নেশ্যনেল ডেস্ক, 20 জুন : পাটিয়ালাৰ ক্ৰীড়া বিশ্ববিদ্যালয়ত (Patiala sports university) থাকিব ক্ৰীড়া তাৰকা মিলখা সিঙৰ (Milkha Sing) নামত বিশেষ আসন । বিশিষ্ট ক্ৰীড়াবিদ গৰাকীৰ স্মৃতিৰক্ষাৰ বাবে এই গুৰুত্বপূৰ্ণ ঘোষণা পঞ্জাৱৰ মুখ্যমন্ত্ৰী কেপ্টেইন অমৰিন্দৰ সিঙৰ (Amrindar Sing) । মহান ক্ৰীড়াবিদ গৰাকীৰ মৃত্যুত গভীৰ শোক প্ৰকাশ কৰাৰ লগতে মুখ্যমন্ত্ৰীগৰাকীয়ে কয় যে, তেওঁক পঞ্জাৱত ৰাজ্যিক অন্ত্যেষ্টিক্ৰিয়া প্ৰদান কৰিছে । লগতে তেওঁ ৰাজ্যজুৰি এদিনৰ বন্ধ ঘোষণা কৰে ।
এইটো সকলোৰে বাবে এক ডাঙৰ ক্ষতি বুলিও তেওঁ উল্লেখ কৰে মন্ত্ৰীগৰাকীয়ে । তেওঁ আশাবাদী যে যুৱ প্ৰজন্ম মিলখা সিঙৰ (Milkha Sing) দ্বাৰা অনুপ্ৰাণিত হ'ব । ইয়াৰ পূৰ্বে শনিবাৰে মুখ্যমন্ত্ৰীয়ে স্বৰ্গীয় মিলখা সিঙৰ চণ্ডীগড়ৰ বাসগৃহলৈ গৈছিল আৰু তেওঁৰ পৰিয়ালক সাক্ষাৎ কৰিছিল ।
আনকি মৃত্যুৰ পিছতে মুখ্যমন্ত্ৰীগৰাকীয়ে টুইট কৰি শোক প্ৰকাশ কৰি লিখিছিল যে মিলখা সিঙৰ (Milkha Sing) মৃত্যুৰ কথা শুনি তেওঁ দুখিত হৈছে । এইটোৱে এটা যুগৰ সমাপ্তি হোৱা দেখুৱাই আৰু ভাৰতৰ লগতে পঞ্জাৱ আজি তেওঁ অবিহনে নিঠৰুৱা বুলিও উল্লেখ কৰে । শোকসন্তপ্ত পৰিয়াল আৰু লাখ লাখ অনুৰাগীলৈ তেওঁ সমবেদনা জ্ঞাপন কৰিছিল ।
উল্লেখ যে কৰ'ণাত (Corona) আক্ৰান্ত হোৱাৰ পিছত মিলখা সিং (Milkha Sing) দীৰ্ধদিন ধৰি চিকিৎসাধীন হৈ আছিল । কৰ'ণাৰ পৰা কিছু আৰোগ্য হৈ তেওঁ ঘৰলৈ উভটিছিল যদিও পুনৰ স্বাস্থ্যৰ অৱনতি হোৱাত তেওঁক PGIMER হাস্পতালত যোৱা ৩ জুনত ভৰ্তি কৰোৱা হয় । কিন্তু চিকিৎসকৰ অশেষ প্ৰচেষ্টা স্বত্তেও শুকুৰবাৰে তেওঁ ইহলীলা সম্বৰণ কৰে । ইফালে কৰ'ণাত আক্ৰান্ত হৈ পত্নী তথা প্ৰাক্তন ৰাষ্ট্ৰীয় ভলীবল খেলুৱৈ নিৰ্মল কৌৰে কিছুদিন পূৰ্বে মৃত্যুমুখত পৰিছে ।
তাৰকা খেলুৱৈ গৰাকীয়ে ৪ বাৰকৈ এছিয়ান গেমছত(Asian games) ভাৰতৰ হৈ প্ৰতিদ্বন্দিতা কৰি সোণৰ পদক অৰ্জন কৰিবলৈ সক্ষম হৈছিল । ১৯৫৮ কমনৱেলথ গেমছৰ তেওঁ চেম্পিয়ন আছিল । তেওঁক পদ্মশ্ৰী সন্মানেৰে সন্মানিত কৰাও হৈছে ।
মিলখা সিঙৰ মৃত্যুৰ লগে লগে বিভিন্ন প্ৰান্তৰ পৰা মহান খেলুৱৈ গৰাকীৰ আত্মাৰ সদগতিৰ বাবে শোকবাৰ্তা প্ৰেৰণ কৰিছে বহুজনে ।
লগতে পঢ়ক:চণ্ডীগড়ত অনুষ্ঠিত হ'ব মিলখা সিঙৰ অন্ত্যেষ্টিক্ৰিয়া
