তেজপুৰ, ২৩ জুন : এছ’চিয়েশ্যন অব্ মেইটেইছ ইন দ্য আমেৰিকাছ (এ এম এ)-এ শুকুৰবাৰে ৱাশ্বিংটন ডি.চি.ৰ স্মৃতিসৌধত মণিপুৰৰ হিংসাত্মক ঘটনাৰ বিৰুদ্ধে প্ৰতিবাদ সাব্যস্ত কৰে । ৰাজ্যখনত বৰ্তমানেও অব্যাহত থকা হিংসাৰ বিৰুদ্ধে প্ৰতিবাদ সাব্যস্ত কৰি তেওঁলোকে এক ঐক্যবদ্ধ ফ্ৰণ্ট হিচাবে থিয় হৈ কয় - "মণিপুৰখন ভাৰতৰ অন্তৰ্গত ৷ যি আমাৰ প্ৰিয় জন্মস্থান তথা মাতৃভূমি" ।
"এই শান্তিপূৰ্ণ প্ৰতিবাদৰ লগত সংগতি ৰাখি প্ৰতিবাদকাৰী সকলে কয় যে প্ৰধানমন্ত্ৰী মোদীৰ এই আমেৰিকা ভ্ৰমণ লেণ্ডমাৰ্ক হিচাবে বিবেচিত, যাৰ জৰিয়তে আমেৰিকা আৰু ভাৰতৰ সম্পৰ্ক অধিক সুদৃঢ় হ'ব"- এই ইতিবাচক মন্তব্য প্ৰদান কৰিয়েই প্ৰধানমন্ত্ৰীগৰাকীৰ আমেৰিকা ভ্ৰমণৰ সময়তে তাত থকা মণিপুৰীসকলে প্ৰতিবাদত অংশগ্ৰহণ কৰে ।
মুঠ ১০ গৰাকী শিশুকে ধৰি ৭০ গৰাকীতকৈও অধিক Meitei অংশগ্ৰহণকাৰীয়ে এই প্ৰতিবাদ সাব্যস্ত কৰে ৷ আমেৰিকাৰ বিভিন্ন অঞ্চল যেনে ভাৰ্জিনিয়াৰ মেৰিলেণ্ড, নিউয়ৰ্ক আৰু নিউ জাৰ্চিৰ বহুলোকে ৱাশ্বিংটন ডি.চি.ৰ প্ৰতিবাদী কাৰ্যসূচীত অংশগ্ৰহণ কৰে ।
অনুষ্ঠানটোৰ মুখপাত্ৰ ডাঃ কেইশ্বামে কয়, "আমি আজি আমাৰ দেশৰ প্ৰধানমন্ত্ৰী নৰেন্দ্ৰ মোদীক মণিপুৰত শান্তি ঘূৰাই আনিবলৈ অনুৰোধ জনাইছোঁ ৷ আজি এটা উল্লেখযোগ্য দিন, কিয়নো বিশ্বৰ দুখন বৃহৎ ডেম’ক্ৰেটিক দেশ, আমেৰিকা আৰু ভাৰতৰ মধুৰ সম্পৰ্ক শক্তিশালী কৰিবলৈ বৈঠকত মিলিত হৈছে” ৷
ডাঃ কেইশ্বামে পুনৰ উল্লেখ কৰে যে, “আমি এই সুযোগতে সমগ্ৰ বিশ্বক অনুৰোধ কৰিব বিচাৰিছোঁ যে - ভাৰতৰ মণিপুৰত কি হৈ আছে সকলোৱে জানিব লাগে । আমি সকলো মিডিয়া হাউছক মণিপুৰলৈ শান্তি ঘূৰাই অনাৰ ক্ষেত্ৰত সহযোগিতা আগবঢ়াবলৈ আৰু পুনৰ নিৰ্মাণত মনোনিৱেশ কৰিবলৈ আহ্বান জনাইছোঁ । আমি এতিয়া শান্তি বিচাৰোঁ, কাৰণ আমাৰ মণিপুৰত শান্তিৰ প্ৰয়োজন" ৷
লগতে পঢ়ক : Manipur Violence : মণিপুৰৰ দুখন গাঁৱত বন্দুকধাৰীৰ গুলীচালনা
