নিউজ ডেস্ক, 27 অক্টোবৰ : আঞ্চলিক পৰ্যায়ত নিৰাপত্তা সুনিশ্চিত কৰাৰ লক্ষ্যৰে ভাৰত আৰু আমেৰিকাৰ মাজত অনুষ্ঠিত হ'ব 2+2 আন্তঃমন্ত্ৰী আলোচনা ৷ মঙলবাৰে দুয়োখন দেশৰ মাজত এই সন্দৰ্ভত তৃতীয়লানি আলোচনা অনুষ্ঠিত হ'ব আৰু আলোচনাত সামৰিক দিশত ভূ-স্থানীয় সহযোগিতা বৃদ্ধিৰ বাবে এক চুক্তি স্বাক্ষৰ কৰিব দুয়োখন দেশে ৷
আলোচনাত অংশগ্ৰহণ কৰাৰ বাবে সোমবাৰেই নতুন দিল্লীত আহি উপস্থিত হৈছে আমেৰিকাৰ গৃহ সচিব মাইক পম্পিঅ' আৰু প্ৰতিৰক্ষা সচিব মাৰ্ক ইস্পাৰ ৷ আমেৰিকাৰ দুয়োগৰাকী শীৰ্ষ বিষয়াক ভাৰতৰ বৈদেশিক মন্ত্ৰী এছ জয়শংকৰ আৰু প্ৰতিৰক্ষা মন্ত্ৰী ৰাজনাথ সিঙে আনুষ্ঠানিকভাৱে আদৰণি জনোৱাৰ লগতে দুয়োৰে লগত আলোচনাত মিলিত হয় ৷ এই আলোচনাত আমেৰিকাৰ শীৰ্ষ বিষয়া দুগৰাকীৰ নেতৃত্বত অহা এটা প্ৰতিনিধি দল আৰু ভাৰতীয় প্ৰতিৰক্ষা তথা অন্যান্য মন্ত্ৰালয়ৰ এটা প্ৰতিনিধি দলে অংশগ্ৰহণ কৰিব ৷ মঙলবাৰে অনুষ্ঠিত হ'বলগীয়া আলোচনাৰ পূৰ্বে আমেৰিকাৰ প্ৰতিনিধি দলটোৱে নতুন দিল্লীস্থিত ৰাষ্ট্ৰীয় যুদ্ধ স্মাৰক পৰিদৰ্শন কৰিব ৷
মঙলবাৰে দিনৰ প্ৰায় 10 বজাৰ পৰা এই আলোচনা অনুষ্ঠিত হ'ব ৷ আলোচনাৰ পূৰ্বে প্ৰধানমন্ত্ৰী নৰেন্দ্ৰ মোডীক তেওঁৰ চৰকাৰী বাসভৱনত সাক্ষাৎ কৰিব আমেৰিকাৰ দুয়োগৰাকী শীৰ্ষ সচিবে ৷ ইয়াৰ পিচতেই আমেৰিকাৰ প্ৰতিনিধি দলটো শ্ৰীলংকা, মালদ্বীপ আৰু ইণ্ডোনেচিয়ালৈ ৰাওঁনা হ'ব ৷ সোমবাৰে দুয়োখন দেশৰ প্ৰতিনিধিয়ে এক ভূ-স্থানীয় সহযোগিতা চুক্তিত স্বাক্ষৰ কৰে ৷ এই চুক্তিৰ দ্বাৰা সামৰিক দিশটোক অধিক সামৰি লোৱা হৈছে আৰু ভাৰতৰ ক্ষেপনাস্ত্ৰ প্ৰণালীৰ সংস্কাৰৰ ক্ষেত্ৰত অধিক গুৰুত্বপূৰ্ণ ভূমিকা পালন কৰিব ৷
দুয়োখন দেশৰ মাজত অনুষ্ঠিত হৈ থকা এই বিশেষ 2+2 আন্তঃমন্ত্ৰী আলোচনাৰ মুল বৈশিষ্ট হৈছে আঞ্চলিক সুৰক্ষা সহযোগিতা, প্ৰতিৰক্ষা তথ্য সৰবৰাহ, মিলিটাৰী আন্তঃসহযোগিতা আৰু প্ৰতিৰক্ষা বাণিজ্য ৷
ভাৰতলৈ অহাৰ পূৰ্বে আমেৰিকাৰ গৃহ বিভাগে সদৰী কৰা এক বিজ্ঞপ্তিত এই ভ্ৰমণে দুয়োখন দেশৰ আমোলাতান্ত্ৰিক আৰু নিৰাপত্তাৰ দিশটোৰ লগতে দুয়োখন দেশৰ সেনাৰ মাজৰ সহযোগিতা বৃদ্ধিৰ বাবে কাম কৰিব বুলি জনাইছিল ৷ ভাৰত আৰু আমেৰিকা সামৰিক উদ্যোগিক সহযোগিতাৰ এক বৃহৎ অংশীদাৰ ৷ ভাৰত-আমেৰিকা প্ৰতিৰক্ষা প্ৰযুক্তি আৰু বাণিজ্য নীতিৰ দ্বাৰা দুয়োখন দেশেই সামৰিক খণ্ডত সহ-উৎপাদন আৰু সহ-উন্নয়নত অধিক গুৰুত্ব প্ৰদান কৰি আহিছে ৷ আমেৰিকাৰ পিচতেই ভাৰতেই হৈছে একমাত্ৰ দেশ যিয়ে C-17 আৰু P-8 বিমানৰ সু-বৃহৎ ফ্লীট মোতায়েন কৰি ৰাখিছে আৰু 2020ৰ শেষলৈ আমেৰিকাৰ পৰা ভাৰতে ক্ৰয় কৰিব 20 বিলিয়ন ডলাৰৰো অধিক মূল্যৰ সামৰিক প্ৰযুক্তিগত সামগ্ৰী ৷
সোমবাৰে দুয়োপক্ষৰ মাজত হোৱা আলোচনাত দুয়োখন দেশৰ প্ৰতিনিধিয়ে মিলিটাৰী-মিলিটাৰী সহযোগিতা, সুৰক্ষিত যোগাযোগ প্ৰণালী আৰু তথ্য আদান-প্ৰদান, সামৰিক বাণিজ্য আৰু উদ্যোগিক বিষয়সমূহৰ ওপৰত আলোকপাত কৰিছিল ৷ এই আলোচনাৰ পিচতেই ভাৰতীয় প্ৰতিৰক্ষা মন্ত্ৰালয়ে দুয়োপক্ষৰ মাজত জিঅ'-স্পাটিয়েল কৰ্পৰেশ্বনৰ বুনিয়াদী বিনিময় আৰু সহযোগী গাঁথনিগত চুক্তিত স্বাক্ষৰ কৰাৰ বিষয়ে জনাইছিল ৷
ইয়াৰ উপৰিও বৈদেশিক মন্ত্ৰী জয়শংকৰ আৰু আমেৰিকাৰ গৃহ সচিব পম্পিঅ'ৰ মাজত পৃথকে এক আলোচনা অনুষ্ঠিত হৈছিল য'ত দুয়োখন দেশৰ লগতে ইণ্ডো-পেচিফিকৰ লগতে বিশ্বৰ সুৰক্ষা আৰু সম্বৃদ্ধিৰ প্ৰতি ভাবুকিস্বৰূপ দিশসমূহৰ ওপৰত বাৰ্তালাপ অনুষ্ঠিত হৈছিল ৷ এই আলোচনাৰ পিচতেই পম্পিঅ'ৱে টুইট কৰি দুয়োখন দেশে কোভিড-19ৰ প্ৰতিষেধক তৈয়াৰৰ লগতে আঞ্চলিক সুৰক্ষা বিষয়সমূহৰ প্ৰতি গুৰুত্ব আৰু সহযোগিতা বৃদ্ধি আৰু অৰ্থনৈতিক উন্নতিৰ বিষয়ে জনায় ৷
উল্লেখ্য যে, 2017ৰ জুনত প্ৰধানমন্ত্ৰী নৰেন্দ্ৰ মোডীৰ আমেৰিকা ভ্ৰমণৰ পিচতেই দুয়োখন দেশৰ মাজৰ আলোচনাৰ এক নতুন সংস্কৰণ প্ৰস্তুত কৰা হয় ৷ ইয়াৰ পিচতেই 2+2 স্তৰত প্ৰথমলানি আন্তঃমন্ত্ৰী আলোচনা 2018ৰ জানুৱাৰী মাহত নতুন দিল্লীত আৰু দ্বিতীয়লানি আলোচনা 2019ত ৱাশ্বিংটনত অনুষ্ঠিত হৈছিল ৷
লগতে পঢ়ক : ভাৰত-আমেৰিকাৰ মাজত প্ৰতিৰক্ষা মন্ত্ৰীস্তৰীয় আলোচনা
