ইণ্টাৰনেচনেল ডেস্ক, ১৫ আগষ্ট : চীনা প্ৰশাসনৰ কৌশলী সিদ্ধান্ত । চীন চৰকাৰে দেশখনৰ যুৱ নিবনুৱাৰ তথ্য প্ৰকাশ কৰাটো বন্ধ কৰিছে । এই পৰিপ্ৰেক্ষিতত কিছুমানে এয়া দেশখনৰ মন্দাৱস্থাৰ এক মুখ্য লক্ষণ হিচাপে গণ্য কৰিছে । "এই সিদ্ধান্ত বিশ্বৰ দ্বিতীয় সৰ্ববৃহৎ অৰ্থনীতি আৰু ইয়াৰ সমাজৰ পৰিৱৰ্তনৰ বাবে লোৱা হৈছে ।" এজন চৰকাৰী মুখপাত্ৰই এই কথা কয় । উল্লেখ্য যে বিগত জুন মাহত চীনৰ নগৰাঞ্চলত ১৬-ৰ পৰা ২৪ বছৰীয়া লোকৰ নিবনুৱাৰ হাৰ ২০ শতাংশতকৈও অধিক অভিলেখ উচ্চতাত উপনীত হৈছিল ।
আনহাতে, চীনৰ কেন্দ্ৰীয় বেংকেও মঙলবাৰে বিকাশ বৃদ্ধিৰ প্ৰচেষ্টাত ঋণ লোৱাৰ ব্যয় হ্ৰাস কৰে । মঙলবাৰে প্ৰকাশিত চৰকাৰী তথ্যই দেখুৱাইছে যে জুলাইত চীনৰ নিবনুৱাৰ হাৰ ৫.৩ শতাংশলৈ বৃদ্ধি পাইছে । একে সময়তে চৰকাৰে কৈছে যে তেওঁলোকে যুৱ নিবনুৱাৰ তথ্য প্ৰকাশ সাময়িকভাৱে স্থগিত ৰাখিব । কিন্তু নিলম্বনৰ বাবে কোনো সময়সীমা দিয়া নাই বুলি বিবিচিয়ে প্ৰকাশ কৰিছে ।
চীনৰ ৰাষ্ট্ৰীয় পৰিসংখ্যা ব্যুৰোৰ (এনবিএছ) এজন মুখপাত্ৰই কয় যে যুৱসকলৰ মাজত নিবনুৱাৰ সংখ্যা গণনাৰ পদ্ধতিটো পুনৰ বিবেচনা কৰাৰ প্ৰয়োজন আছে । "অৰ্থনীতি আৰু সমাজ নিৰন্তৰ বিকশিত আৰু পৰিৱৰ্তনশীল হৈ আছে । পৰিসাংখ্যিক কামত নিৰন্তৰ উন্নতিৰ প্ৰয়োজন আছে ।" মুখপাত্ৰজনে কয় ।
ইফালে ফুয়ে ইংগিত দিছে যে ১৬-ৰ পৰা ২৪ বছৰ বয়সৰ শিক্ষাৰ্থীৰ সংখ্যা বৃদ্ধিয়ে নিবনুৱাৰ সংখ্যাক প্ৰভাৱিত কৰিছে । কিন্তু চীনে কেতিয়াও শিক্ষা গ্ৰহণ কৰাসকলক নিবনুৱা হিচাপে গণ্য কৰা নাই । উল্লেখ্য যে চীনে ২০১৮ চনত যুৱ নিবনুৱা পৰিসংখ্যা প্ৰকাশ কৰা আৰম্ভ কৰিছিল । অৱশ্যে চৰকাৰে বৰ্তমান গ্ৰাম্য অঞ্চলত যুৱসকলৰ নিযুক্তিৰ স্থিতিৰ তথ্য প্ৰকাশ নকৰে । বিবিচিৰ প্ৰতিবেদন অনুসৰি, এই ঘোষণা এনে এক সময়ত আহিছে, যেতিয়া মহামাৰীৰ পিছত দেশখনত অৰ্থনৈতিক পুনৰুদ্ধাৰ হ্ৰাস পাইছে ।
