নেশ্যনেল ডেস্ক,২৭ মে': উত্তৰ-পূৱ দিল্লীত কাৰাগাৰৰ পৰা ওলাই অহা এগৰাকী কয়েদীক বিশাল আদৰণি (Grand Welcome to an Inmate)। চাৰি ঘণ্টাৰ বাবে কাৰাগাৰৰ পৰা পেৰোলত মুকলি হৈ অহা কয়েদীক স্থানীয় লোকে জনালে বিশাল আদৰণি । সম্প্ৰতি এটা ভিডিঅ'ই সামাজিক মাধ্যমত খলকনিৰ সৃষ্টি কৰিছে ।
এয়া কোনো বলীউডৰ কাহিনী নহয় । উত্তৰ-পূৱ দিল্লীৰ ঘটনা । ২০২০ চনৰ উত্তৰ-পূব দিল্লীৰ সংঘৰ্ষৰ (North East Delhi Riots) অভিযুক্ত শ্বাহৰুখ পাঠানে শেহতীয়াকৈ তেওঁৰ অসুস্থ পিতৃৰ খবৰ ল'বলৈ পেৰোলত মুকলি হৈ আহিছে । বাসস্থানত উপস্থিত হোৱাৰ লগে লগে শ্বাহৰুখ পাঠানক (North East Delhi Riots accuse Shahrukh Pathan) স্থানীয় লোকসকলে যিধৰণে আদৰণি জনালে সেই দৃশ্য দেখি হতবাক বহু লোক ।
যেন নায়কৰহে আগমন ঘটিছে অঞ্চলটোত । উত্তৰ-পূব দিল্লীৰ সংঘৰ্ষত এগৰাকী আৰক্ষীক বন্দুক দেখুওৱাৰ অভিযোগ আছে শ্বাহৰুখ পাঠানৰ বিৰুদ্ধে । সংঘৰ্ষ আৰু ধৰ্মীয় শত্ৰুতা বৃদ্ধিৰ অভিযোগ উত্থাপন কৰাৰ পিছতে শ্বাহৰুখ পাঠানক আদালতে কাৰাগাৰলৈ প্ৰেৰণ কৰিছিল । বিগত সপ্তাহত শ্বাহৰুখ পাঠানক তেওঁৰ অসুস্থ পিতৃক চাবলৈ মানৱীয় ভিত্তিত তিহাৰ কাৰাগাৰৰ পৰা চাৰি ঘণ্টাৰ পেৰোল প্ৰদান কৰা হৈছিল ।
ইফালে সামাজিক মাধ্যমত ভাইৰেল হোৱা ভিডিঅ'টোত শ শ সমৰ্থক আৰু তেওঁৰ চুবুৰীয়াসকলক তেওঁৰ পিছফালে সমবেত হোৱা দেখা গৈছে । আনহাতে ঘৰলৈ যোৱাৰ সময়ত লোকসকলে তেওঁক অনুসৰণ কৰাৰ লগতে আনন্দ উল্লাস কৰা আৰু হুইচেল বজোৱা দেখা গৈছে । আন এটা ভিডিঅ'ত, আৰক্ষীৰ দলটোৱে তেওঁক কাৰাগাৰলৈ লৈ যোৱাৰ সময়ত পাঠানে উল্লাসিত জনতাৰ ফালে হাত জোকাৰি থকা দেখা গৈছে ।
উল্লেখ্য যে দিল্লীৰ সাম্প্ৰদায়িক সংঘৰ্ষত (North East Delhi Communal clashes) ৫০ জনতকৈও অধিক লোকৰ মৃত্যু হৈছিল আৰু প্ৰায় ৭০০ গৰাকী লোক আহত হৈছিল । ২৩ ফেব্ৰুৱাৰীৰ পৰা ২৫ ফেব্ৰুৱাৰীলৈ এই সংঘৰ্ষ চলিছিল ।
লগতে পঢ়ক :কাৰৱাৰ নৌসেনা ঘাটিত ৰাজনাথ সিঙৰ যোগাসন
