প্ৰদৰ্শন বন্ধ হৈ পৰিছিল ৷
ক্ৰমাগতভাৱে দুটা বছৰৰ বাবে এইদৰে নাট প্ৰদৰ্শন বন্ধ হৈ পৰাত উদ্যোগটো সন্মুখীন হৈছে ব্যাপক আৰ্থিক দুৰৱস্থাৰ ৷ কেৱল উদ্যোগটোৰ লগত জড়িত ব্যৱসায়িক দিশটোৱেই নহয় এই উদ্যোগৰ সৈতে জড়িত থকা শিল্পী তথা কলা-কুশলী সকলৰ জীৱনলৈকো নামি আহিছে ঘোৰ অমানিশা ৷ এই সময়তে ৰাজ্যৰ সাংস্কৃতিক বিভাগৰ মন্ত্ৰী বিমল বৰাই(cultural ministetr Bimal Bora) শিল্পী সকলক চৰকাৰৰ ফালৰ পৰা আৰ্থিক সকাহ দিয়াৰ ক্ষেত্ৰত চিন্তা চৰ্চা চলি থকা বুলি সাংবাদিকক অৱগত কৰে ৷
উল্লেখযোগ্য যে, মন্ত্ৰী বিমল বৰা নৱগঠিত বজালী জিলাৰ অভিভাৱক মন্ত্ৰী হিচাপেও দায়িত্বত আছে এই উপলক্ষে বুধবাৰে, ৰাজ্যৰ নাট্য নগৰী হিচাপে খ্যাত পাঠশালাত উপস্থিত হয় মন্ত্ৰীগৰাকী ৷
ভ্ৰাম্যমাণ থিয়েটাৰৰ সন্দৰ্ভত মন্ত্ৰীগৰাকীয়ে কয় যে, চৰকাৰ সদায়ে ভ্ৰাম্যমাণ থিয়েটাৰৰ লগত জড়িত সকলো শিল্পী কলা-কুশলীৰ সৈতে আছে আৰু থাকিব । বিগত সময়ত চৰকাৰে শিল্পী, কলা-কুশলীক আৰ্থিক সাহায্য আগবঢ়োৱাৰ দৰে এই বৰ্ষৰ বাবেও চৰকাৰে শিল্পীসকলৰ বাবে চিন্তা চৰ্চা কৰিছে । আনহাতে, নাট প্ৰদৰ্শনী সম্পৰ্কত মন্তব্য কৰি ৰাজ্যৰ সাংস্কৃতিক মন্ত্ৰী গৰাকীয়ে কয় যে, অতিমাৰীৰ সংক্ৰমণ কমিলে ভ্ৰাম্যমাণ আৰম্ভ কৰাৰ কথা চৰকাৰে বিবেচনা কৰিব ।
আনহাতে, জিলা প্ৰশাসনৰ সমূহ বিষয় ববীয়াৰ সৈতে মিলিত হৈ বজালী জিলাৰ অভিভাৱক মন্ত্ৰীগৰাকীয়ে জিলাখনৰ সমূহ সমস্যা, অভাৱ-অভিযোগৰ বিষয়ে বুজ লয় । সাম্প্ৰতিক ক'ভিড পৰিস্থিতি সন্দৰ্ভত মন্ত্ৰীগৰাকীয়ে ভেকচিন গ্ৰহণ কৰিবলৈ ৰাইজক আহ্বান জনোৱাৰ লগতে ভেকচিনৰ নাটনি সন্দৰ্ভত মন্তব্য কৰে যে, যদিও সাময়িক নাটনি হৈছে সোনকালেই ভেকচিনৰ এই নাটনিৰ অন্ত পৰিব । এই সময়চোৱাত মন্ত্ৰী বিমল বৰাৰ সৈতে তেখেতৰ সতীৰ্থ মন্ত্ৰী তথা পাটাছাৰকুচিৰ বিধায়ক ৰণজিৎ কুমাৰ দাসো উপস্থিত থাকে ৷
লগতে পঢ়ক : স্কাল্পটিং মাৰ্ভেল: ৰঘুনাথ মহাপাত্ৰ
