নিউজ ডেস্ক, ১৭ মে' : নিষিদ্ধ সংগঠন কাংলেইপাক কমিউনিষ্ট পাৰ্টীৰ (পিপ'ল ৱাৰ গ্ৰুপ) চাৰিজন উগ্ৰপন্থীক মণিপুৰত গ্ৰেপ্তাৰ । মণিপুৰৰ থৌবাল জিলাত মণিপুৰ আৰক্ষী আৰু অসম ৰাইফলছে চলোৱা এক সমন্বিত অভিযানৰ সময়ত উগ্ৰপন্থীকেইজনক গ্ৰেপ্তাৰ কৰা বুলি এজন আৰক্ষী বিষয়াই শুকুৰবাৰে কয় ।
আৰক্ষী বিষয়াজনে কয়, "উগ্ৰপন্থীৰ উপস্থিতি সম্পৰ্কে লাভ কৰা চোৰাংচোৱা তথ্যৰ ওপৰত ভিত্তি কৰি য়াইৰিপোক বজাৰ অঞ্চলত এক সমন্বিত অভিযান আৰম্ভ কৰা হৈছিল । উক্ত অভিযানতে বৃহস্পতিবাৰে উগ্ৰপন্থীকেইজনক গ্ৰেপ্তাৰ কৰা হয় ।"
বিষয়াজনে লগতে কয় যে গ্ৰেপ্তাৰ কৰা উগ্ৰপন্থীকেইটাৰ পৰা পাঁচটা মোবাইল হেণ্ডছেট, ১৫ ৰাউণ্ড সজীৱ গুলীৰে সৈতে দুটা ৯ এম এম পিষ্টল, পাঁচখন ধনদাবী পত্ৰ, ২০ টা ২০.৫৬ মিমি চাৰিটা ৭.৬২ মিমি অস্ত্ৰ জব্দ কৰা হৈছে । আনহাতে, আৰক্ষীয়ে বৃহস্পতিবাৰে ইম্ফল পশ্চিম জিলাৰ পৰা কেচিপি (টাইবাঙ্গানবা) সংগঠনটোৰ এজন সক্ৰিয় সদস্যকো আটক কৰে ।
গ্ৰেপ্তাৰ কৰা উগ্ৰপন্থীজন ইম্ফল অঞ্চলৰ পাওনা আৰু থাংগল বজাৰত অৱস্থিত দোকানৰ পৰা ধনদাবীৰ সৈতে জড়িত আছিল বুলি আৰক্ষীয়ে প্ৰকাশ কৰে । তেওঁৰ পৰা চাৰিটা সজীৱ গুলীৰ সৈতে এটা .32 পিষ্টল জব্দ কৰা হয় ।
উল্লেখ্য যে বিগত প্ৰায় এটা বছৰ ধৰি হিংসাত্মক ঘটনাত জৰ্জৰিত হৈ আছে উত্তৰ-পূবৰ ৰাজ্যখন । মূলত মণিপুৰৰ দুটা জনগোষ্ঠীৰ মাজৰ বিবাদ সূত্ৰে সৃষ্টি হোৱা এই হিংসাত্মক ঘটনাত শ শ লোকৰ মৃত্যু হোৱাৰ লগতে ব্যাপক ধ্বংসলীলাৰ সৃষ্টি হৈছে । বৰ্তমান এই হিংসাত্মক ঘটনা কিছু শাম কাটিছে যদিও উত্তেজনা এতিয়াও মাৰ যোৱা নাই ।
