তিনিচুকীয়া/নগাঁও, 24 নৱেম্বৰ : ৰন্ধন গেছ, পেট্ৰ’ল-ডিজেলকে ধৰি অত্যাৱশ্যকীয় খাদ্য সামগ্ৰীৰ আকাশলংঘী মূল্যবৃদ্ধিৰ প্ৰতিবাদ(Protest against price hike) মঙলবাৰে তিনিচুকীয়াৰ মাকুমত মাকুম আঞ্চলিক ছাত্ৰ সন্থাই বিক্ষোভ কাৰ্যসূচী ৰূপায়ণ কৰে । দিনকদিনে অত্যাৱশ্যকীয় সামগ্ৰীসমূহৰ দাম বৃদ্ধি হৈ আছে যদিও, যোগান বিভাগে মূল্য বৃদ্ধি ৰোধৰ ক্ষেত্ৰত সম্পূৰ্ণ বিফল হোৱাৰ অভিযোগ কৰি এই প্ৰতিবাদ সাব্যস্ত কৰে মাকুম আঞ্চলিক ছাত্ৰ সন্থাই ৷
মাকুম আঞ্চলিক ছাত্ৰ সন্থাই নগৰখনৰ মাজমজিয়াত ৰাজ্যিক পেট্ৰ'লিয়াম মন্ত্ৰী ৰামেশ্বৰ তেলী আৰু অসম চৰকাৰৰ যোগান মন্ত্ৰী ৰণজিৎ কুমাৰ দাসৰ পুত্তলিকা দাহ(Effigu burn by makum AASU) কৰি তীব্ৰ প্ৰতিবাদ সাব্যস্ত কৰে । এই প্ৰতিবাদী কাৰ্যসূচীত মাকুম আঞ্চলিক ছাত্ৰ সন্থাৰ লগতে মাকুমৰ স্থানীয় কেইবাটাও জাতীয়-জনগোষ্ঠীয় ছাত্ৰ সংগঠন আৰু স্থানীয় ৰাইজে অংশ লয় ৷
প্ৰতিবাদকাৰীসকলে অতি শীঘ্ৰে ৰন্ধন গেছকে ধৰি আন সামগ্ৰীৰ বৰ্ধিত মূল্য হ্ৰাস নকৰিলে ৰাইজৰ সহযোগত ব্যাপক জংগী আন্দোলন গঢ়ি তোলাৰ হুংকাৰ দিয়ে ৷
আনহাতে, নগাঁৱৰ দলংঘাট উন্নয়ন খণ্ডৰ কাৰ্যালয়ৰ সন্মুখতো মঙলবাৰে সদৌ অসম প্ৰগতিশীল নাৰী সন্থা আৰু সদৌ অসম গ্ৰামীণ শ্ৰমিক সন্থাই যৌথভাৱে দুঘণ্টীয়া প্ৰতিবাদী কাৰ্যসূচী ৰূপায়ণ কৰে ৷ সংগঠন দুটাই আকাশলংঘী মূল্যবৃদ্ধি ৰোধৰ দাবীত(Protest against price hike) প্ৰতিবাদস্থলীৰ পৰা খণ্ড উন্নয়ন বিষয়াৰ জৰিয়তে ৰাজ্যপাললৈ এখন স্মাৰক পত্ৰ প্ৰেৰণ কৰে ।
লগতে পঢ়ক : বজাৰত মূল্য বৃদ্ধিৰ জুই; চৰকাৰক নিদ্ৰাৰ পৰা জগাবলৈ আছুৰ গণ সত্যাগ্ৰহ
