নেশ্যনেল ডেস্ক, ৩ আগষ্ট : ন-পুৰণি মুঠ ১০টা সন্ত্ৰাসবাদী হ'ব কাশ্মীৰ আৰক্ষীৰ টাৰ্গেট । শেহতীয়াকৈ কাশ্মীৰৰ আৰক্ষীয়ে প্ৰস্তুত কৰিছে ১০ টা দুৰ্ধৰ্ষ সন্ত্ৰাসবাদীৰ নাম সন্নিৱিষ্ট এখন তালিকা । কাশ্মীৰৰ আৰক্ষী মহাপৰিদৰ্শক বিজয় কুমাৰে এই তালিকা প্ৰকাশ কৰিছে । এই তালিকাত আছে সাতটা পুৰণি সন্ত্ৰাসবাদীৰ নাম । কাশ্মীৰ আৰক্ষীয়ে টুইটযোগে প্ৰকাশ কৰা মতে, চেলিম পেৰে, ইউচুফ কান্ট্ৰো, আব্বাছ শ্বেইখ, ৰেয়াজ শ্বেটাৰগুণ্ড, ফাৰুক নালি, জুবেইৰ ৱানী আৰু আশ্ৰাফ মোলভি কেইবা বছৰ ধৰি সন্ত্ৰাসবাদী কাৰ্যকলাপৰে জড়িত হৈ আছে ।
আনহাতে, আন তিনিজন নতুন সন্ত্ৰাসবাদী হৈছে চাকিব মঞ্জুৰ, উমেৰ মুস্তাক খাণ্ডে আৰু ৱাকীল শ্বাহ । শেহতীয়াকৈ জম্মু-কাশ্মীৰৰ আৰক্ষী আৰু নিৰাপত্তা বাহিনীৰ যুটীয়া অভিযানত কেইবাটাও সন্ত্ৰাসবাদী ধৰাশায়ী হৈছিল । আন কেইবাটাও সন্ত্ৰাসবাদী আৰক্ষীয়ে গ্ৰেপ্তাৰ কৰিছিল । আৰক্ষীৰ অভিযানত সময়ে সময়ে বিস্ফোৰক সামগ্ৰী, অস্ত্ৰ-শস্ত্ৰও জব্দ হৈ আহিছে ।
সন্ত্ৰাসবাদৰ ভেঁঁটি সম্পূৰ্ণৰূপে নিৰ্মূল কৰাৰ বাবে বদ্ধপৰিকৰ হৈছে জম্মু-কাশ্মীৰ আৰক্ষী । এতিয়া এই দুৰ্ধৰ্ষ সন্ত্ৰাসবাদীৰ তালিকাখন প্ৰকাশ কৰাৰ পাছত আৰক্ষীয়ে কেনেদৰে অভিযান চলায় সেয়া লক্ষণীয় হ'ব ।
লগতে পঢ়ক:জম্মু-কাশ্মীৰৰ চাম্বাৰ আকাশত উৰিছে ৪ খন সন্দেহজনক ড্ৰোণ
