নেশ্যনেল ডেস্ক, ৫ জুলাই : জলপথেৰে আফগানিস্তানৰ পৰা ভাৰতলৈ নিষিদ্ধ নিচাজাতীয় সামগ্ৰীৰ অবাধ বেহা । মহাৰাষ্ট্ৰৰ ৰায়গড় জিলাৰ জৱাহৰলাল নেহৰু বন্দৰত নিষিদ্ধ হেৰ'ইন জব্দ কৰিলে ৰাজহ চোৰাংচোৱা সঞ্চালকালয়ৰ বিষয়াই । প্ৰায় ৩০০ কেজি হেৰ'ইন(Heroin) জব্দ কৰা হয় । জব্দ কৃত হেৰ'ইনখিনিৰ মূল্য ৮৭৯ কোটি টকা বুলি বিষয়াসকলে জানিবলৈ দিছে ।
হেৰ'ইন জব্দ কৰাৰ বিষয়ে ৰাজহ চোৰাংচোৱা সঞ্চালকালয়ৰ বিষয়াই দেওবাৰে জানিবলৈ দিছে । বৃহস্পতিবাৰে এই নিষিদ্ধ নিচাজাতীয় সামগ্ৰীবোৰ জব্দ কৰা হৈছিল । ৰাজহ চোৰাংচোৱা সঞ্চালকালয়ৰ এগৰাকী বিষয়াই কয় যে, আফগানিস্তানৰ পৰা ইৰাণ হৈ চোৰাংভাৱে এই সামগ্ৰীখিনি ভাৰতলৈ অনা হৈছিল । জিপচাম শিল আৰু টেলকম পাউডাৰ বুলি কৈ নিচাজাতীয় সামগ্ৰী সৰবৰাহ কৰা হৈছিল ।
জব্দকৃত সামগ্ৰীখিনি আফগানিস্তানৰ পৰা পঞ্জাৱলৈ প্ৰেৰণ কৰা হৈছিল । কিন্তু মুম্বাইত সামগ্ৰীখিনি জব্দ হয় । সামগ্ৰী আমদানি-ৰপ্তানি কোড প্ৰভজোৎ সিঙৰ নামত আছিল ।
হেৰ'ইনখিনি জব্দ কৰাৰ পাছতে আৰক্ষীয়ে ড্ৰাগছ ব্যৱসায়ী প্ৰভজোৎ সিঙক আটক কৰে । ৰাজহ চোৰাংচোৱা সঞ্চালকালয়ৰ এগৰাকী বিষয়াই জানিবলৈ দিয়া মতে, অভিযুক্ত প্ৰভজোতে যোৱা বছৰৰ পৰাই জৱাহৰলাল নেহৰু বন্দৰেৰে জিপচাম শিল আৰু টেলকম পাউডাৰৰ নামত নিচাজাতীয় সামগ্ৰী আমদানি কৰি আছিল । বিগত বৰ্ষৰ আগষ্ট মাহত মুম্বাই শুল্ক বিভাগ আৰু ৰাজহ চোৰাংচোৱা সঞ্চালকালয়ে প্ৰায় ১,০০০ কোটি টকাৰ ১৯১ কেজি হেৰ'ইন জব্দ কৰিছিল । আয়ুৰ্বেদিক ঔষধ বুলি কৈ হেৰ'ইনখিনি সৰবৰাহ কৰা হৈছিল ।
প্ৰাণনাশী হেৰ'ইন হৈছে মৰ্ফিনৰ পৰা তৈয়াৰ কৰা এক অত্যাধিক নিচাযুক্ত ঔষধ । ইয়াৰ ৰং বগা অথবা মুগা ৰঙৰ হয় । আনহাতে, ক'লা আঠাযুক্ত পদাৰ্থবিধক ক'লা টাৰ হেৰ'ইন বুলি জনা যায় । বিশুদ্ধ হেৰ'ইনৰ সোৱাদ হৈছে তিতা আৰু দেখাত বগা ৰঙৰ পাউডাৰ সদৃশ আৰু এই ধৰণৰ হেৰ'ইন মূলতঃ দক্ষিণ আমেৰিকাত উৎপন্ন হয় ।
লগতে পঢ়ক: সমগ্ৰ বিশ্বতে ভাৰতৰ সন্মান যথেষ্ট বৃদ্ধি পাইছে: ৰাজনাথ সিং
