ইন্টাৰনেশ্যনেল ডেস্ক, ২০ নৱেম্বৰ : আমেৰিকাৰ প্ৰাক্তন ফাৰ্ষ্ট লেডী আৰু নাই ৷ ৯৬ বছৰ বয়সত শেষ নিশ্বাস ত্যাগ কৰে আমেৰিকাৰ প্ৰাক্তন ফাৰ্ষ্ট লেডী তথা মানসিক স্বাস্থ্য কৰ্মী ৰোজালিন কাৰ্টাৰে । ৰোজালিনে মানসিক স্বাস্থ্য সংস্কাৰৰ বাবে অক্লান্তভাৱে কাম কৰিছিল ৷

তেওঁৰ স্বামী আমেৰিকাৰ প্ৰাক্তন ৰাষ্ট্ৰপতি জিমি কাৰ্টাৰে এক বিবৃতিত কয়, ‘‘মই এতিয়ালৈকে লাভ কৰা সকলো কামতে ৰোজালিন মোৰ সমান অংশীদাৰ আছিল’’ । তেওঁ আৰু কয়, ‘‘মোৰ প্ৰয়োজনৰ সময়ত তেওঁ মোক বুদ্ধিমান দিহা-পৰামৰ্শ আৰু উৎসাহ দিছিল । ৰোজালিন যেতিয়ালৈকে এই পৃথিৱীত আছিল, মই সদায় জানিছিলোঁ যে কোনোবাই মোক ভাল পায় আৰু মোক সমৰ্থন কৰে বুলি’’ ।

আমেৰিকাৰ ৰাষ্ট্ৰপতি পদৰ আটাইতকৈ দীৰ্ঘদিনীয়া দম্পতী কাৰ্টাৰ পৰিয়ালে জুলাই মাহত তেওঁলোকৰ বিবাহৰ ৭৭ বছৰীয়া বিবাহবাৰ্ষিকী উদযাপন কৰিছিল । মানৱীয় আৰু মানসিক স্বাস্থ্যৰ অধিবক্তা ৰোজালিন কাৰ্টাৰে ৰাষ্ট্ৰপতিত্বৰ পিচত তেওঁৰ স্বামীৰ সৈতে বিশ্বৰ শান্তি আৰু স্বাস্থ্যক আগুৱাই নিয়াৰ বাবে কাৰ্টাৰ চেণ্টাৰৰ সহ-প্ৰতিষ্ঠা কৰিছিল ।

দুয়ো মিলি বিশ্বৰ হটস্পটলৈ যাত্ৰা কৰিছিল । ইয়াৰ ভিতৰত আছিল কিউবা, চুডান আৰু উত্তৰ কোৰিয়া ভ্ৰমণ, নিৰ্বাচন নিৰীক্ষণ কৰা, গিনি কৃমি ৰোগ আৰু অন্যান্য অৱহেলিত গ্রীষ্মমণ্ডলীয় ৰোগসমূহ দূৰ কৰাৰ বাবে কাম কৰা ৷ ২০০২ চনত জিমি কাৰ্টাৰক শান্তিৰ নোবেল বঁটাৰে সন্মানিত কৰা হয় ।

CNN ৰ মতে, ১৯৭৭ চনৰ পৰা ১৯৮১ চনলৈকে স্বামীৰ ৰাষ্ট্ৰপতিত্বৰ সময়ছোৱাত হোৱাইট হাউছৰ এগৰাকী গুৰুত্বপূৰ্ণ আৰু প্ৰভাৱশালী ব্যক্তি হিচাপে ৱাটাৰগেট কেলেংকাৰীৰ পিচত ৰাষ্ট্ৰপতি পদৰ ওপৰত ৰাষ্ট্ৰৰ আস্থা ঘূৰাই অনাত ৰোজালিন কাৰ্টাৰে গুৰুত্বপূৰ্ণ ভূমিকা পালন কৰিছিল ।

লগতে পঢ়ক : বিশ্বকাপ ২০২৩ : বিৰাটলৈ প্লেয়াৰ অৱ দা মেছৰ খিতাপ