নেশনেল ডেস্ক, 7 ফেব্ৰুৱাৰীঃ 70 খন আসনৰ বাবে শনিবাৰে অনুষ্ঠিত হ'ব দিল্লী বিধানসভাৰ নিৰ্বাচন ৷ নিৰ্বাচনৰ বাবে ইতিমধ্যে সম্পূৰ্ণ হৈ উঠিছে প্ৰস্তুতি ৷ মুঠ 13,751 কেন্দ্ৰত অনুষ্ঠিত হ'ব ভোটগ্ৰহণ প্ৰক্ৰিয়া ৷ প্ৰায় 1 কোটি 46 লাখ জনতাই নিৰ্ণয় কৰিব 668 গৰাকী প্ৰাৰ্থীৰ ভাগ্য ৷ নিৰ্বাচনৰ বাবে নিয়োজিত কৰা হৈছে মুঠ 90 হাজাৰ কৰ্মচাৰী ৷ আম আদমী পাৰ্টী আৰু বিজেপিৰ মাজত মূল নিৰ্বাচনী যুজ হোৱাৰ সম্ভাৱনা ব্যক্ত কৰিছে বিভিন্নজনে ৷
70 খন আসনৰ বাবে অনুষ্ঠিত হ'বলগীয়া নিৰ্বাচনত 67 খন আসনত বিজেপিয়ে, 64 খন আসনত কংগ্ৰেছে, জনতা দল ইউনাইটেডে 2 খন, 1খন আসনৰ বাবে জনচুক্তি পাৰ্টীয়ে, ৰাষ্ট্ৰীয় জনতা দলে 4 খন আসনত আৰু আটাইকেইখন আসনৰ বাবে আম আদমি পাৰ্টী আৰু বহুজন সমাজ পাৰ্টীয়ে আগবঢ়াৱ প্ৰতিদ্বন্দিতা ৷
ইফালে, নিৰ্বাচনৰ বাবে সাজু হৈ উঠিছে দিল্লী প্ৰশাসন ৷ সমান্তৰালভাৱে প্ৰতিটো ভোটকেন্দ্ৰত ভোটদাতাৰ বাবে পানী, শৌচালয় আদিৰ লগতে শিশুসকলৰ বাবে ব্যৱস্থা কৰা হৈছে ৷ 80 বছৰৰ উৰ্ধৰ লোকৰ বাবে পোষ্টেল বেলথৰ সুবিধা প্ৰদান কৰা হৈছে ৷ লগতে, ভোটাৰসকলে 1950 হেল্পলাইন নম্বৰত কল কৰি ল'ব পাৰিব যিকোনো ধৰণৰ নিৰ্বাচন সম্বন্ধীয় তথ্য ৷
