নেশ্যনেল ডেস্ক, 15 অক্টোবৰ: পুনৰ শোকাৱহ দুৰ্ঘটনা সংঘটিত হৈছে মহাৰাষ্ট্ৰত ৷ শৈলনী বাবাৰ দৰ্শনৰ বাবে যোৱা ভক্তৰ এখন বাহন দুৰ্ঘটনাত পতিত হোৱাৰ দুখজনক খবৰ পোহৰলৈ আহিছে । প্ৰাথমিক তথ্য অনুসৰি, এই দুৰ্ঘটনাত এটি চাৰিমহীয়া শিশুকে ধৰি 12 জন লোকৰ মৃত্যু হৈছে । আহত হৈছে প্ৰায় 23 জন লোক ।
সম্ভাজিনগৰৰ বৈজাপুৰ আৰু ঘাটি হাস্পতালত ইতিমধ্যে আহতসকলক ভৰ্তি কৰোৱা হৈছে । বৈজাপুৰৰ সমীপৰ সমৰুদ্ধি এক্সপ্ৰেছৱেৰ জাম্বৰ গাঁৱৰ টোল বুথত সংঘটিত হৈছে এই শোকাৱহ দুৰ্ঘটনাটো । ভক্ত কঢ়িওৱা ট্ৰেভেলাৰখনে ৰৈ থকা এখন ট্ৰাকক খুন্দিওৱাৰ ফলত সংঘটিত হয় এই দুৰ্ঘটনাটো ।
স্থানীয় ৰাইজে জানিবলৈ দিয়া অনুসৰি নিশা প্ৰায় 12.30 বজাত সমৰুদ্ধি এক্সপ্ৰেছৱেৰ আৰ টি অ’ই এখন ট্ৰাক অভাৰটেক কৰি কাষলৈ টানি নিয়াৰ সময়তে পিছফালৰ পৰা অহা এখন ট্ৰেভেলাৰে ট্ৰাকখনত খুন্দা মাৰে । দুৰ্ঘটনাটো ইমানেই ভয়ংকৰ আছিল যে ইয়াৰ শব্দ ওচৰ-পাজৰ গাঁৱৰ লোকসকলে শুনা পাইছিল । প্ৰচণ্ড শব্দটো শুনি স্থানীয় ৰাইজ ঘটনাস্থলীত উপস্থিত হয় আৰু দুৰ্ঘটনাগ্ৰস্ত বাহনৰ পৰা চিঞৰ-বাখৰ আৰু কান্দোনৰ শব্দ শুনিবলৈ পোৱা বুলি জনায় ।
লগে লগে আহতসকলক উদ্ধাৰ কৰি স্থানীয় চিকিৎসালয়ত ভৰ্তি কৰা হয় । ইয়াৰ পূৰ্বেও সমৰুদ্ধি এক্সপ্ৰেছৱেত বাছ দুৰ্ঘটনাত বহু লোকে প্ৰাণ হেৰুৱাইছিল ৷ শেহতীয়া এই দুৰ্ঘটনাটোৱে সম্প্ৰতি বহু প্ৰশ্ন উত্থাপন কৰা পৰিলক্ষিত হৈছে সৰ্বসাধাৰণৰ মনত ।
প্ৰাথমিক তথ্য অনুসৰি বাহনখনৰ ভিতৰত থকা সকলো যাত্ৰী নাছিক জিলাৰ পথাৰ্ডি আৰু ইন্দিৰা নগৰৰ বাসিন্দা বুলি জানিব পৰা হৈছে ৷
লগতে পঢ়ক: Accidents on Samruddhi Expressway : বিগত ছমাহত সমৰুদ্ধি এক্সপ্ৰেছৱেত প্ৰাণ হেৰুৱাইছে 88 জনে
