নেশ্যনেল ডেস্ক, 11 নৱেম্বৰ: দিল্লী-জয়পুৰ ঘাইপথত শোকাৱহ দুৰ্ঘটনা ৷ গুৰুগ্ৰামৰ সিদ্ধৰাৱলী গাঁৱৰ সমীপত শুকুৰবাৰৰ নিশা এখন তেল টেংকাৰে এখন গাড়ী আৰু এখন পিকআপ ভানত খুন্দা মৰাৰ ফলত কমেও চাৰিজন লোকৰ মৃত্যু ঘটে । জানিব পৰা মতে, এখন গাড়ীত খুন্দা মৰাৰ পিছতে তীব্ৰ বেগী তেল টেংকাৰখনে ঘাইপথত থকা এখন পিকআপ ভানক খুন্দা মাৰে ৷ ইয়াৰ ফলত ভানখনৰ চালকজনে কৰুণভাৱে মৃত্যু সাৱটিবলগীয়া হয় ৷
বিলাসপুৰ আৰক্ষী থানাৰ তদন্তকাৰী বিষয়া বিনোদ কুমাৰে জনোৱা মতে, জয়পুৰৰ পৰা অহা এখন তীব্ৰ বেগী তেল টেংকাৰে ডিভাইডাৰ ভাঙি এখন গাড়ীত খুন্দা মাৰে । বাহনখনৰ ভিতৰত থকা যাত্ৰীসকল সম্ভৱতঃ জয়পুৰলৈ গৈ আছিল বুলি আৰক্ষীয়ে জানিবলৈ দিয়ে । গাড়ীখনৰ ভিতৰত থকা চিএনজি চিলিণ্ডাৰৰ বাবেই জুই সম্প্ৰসাৰিত হৈ পৰে বুলি সন্দেহ প্ৰকাশ কৰা হৈছে ।
এই সংঘৰ্ষৰ ফলত হোৱা অগ্নিকাণ্ডৰ ফলত তিনিজন যাত্ৰীৰ মৃত্যু ঘটে । আৰক্ষীয়ে জনোৱা মতে, গাড়ীখনত খুন্দা মৰাৰ পিছত তেল টেংকাৰখনে ঘাইপথত এখন পিকআপ ভানক খুন্দা মাৰে, যাৰ ফলত ভানখনৰ চালকজনৰ থিতাতে মৃত্যু ঘটে ।
তদন্তকাৰী বিষয়াগৰাকীয়ে কয়, "দিল্লী-জয়পুৰ ঘাইপথত সংঘটিত হোৱা দুৰ্ঘটনাটোৰ সন্দৰ্ভত আমি তথ্য লাভ কৰিছিলো । সেই স্থানত উপস্থিত হোৱাৰ সময়ত আমি দেখিছিলো যে এখন গাড়ীত জুই লাগিছে আৰু তিনিজন লোকৰ মৃত্যু ঘটিছে । পিছত আমি গম পালো যে তেল টেংকাৰখনে খুন্দিয়াইছে । তেল টেংকাৰখনে খুন্দিওৱাৰ বাবেই ভানখনৰ চালকজনৰ থিতাতে মৃত্যু ঘটে ।'
তেল টেংকাৰৰ চালকজনে ঘটনাস্থলীৰ পৰা পলায়ন কৰে ৷ চালকজনক কৰায়ত্ত কৰিবৰ বাবে চেষ্টা অব্যাহত আছে বুলি জানিব পৰা গৈছে ।
লগতে পঢ়ক: Fire breaks out in passenger bus: যাত্ৰীবাহী বাছত হোৱা অগ্নিকাণ্ডৰ ফলত মৃত্যু এজন, আহত 30
