পাঠশালা, 22 অক্টোবৰ : ভৱানীপুৰ সমষ্টি(Bhawanipur Constituency)ত অনুষ্ঠিত হ’বলগীয়া উপ-নিৰ্বাচন(By Election)ক কেন্দ্ৰ কৰিয়েই সমষ্টিটোলৈ এতিয়া তাঁত-বাতি কাঢ়িছে ৰাজ্যৰ শাসক-বিৰোধীৰ বহু দলীয় নেতা-পালিনেতাই ৷ বিভিন্ন দলৰ নেতা-মন্ত্ৰীসকলে যেন হামখুৰি খাই পৰিছে সমষ্টিটোত ৷ বৃহস্পতিবাৰে অগপ(AGP) দলৰ উদ্যোগত ভোগপুৰ ৰাসথলীত নিশালৈ চলে নিৰ্বাচনী প্ৰচাৰ সভা ৷
বিজেপি দলৰ প্ৰাৰ্থী ফণীধৰ তালুকদাৰ(Phanidhar Talukdar)ৰ সপক্ষে প্ৰচাৰ চলাবলৈ উপস্থিত হয় কেইবাগৰাকীও নেতা-মন্ত্ৰী ৷ অগপ সভাপতি তথা মন্ত্ৰী অতুল বৰা(Atul Bora), মন্ত্ৰী কেশৱ মহন্ত(Keshab Mahanta), সাংসদ দিলীপ শইকীয়া(Dilip Saikia), বিধায়ক জয়ন্ত মল্ল বৰুৱা(Jayanta Malla Baruah), বৰপেটাৰ প্ৰাক্তন বিধায়ক গুনীন দাস(Gunin Das), ন-অগপ নেতা ডাঃ তাৰা প্ৰসাদ দাস(Tara Prasad Das)কে ধৰি বহুকেইগৰাকী নেতাই অংশগ্ৰহণ কৰে এই প্ৰচাৰ সভাত ।
অগপ সভাপতি অতুল বৰাৰ ভাষ্য অনুসৰি, উপ-নিৰ্বাচনত মিত্ৰজোঁটৰ প্ৰাৰ্থী ফণীধৰ তালুকদাৰৰ জয় নিশ্চিত ৷ এইবাৰ সমষ্টিটোত শ্বহীদ খৰ্গেশ্বৰ তালুকদাৰৰ নামত নতুন পৰিকল্পনা কৰা হ’ব বুলিও উল্লেখ কৰে মন্ত্ৰীগৰাকীয়ে ৷ আনহাতে বিধায়ক জয়ন্ত মল্ল বৰুৱাই কয় যে, কংগ্ৰেছ(Congress) আৰু এ আই ইউ ডি এফ(AIUDF) একেটা মুদ্ৰাৰে ইপিঠি-সিপিঠি ।
কংগ্ৰছৰ সভাপতি ভূপেন বৰাৰ অসমীয়া খিলঞ্জীয়া মানুহৰ মাজত প্ৰাসংগিকতা নাই । তেওঁ বিজেপি দলত যোগদান কৰিব বিচাৰিলেও দলে তেওঁক গ্ৰহণ নকৰে বুলি মন্তব্য আগবঢ়ায় বিধায়ক জয়ন্ত মল্ল বৰুৱাই ৷ সভাত উপস্থিত থাকি মন্ত্ৰী কেশৱ মহন্তয়ো ক’ভিডৰ নতুন SOP আৰু ক’ভিড সন্দৰ্ভত মন্তব্য আগবঢ়ায় ৷
গতিকে সমষ্টিটোত জাকে জাকে হোৱা নেতা-পালিনেতাৰ উপস্থিতিৰ পৰা ক’ব পাৰি যে ভৱানীপুৰ সমষ্টি যেন হৈ পৰিছে নামনি অসমৰ এক ৰাজনৈতিক হাব ।
লগতে পঢ়ক : অসমৰ ইতিহাসৰ আটাইতকৈ বেয়া মানুহজন এতিয়া মুখ্যমন্ত্ৰীৰ চকীত বহিছে : ভূপেন বৰা
