কলিয়াবৰ, 4 ছেপ্তেম্বৰ: ভাদ মাহৰ অন্ত পৰাৰ লগে-লগে আহিনৰ আগমন ঘটিব । আহিনে শৰতৰ বাতৰি আনে ৷ শৰৎ মানেই পূজাৰ বতৰ (Sharadiya festival in Assam)। তাৰ লগে লগে ব্যস্ততা বাঢ়ে মৃণ্ময় শিল্পীসকলৰ । কলিয়াবৰতো দেখা গৈছে তেনে এক ব্যস্ততাপূৰ্ণ পৰিৱেশ । বিগত ২৯ বছৰ ধৰি এই শিল্প কৰ্মৰ সৈতে জড়িত হৈ আহিছে কলিয়াবৰৰ নাগশংকৰ গাঁৱৰ প্ৰসিদ্ধ মৃণ্ময় শিল্পী ধীৰেন বৰঠাকুৰ (Potters busy with making idols at Kaliabor) ।
মৃণ্ময় শিল্প জীয়াই ৰখাৰ স্বাৰ্থত শিল্পীগৰাকী ব্যস্ত হৈ পৰিছে মনসা দেৱী, গণেশ, বিশ্বকৰ্মাৰ মূৰ্তি নিৰ্মাণত । ক'ভিড সৃষ্ট পৰিৱেশৰ বাবে বিগত দুটা বছৰৰ জটিলতাৰ ইতিমধ্যে অন্ত পৰিছে । পূজা-পাৰ্ৱন অনুষ্ঠিত কৰাৰ এক পৰিৱেশে পুনৰ বিৰাজ কৰিছে । সেয়ে বিভিন্ন অনুষ্ঠান-প্ৰতিষ্ঠান-ব্যক্তিৰ আগতীয়া যোগাযোগৰ প্ৰতি লক্ষ্য ৰাখি মনসা, গণেশ, বিশ্বকৰ্মাৰ মূৰ্তি নিৰ্মাণত ব্যস্ত হৈ পৰিছে শিল্পীগৰাকী ।
দেৱ-দেৱীৰ মূৰ্তি নিৰ্মাণেৰে সমাদৃত হোৱা প্ৰসিদ্ধ মৃণ্ময় শিল্পী ধীৰেন বৰঠাকুৰৰ খনিকৰ শালত এইবাৰ দুৰ্গা প্ৰতিমাৰ নিৰ্মাণ কৰা নাই । ইয়াৰ মূলতে সহায়কাৰী কৰ্মীৰ অভাৱ আৰু শাৰীৰিক অসুস্থতা বুলি জানিবলৈ দিয়ে শিল্পীগৰাকীয়ে । উল্লেখ্য যে, শিল্পী ধীৰেণ বৰঠাকুৰৰ এনে সৃষ্টিমূলক কৰ্মত উদগনি যোগাবলৈ অসম চৰকাৰে ৫০ হাজাৰ টকাৰ এককালীন সাহায্য আগবঢ়াইছে ।
কিন্তু বয়স বাঢ়ি অহাৰ লগে-লগে শাৰীৰিক আৰু মানসিকভাৱে কিছু জটিলতা আহি পৰিছে শিল্পীগৰাকীৰ ৷ ৰাজ্য চৰকাৰৰ পৰা আগবঢ়োৱা শিল্পী পেঞ্চনটো লাভ কৰিলে এক নিৰ্ভয় জীৱন যাপন কৰিবলৈ সক্ষম হ'ব বুলি আশা প্ৰকাশ কৰে শিল্পীগৰাকীয়ে । ঔদ্যোগিক প্ৰশিক্ষণপ্ৰাপ্ত 'ইলেক্ট্ৰিচিয়ান' ৰূপে আনুষ্ঠানিক কৰ্মৰ পৰা অব্যাহতি লৈ মৃণ্ময় মূৰ্তি নিৰ্মাণত ব্যস্ত থকা ধীৰেন বৰঠাকুৰৰ শিল্পটো যাতে কোনো আগ্ৰহীয়ে আঁকোৱালি লয় তাৰেই আশাত বন্দী তেওঁ ।
লগতে পঢ়ক: বগৰীগুৰিত পথ দুৰ্ঘটনাত নিহত তিনিজন, আহত দুজন
