বঙাইগাঁও, 21 মার্চ : বঙাইগাঁৱৰ কিশোৰীৰ মৃত্যুৰ ঘটনাৰ প্ৰতিবাদত বুধবাৰে একাংশ সংগঠন আৰু ৰাইজে এক প্ৰতিবাদী সমদল বাহিৰ কৰে ৷ ধাৰাষাৰ বৰষুণকো নেওচি বঙাইগাঁও চহৰৰ ৰোলিং মিলৰ সন্মুখৰ পৰা পাগলাস্থানৰ জিলা আৰক্ষী অধীক্ষকৰ কাৰ্যালয়লৈ উলিওৱা এই প্ৰতিবাদী সমদলৰ ফলত এটা সময়ত অনিয়ন্ত্ৰিত হৈ পৰে পৰিস্থিতি ৷
একাংশ প্ৰতিবাদকাৰীয়ে আৰক্ষী অধীক্ষকৰ কাৰ্যালয় চৌহদত প্ৰৱেশ কৰিবলৈ চেষ্টা চলোৱাত আৰক্ষী আৰু প্ৰতিবাদকাৰীৰ মাজত এক উত্তপ্ত পৰিৱেশৰ সৃষ্টি হয় ৷ অৱশ্যে পৰৱৰ্তী সময়ত আৰক্ষীয়ে পৰিস্থিতি নিয়ন্ত্ৰণ কৰিবলৈ সক্ষম হয় ৷
উল্লেখ্য যে, বুধবাৰে ৰোলিং মিলৰ সন্মুখৰ পৰা আৰম্ভ কৰা প্ৰতিবাদী সমদলত অংশগ্ৰহণ কৰাসকলে গোটেই পথছোৱা কিশোৰীগৰাকীৰ মৃত্যুৰ ঘটনাৰ ন্যায়ৰ দাবী তোলাৰ লগতে বিভিন্ন শ্ল’গান দি পৰিৱেশ উত্তাল কৰি তোলে ৷ সমদলকাৰীসকলক আৰক্ষীয়ে আদবাটতে বাধা প্ৰদান কৰি ৰখাবলৈ চেষ্টা কৰে যদিও আৰক্ষীৰ বাধা নেওচি মূল ৰাজপথেৰে পাগলাস্থানস্থিত জিলা আৰক্ষী অধীক্ষকৰ কাৰ্যালয়লৈ অগ্ৰসৰ হয় ৷
ইয়াৰ মাজতে একাংশ প্ৰতিবাদকাৰীয়ে টেম্প এখনক আক্ৰমণ কৰিবলৈ উদ্যোত হয় যদিও আৰক্ষী আৰু একাংশ প্ৰতিবাদকাৰীয়ে কোনো মতে পৰিস্থিতি নিয়ন্ত্ৰণ কৰে ৷ এটা সময়ত এই প্ৰতিবাদী সমদল পাগলাস্থানৰ জিলা আৰক্ষী অধীক্ষকৰ কাৰ্যালয়ৰ সন্মুখত উপস্থিত হয় আৰু প্ৰতিবাদ সাব্যস্ত কৰে ৷
- " class="align-text-top noRightClick twitterSection" data="">
কিন্তু আৰক্ষীয়ে প্ৰতিবাদকাৰীসকলক বুজনি দিয়াৰ চেষ্টা চলায়ো ব্যৰ্থ হয় ৷ আৰক্ষী আৰু অৰ্ধ সামৰিক বাহিনীৰ জোৱানৰ বাধাত প্ৰতিবাদকাৰীসকলে কাৰ্যালয় চৌহদত প্ৰৱেশ কৰিবলৈ সক্ষম নোহোৱাত প্ৰতিবাদকাৰীসকলে ৰাজপথ অৱৰোধ কৰে ৷ প্ৰতিবাদকাৰীসকলৰ এনে কাৰ্যত ক্ষুন্ন হৈ পৰে জিলাৰ উপ আৰক্ষী অধীক্ষকগৰাকী ৷
তেওঁ প্ৰতিবাদকাৰীসকলক ৰাজপথ মুকলি কৰি দিবলৈ নিৰ্দেশ দিয়ে ৷ পাচত প্ৰতিবাদস্থলীত দুগৰাকীকৈ কাৰ্যবাহী দণ্ডাধীশ উপস্থিত হৈ প্ৰতিবাদকাৰীসকলক বুজনি দি পৰিস্থিতি নিয়ন্ত্ৰণৰ বাবে চেষ্টা চলায় ৷ ইয়াৰ পাচত মৃত কিশোৰীগৰাকীৰ পৰিয়ালৰ লোকৰ লগতে প্ৰতিবাদী কাৰ্যসূচীৰ আগভাগ লোৱা কেইবাজনো প্ৰতিনিধিৰ সৈতে জিলাৰ আৰক্ষী অধীক্ষকে আলোচনাত মিলিত হয় ৷
লগতে আৰক্ষীয়ে সঠিকভাৱে তদন্ত প্ৰক্ৰিয়া আগুৱাই নিয়া হ’ব বুলি প্ৰতিবাদকাৰীসকলক অৱগত কৰে ৷ ফৰেনচিক পৰীক্ষাৰ প্ৰতিবেদন লাভ কৰাৰ পাচত বাকী তদন্ত প্ৰক্ৰিয়া সেই মতে আগবঢ়াই নি আইনী ব্যৱস্থা গ্ৰহণ কৰিব বুলি আশ্বাস প্ৰদান কৰে আৰক্ষীয়ে ৷ ইয়াৰ পাচতহে প্ৰতিবাদকাৰীসকলে প্ৰতিবাদী কাৰ্যসূচীৰ সামৰণী মাৰে ৷
উল্লেখ্য যে, যোৱা 5 মার্চৰ সন্ধিয়া নিৰুদ্দেশ হোৱা এগৰাকী কিশোৰীৰ 8 মার্চত উদ্ধাৰ হৈছিল মৃতদেহ ৷ মৃতদেহ উদ্ধাৰ হোৱাৰ পিচত ৰাইজে সাব্যস্ত কৰিছিল প্ৰতিবাদ । ৰাইজে আৰক্ষী-প্ৰশাসনক ঘটনাৰ তদন্ত কৰিবলৈ 7 দিনৰ সময় সীমা বান্ধি দিছিল ৷
কিন্তু ইতিমধ্যে সেই সময়সীমা উকলি গৈছে যদিও তদন্ত প্ৰক্ৰিয়া সমাপ্ত হোৱা নাই ৷ ফলত কিশোৰীগৰাকীৰ মৃত্যুৰ ঘটনাৰ ন্যায় প্ৰদানৰ লগতে দোষীৰ বিৰুদ্ধে বিহিত শাস্তি প্ৰদানৰ ক্ষেত্ৰত বিলম্ব হোৱাত এইদৰে প্ৰতিবাদী কাৰ্যসূচী গ্ৰহণ কৰে ৷
লগতে পঢ়ক : বঙাইগাঁৱৰ ডাংতলত কিশোৰীৰ মৃতদেহ উদ্ধাৰক লৈ চাঞ্চল্য
