বৰপেটা, ১৭ মে': পি এম কিষাণ আঁচনিৰ নামত বৰপেটাৰ চেঙাত অস্তিত্বহীন লোকৰ বাবে ধন উলিয়াই নিয়াৰ অভিযোগ ৷ ইয়াৰ বিৰুদ্ধে সৰৱ হৈ পৰিছে কৃষক মুক্তি সংগ্ৰাম সমিতিৰ চেঙা আঞ্চলিক সমিতি । সংগঠনটোৰ অভিযোগ অনুসৰি, বৰপেটাৰ বৰচেঙা গাঁৱত এজনো নাই মুছলমান সম্প্ৰদায়ৰ লোক ৷ কিন্তু পি এম কিষাণ সন্মান নিধিৰ হিতাধিকাৰী তালিকাত আছে মুছলমান সম্প্ৰদায়ৰ দ্বিশতাধিক ভুৱা কৃষকৰ নাম ৷ বৰচেঙা ৰাজহ গাঁৱৰ এই বৃহৎ সংখ্যক মুছলমান সম্প্ৰদায়ৰ লোকক আঁচনিত অন্তৰ্ভুক্ত কৰি দুষ্ট চক্ৰই গোপনে উলিয়াই নিয়ে বৃহৎ পৰিমানৰ ধন ৷
ৰাজহ গাঁওখনত এজনো মুছলমান সম্প্ৰদায়ৰ লোক নথকা হেতুকে কোনে, কিদৰে ধন উলিয়াই নিলে তাৰ তদন্তৰ দাবী কৰিছে কৃষক সংগঠনটোৱে ৷ আনহাতে হিতাধিকাৰী নিৰ্বাচনত একাংশ ৰাজনৈতিক নেতাই হস্তক্ষেপ কৰাৰো অভিযোগ তুলিছে সংগঠনটোৱে ৷ এইক্ষেত্ৰত উচিত তদন্ত বিচাৰি দোষীক কঠোৰ শাস্তি প্ৰদান কৰিবলৈ দাবী জনায় সমিতিখনৰ সম্পাদক চাণক্য ডেকাই ।
লগতে পঢ়ক : ৰঙাপৰাত বনৰীয়া হাতীৰ তাণ্ডৱ
