স্পৰ্টছ ডেস্ক, 8 আগষ্ট : নিজৰ সৰ্বশ্ৰেষ্ঠ প্ৰদৰ্শনেৰে টকিঅ’ত অলিম্পিক (Tokyo Olympics 2020) যাত্ৰাৰ সামৰণি পেলালে ভাৰতে ৷ টকিঅ’ অলিম্পিকত 7 টা পদক জয়ৰে দেশলৈ গৌৰৱ কঢ়িয়াই অনা অলিম্পিয়ান সকলৰ উপৰিও মাত্ৰ কিছুদূৰ বাটৰ বাবে পডিয়ামৰ সপ্নৰ সাৰ্থক কৰিবলৈ সক্ষম নোহোৱা যোদ্ধাসকলৰ বিষয়ে আহক জানো কিছু কথা
নীৰজ চোপ্ৰা : স্বৰ্ণ
সকলোৱে কয় ‘শ্ৰেষ্ঠটো শেষলৈ ৰাখি থ’ব লাগে’ ৷ অলিম্পিকত ভাৰতৰ বাবে এই কথাটোৱে যেন সত্য প্ৰমাণিত কৰিছে 23 বৰ্ষীয় জেভলিন থ্ৰ’ৱাৰ নীৰজ চোপ্ৰাই ৷ ভাৰতৰ হৈ এথলেটিকছত অলিম্পিকৰ প্ৰথমটো পদক লাভ কৰাৰ লগতে একক শাখাত স্বৰ্ণ জয় কৰা দ্বিতীয় গৰাকী ভাৰতীয় নীৰজ চোপ্ৰা ৷
কেইবা দশক ধৰি ভৰতে ‘নিচেই কাষত’ ৰ কাহিনী শুনাৰ পাচত শনিবাৰে অৱশেষত এই স্বৰ্ণীল মুহুৰ্তৰ সাক্ষী হ’বলৈ সুযোগ লাভ কৰে ৷ জেভলিনত নীৰজ চোপ্ৰাই 87.58 মিটাৰৰ থ্ৰ’ৰে ভাৰতক টকিঅ’ত প্ৰথমটো স্বৰ্ণ জয়ৰ সোৱাদ দিয়ে ৷
এটি সাধাৰণৰ কৃষক পৰিয়ালত জন্মগ্ৰহণ কৰা নীৰজে প্ৰথমাৱস্থাত ওজন কমাবলৈ এথলেটিকছত প্ৰৱেশ কৰিছিল ৷
এদিনাখন তেওঁক খুৰাকে দৌৰিবলৈ পানীপথৰ শিবাজী ষ্টেডিয়ামলৈ লৈ যায় ৷ কিন্তু চোপ্ৰা দৌৰৰ প্ৰতি আগ্ৰহী নাছিল ৷ ইয়াৰ বিপৰীতে জেভলিন থ্ৰ’ৱে তেওঁক আকৰ্ষিত কৰিছিল ৷
ভাৰতীয় সেনাৰ ৰাজপুতানা ৰাইফলৰ চুবেদাৰ নীৰজ চোপ্ৰাই 2016 চনৰ junior world championshipsত স্বৰ্ণ জয় কৰাৰ লগতে 86.48 মিটাৰ থ্ৰ’ৰে Under-20ৰ বিশ্ব ৰেকৰ্ড গঢ়িবলৈ সক্ষম হয় যি এতিয়াও বাহাল আছে ৷
ইয়াৰ উপৰিও চোপ্ৰাই 2018 চনৰ কমনৱেল্থ গেমছ, এছিয়ান গেমছ আৰু 2017 চনৰ এছিয়ান চেম্পিয়নশ্বিপত স্বৰ্ণ পদক লাভ কৰিবলৈ সক্ষম হৈছিল ৷
মীৰবাঈ চানু: ৰূপ
26 বৰ্ষীয় মণিপুৰৰ ভাৰোত্তোলকগৰাকীয়ে সমগ্ৰ দেশৰে আশা পুনৰ জাগ্ৰত কৰি তোলে যেতিয়া প্ৰায় 21 বছৰৰ অন্তত ভাৰোত্তোলনত তেওঁ দেশক অলিম্পিক পদক প্ৰদান কৰিবলৈ সক্ষম হয় ৷ 24 জুলাইত অলিম্পিকৰ প্ৰথমটো দিনতে ভাৰোত্তোলনৰ মহিলাৰ 49 কিলোগ্ৰাম শাখাত ৰূপৰ পদক লাভ কৰে মীৰাবাঈ চানুৱে ৷
খেলৰ সময়ত মাতৃয়ে তেওঁক উপহাৰ হিচাপে প্ৰদান কৰা অলিম্পিক ৰিঙৰ সৈতে সাদৃশ্য থকা কাণফুলি পৰিধান কৰিছিল মীৰহাঈ চানুৱে ৷ চানুৱে মুঠ 202 কিলোগ্ৰাম ভাৰ উত্তোলন কৰিছিল (87 কিলোগ্ৰাম+115 কিলোগ্ৰাম) ৷
মণিপুৰৰ ৰাজধানী ইম্ফলৰ পৰা প্ৰায় 20 কিলোমিটাৰ আঁতৰৰ নাংপোক কাকছিং গাঁৱৰ জন্মলাভ কৰা চানুৱে সৰুতে কাষৰ হাবিৰ পৰা কাঠ কাটি ঘৰলৈ কঢ়িয়াই আনিছিল ৷ ইয়াৰ উপৰিও পানীৰ বাবে কাষৰ পুখুৰীৰ পৰা পানী কঢ়িয়াবলগীয়া হৈছিল চানুৱে ৷
2017ৰ world champion গৰাকী প্ৰথমাৱস্থাত ধনুৰ্বিদ হ’ব বিচাৰিছিল ৷ কিন্তু নিয়তিয়ে তেওঁৰ বাবে অন্য পৰিকল্পনাহে প্ৰস্তুত কৰি ৰাখিছিল ৷ মণিপুৰৰ কিংবদন্তি ভাৰোত্তোলক এন. কুঞ্জৰাণী দেৱীৰ বিষয়ে পঢ়ি ভাৰোত্তোলক হিচাপে নিজকে প্ৰস্তুত কৰে মীৰাবাঈ চানুৱে ৷
ৰবি দহিয়া: ৰূপ
হাৰিয়ানাৰ সোণপটৰ 23 বৰ্ষীয় পালোৱান গৰাকীয়ে অলিম্পিকৰ পুৰুষৰ 57 কেজি ফ্ৰিষ্টাইল শাখাত ৰূপৰ পদক লাভ কৰিবলৈ সক্ষম হয় ৷ তেওঁৰ অপৰিসীম শক্তি, মনোবল আৰু টেকনিকেল পাৱাৰে সকলোৰে দৃষ্টি আকৰ্ষণ কৰিবলৈ সক্ষম হৈছে ৷
কৃষক পৰিয়ালত জন্মগ্ৰহণ কৰা দহিয়া দিল্লীৰ ছত্ৰশাল ষ্টেডিয়ামৰ প্ৰশিক্ষাৰ্থী ৷ ইয়াৰ পৰাই দেশে সুশীল কুমাৰ আৰু যোগেশ্বৰ দত্তৰ দৰে অলিম্পিয়ান লাভ কৰিবলৈ সক্ষম হৈছে ৷
2019 চনৰ ৱৰ্ল্ড চেম্পিয়নশ্বিপত ব্ৰঞ্জ মেডেল জয়েৰে দহিয়াই টকিঅ’ অলিম্পিকলৈ যোগ্যতা অৰ্জন কৰিছিল ৷ ইয়াৰ উপৰিও তেওঁ 2020 চনত Asian Championshipতো জয়লাভ কৰাৰ লগে লগেই তেওঁৰ অন্য শিখৰত উপনীত হয় ৷
তেওঁৰ পিতৃয়ে অনুশীলনৰ সময়ছোৱাত প্ৰতিদিনে 60 কিলোমিটাৰ বাট অতিক্ৰম কৰি তেওঁক গাখীৰ আৰু মাখন দিবলৈ আহিছিল যাতে পুত্ৰই সঠিক পুষ্টি লাভ কৰে ৷
পি ভি সিন্ধু: ব্ৰঞ্জ
ভাৰতীয় অলিম্পিক দলটোৰ এগৰাকী শক্তিশালী খেলুৱৈ আছিল পি ভি সিন্ধু আৰু এই কথাকেই সত্য প্ৰমাণিত কৰিলে সিন্ধুৱে ৷ 26 বৰ্ষীয় খেলুৱৈগৰাকীয়ে বেডমিন্টনত ভাৰতক ব্ৰঞ্জৰ পদক প্ৰদান কৰিবলৈ সক্ষম হয় ৷ ৰিঅ’ত ৰূপ দখলৰ পিছতে দ্বিতীয়বাৰৰ বাবে অলিম্পিক পদক লাভ কৰিবলৈ সক্ষম হৈছে সিন্ধুৱে ৷
হায়দৰাবাদৰ খেলুৱৈগৰাকীয়ে 2018 চনত ৱৰ্ল্ড চেম্পিয়নশ্বিপ (world championship), এছিয়ান গেমছ, কমনৱেল্থ গেমছ আৰু এছিয়ান চেম্পিয়নশ্বিপত ব্ৰঞ্জ দখলেৰে সকলোৰে দৃষ্টি আকৰ্ষণ কৰিবলৈ সক্ষম হয় ৷
ভাৰতীয় পুৰুষ হকী দল: ব্ৰঞ্জ
চাৰি দশকজোৰা কষ্ট আৰু হতাশাৰ অৱশেষত অন্ত পৰে যেতিয়া টকিঅ’ত ভাৰতীয় পুৰুষ হকী দলটোৱে ব্ৰঞ্জ আজুৰি আনিবলৈ সক্ষম হয় ৷ প্ৰায় 41 বছৰৰ অন্তত হকীত পদক লাভ কৰিবলৈ সক্ষম হৈছে ভাৰতীয় পুৰষ দলটোৱে ৷
দ্বিতীয়খন খেলত অষ্ট্ৰেলিয়াই 1-7ত পৰাজিত কৰা দলটোৱে মনপ্ৰীত সিঙৰ নেতৃত্বত পুনৰুত্থান কৰিবলৈ সক্ষম হয় ৷ যদিও ছেমি ফাইনেলত শক্তিশালী বেলজিয়ামৰ হাতত পৰাস্ত হয় দলটো কিন্তু ব্ৰঞ্জৰ যুঁজত শেষ বাৰৰ বাবে অৱতীৰ্ণ হৈ দেশক এক গৌৰৱৰ মুহূৰ্ত উপহাৰ দিয়ে দলটোৱে ৷
মনপ্ৰীতে নিজৰ নেতৃত্বৰে দলটোক উৎসাহিত কৰাৰ লগতে, গ’লৰক্ষক পি আৰ শ্ৰীজেশ শৃংখলাত সুন্দৰ প্ৰদৰ্শন আগবঢ়াবলৈ সক্ষম হয় ৷
দলটোৰ খেল দেখি এনে লাগিছিল যেন দলটোৱে জয়ৰ লক্ষ্যত উপনীত হ’ম বুলিয়েই টকিঅ’ত পদাৰ্পন কৰিছে ৷ আনহাতে, ব্ৰঞ্জৰ বাবে হোৱা খেলখনত সুন্দৰ প্ৰদৰ্শনেৰে সকলোৰে দৃষ্টি আকৰ্ষণ কৰিছে সীমৰণজিৎ সিঙে ৷
প্ৰথমাৱস্থাত মুখ্য দলৰ অংশ নাছিল সীমৰণজিৎ ৷ কিন্তু ক’ভিড মহামাৰীৰ বাবে আন্তঃৰাষ্ট্ৰীয় অলিম্পিক কমিটীৰ (International Olympic Committee) অতিৰিক্ত খেলুৱৈ ৰখাৰ সিদ্ধান্তৰ পিছতহে তেওঁক দলত অন্তৰ্ভুক্ত কৰা হয় ৷
লাভলীনা বৰগোঁহাই: ব্ৰঞ্জ
অলিম্পিকত অভিষেক কৰিয়ে দেশৰ বাবে ব্ৰঞ্জ দখল কৰিবলৈ সক্ষম হৈছে লাভলীনাই ৷ অসমৰ গোলাঘাট জিলাৰ বাৰমুখীয়া গাঁৱত জন্মগ্ৰহণ কৰা 23 বৰ্ষীয় বক্সাৰগৰাকীয়ে বক্সিঙলৈ অহাৰ পূৰ্বে তেওঁৰ দুয়োগৰাকী বায়েকৰ দৰে কিক বক্সাৰহে হ’ব বিচাৰিছিল ৷
অলিম্পিকলৈ যাবলগীয়া বক্সিং দলটোৱে বিশেষ প্ৰশিক্ষণৰ বাবে ইউৰোপলৈ যোৱাৰ এদিন পূৰ্বেই ক’ভিডত আক্ৰান্ত হৈছিল লাভলীনা ৷ কিন্তু মহামাৰীয়েও তেওঁক নিজৰ লক্ষ্যত উপনীত হোৱাত বাধা প্ৰদান কৰিব নোৱাৰিলে ৷ কোৱাৰ্টাৰ ফাইনেলত চাইনীজ টাইপেৰ নিয়েন চীন চেনক হৰুৱাই ব্ৰঞ্জ দখল কৰিবলৈ সক্ষম হয় লাভলীনাই ৷
বিজেন্দৰ সিং, মেৰী কমৰ পিছতে দেশৰ হৈ বক্সিঙত অলিম্পিকত পদক লাভ কৰা তৃতীয়গৰাকী বক্সাৰ লাভলীনা ৷
বজৰংগ পুনীয়া: ব্ৰঞ্জ
যদিও বজৰং পুনীয়াই অলিম্পিকত স্বৰ্ণ জয়েৰে দেশৰ প্ৰথমগৰাকী মল্লযোদ্ধা হোৱাৰ সপোন সাৰ্থক কৰিব নোৱাৰিলে কিন্তু তেওঁ টকিঅ’ত ভাৰতৰ হৈ লাভ কৰিলে ব্ৰঞ্জৰ পদক ৷ সৰুৰে পৰা মল্লযুদ্ধৰ প্ৰতি আকৰ্ষিত আছিল বজৰংগ পুনীয়া ৷ আৰু নহবওনো কিয় মল্লযুদ্ধ তেওঁৰ তেজত আছে ৷ তেওঁৰ পিতৃ আৰু ডাঙৰ ককায়েকো মল্লযুঁজাৰু ৷
সৰুৰে পৰাই বজৰংগে যি বিচাৰিছিল সেয়া কেৱল আছিল ‘মল্লযুদ্ধ’ ৷ এবাৰ তেওঁ দংগলত নামিছিল ৷ সেই সময়ত তেওঁৰ ওজন আছিল 38 কেজি আৰু প্ৰতিযোগিতাখনি আছিল 60 কেজি শাখাৰ ৷
কিন্তু এই খেলখনতে নিজৰ বিৰোধীক ধৰাশায়ী কৰি নিজৰ লক্ষ্যৰ প্ৰমাণ দিছিল পুনীয়াই ৷
সেইসকল যাৰ বাবে টকিঅ’ত পদক লাভৰ সপোন কাষলৈ আহিও আঁতৰতে থাকি ৰ’ল:
ভাৰতীয় মহিলা হকী দল
2016ত ৰিঅ’ অলিম্পিকত শেষৰ স্থানত থকা ভাৰতীয় মহিলা হকী দলটোৱে টকিঅ’ত চতুৰ্থ স্থান দখলেৰে সুন্দৰ প্ৰত্যাৱৰ্তন কৰে ৷ যদিও দলটোৰ বাবে অলিম্পিকত প্ৰথমটো স্বৰ্ণ জয়ৰ সপোন আধৰুৱা হৈ ৰয় কিন্তু মহিলা হকী দলোটৱে পুনৰ এক নতুন আশাৰ সঞ্চাৰ কৰে দেশৰ ক্ৰীড়াপ্ৰেমীসকলৰ মনত ৷
ধাৰাবাহিকভাৱে তিনিখনকৈ মেছত পৰাজিত হোৱা দলটোক সকলোৱে দুৰ্বল হিচাপে ধৰি লৈছিল ৷ কিন্তু আয়াৰলেণ্ডৰ বিৰুদ্ধে অৱতীৰ্ণ হোৱা খেলখনত ৰাণী ৰামপাল আৰু নৱনিত কৌৰৰ প্ৰদৰ্শনে ভাৰতীয় মহিলা হকী দলটোৰ কোৱাৰ্টাৰ ফাইনেলৰ সপোনটো পুনৰ জাগ্ৰত কৰে ৷
দক্ষিণ আফ্ৰিকাক হৰুৱাই দলটোৱে কোৱাৰ্টাৰ ফাইনেলত নিজৰ স্থান চূড়ান্ত কৰিবলৈ সক্ষম হয় ৷ ইয়াৰ পিছতে কোৱাৰ্টাৰ ফাইনেলত শক্তিশালী অষ্ট্ৰেলিয়াক পৰাজিত কৰি সকলোকে নিজৰ অস্তিত্ব উচ্চস্বৰে প্ৰকাশ কৰে দলটোৱে ৷
ছেমি ফাইনেলত পৰাজিত হ’লেও টকিঅ’ৰ প্ৰদৰ্শনেৰে দলোটোৱে ইতিহাসত নিজৰ নাম খোদিত কৰিবলৈ সক্ষম হ’ল ৷
দীপক পুনীয়া
ছেমি ফাইনেলৰ যুদ্ধত মাত্ৰ 10 ছেকেণ্ডৰ ব্যৱধানত পদকৰ লাভৰ সপোন সাৰ্থক কৰিবলৈ সক্ষম নহ’ল দীপক পুনীয়াই ৷ কিন্তু অলিম্পিকত অভিষেক কৰিয়ে ফ্ৰী-ষ্টাইলৰ 86 কেজি শাখাৰ ব্ৰঞ্জৰ প্লে-এফ (Play-Off) খেলখনত নিজৰ প্ৰতিভাৰ চমক দাঙি ধৰিবলৈ সক্ষম হয় 22 বৰ্ষীয় খেলুৱৈগৰাকীয়ে ৷
মল্লযুদ্ধ দীপকৰ বাবে পৰিয়াল পোহপাল দিয়া আৰু পৰিয়ালৰ সদস্যৰ বাবে আহাৰ যোগানৰ এটি পথহে আছিল ৷ কাৰণ এই খেলৰ দ্বাৰাই তেওঁ এটি চাকৰি যোগাৰ কৰিবলৈ সক্ষম হ’ব ৷ 2016 চনত তেওঁক ভাৰতীয় সেনাত চিপাহীৰ চাকৰি প্ৰদান কৰা হয় যদিও তেওঁক অলপতে সন্তুষ্ট নহৈ ডাঙৰ সপোন দেখিবলৈ উৎসাহিত কৰা হয় ৷
পুনীয়াই দুবাৰৰ অলিম্পিক মেডেলিষ্ট সুশীল কুমাৰৰ উপদেশ গ্ৰহণ কৰে আৰু এই মল্লযুঁজত নিজকে আগুৱাই নিয়াৰ বাবে কঠোৰ পৰিশ্ৰম কৰিবলৈ আৰম্ভ কৰে ৷
তেওঁ 2016 চনত World Cadet championৰ খিতাপ দখল কৰে আৰু 2019 চনত junior World খিতাপ দখল কৰিবলৈ সক্ষম হয় ৷ এই খিতাপ দখল কৰা চতুৰ্থগৰাকী ভাৰতীয় হ’ল দীপক পুনীয়া ৷
আদিতী অশোক
আদিতী অশোকে সমগ্ৰ দেশৰে কল্পনা দখল কৰে যেতিয়া ক্ৰীড়াপ্ৰেমী সকলে গ’ল্ফ চাবলৈ বাবে নিজ নিজ টিভি ৰিমোট হাতত তুলি লয় আৰু খেলবিধক অনুধাৱনৰ চেষ্টা কৰে ৷
সমগ্ৰ বিশ্বৰ গ’ল্ফ খেলুৱৈসকলৰ তালিকাত 200 নম্বৰ স্থানত থকা বেংগালুৰুৰ খেলুৱৈগৰাকীয়ে অলিম্পিকত বিশ্বৰ সৰ্বশ্ৰেষ্ঠ খেলুৱৈসকলক প্ৰত্যাহ্বান জনায় ৷ ইমান দূৰ আগবঢ়ি আহিও অলিম্পকত পদক জয়ৰ সপোন আধাতে সমাপ্ত হয় 23 বৰ্ষীয় খেলুৱৈগৰাকীৰ যেতিয়া তেওঁ চতুৰ্থ স্থানত এই যাত্ৰা সমাপ্ত কৰিবলগীয়া হয় ৷
5 বছৰ বয়সৰ পৰাই গ’ল্ফ খেলিবলৈ আৰম্ভ কৰিছিল আদিতীয়ে ৷ 2016ৰ ৰিঅ’ অলিম্পিকত 41 নম্বৰ স্থানতে সন্তুষ্ট থাকিবলগীয়া হৈছিল আদিতী ৷ ৰিঅ’ত সকলোতকৈ সৰু গ’ল্ফ খেলুৱৈ আছিল আদিতী ৷
ৰিঅ’ত তেওঁৰ কেডী (caddie) হিচাপে তেওঁৰ পিতৃ আছিল ইয়াৰ বিপৰীতে টকিঅ’ত আছিল তেওঁৰ মাতৃ ৷
লগতে পঢ়ক: Tokyo 2021: প্ৰথমটো স্বৰ্ণ জয়েৰে ইতিহাস ৰচিলে নীৰজ চোপ্ৰাই
