মৰাণ, 17 মে’ : বৰ্তমান সময়ত কৰ্মসংস্থাপন বিচাৰি অসমৰ পৰা বহিঃৰাজ্যলৈ অহা ব্যক্তি নিৰুদ্দিষ্ট হোৱা অথবা মৃত্যুৰ হোৱাৰ ঘটনা যথেষ্ট বৃদ্ধি হ’বলৈ ধৰিছে ৷ আজিকালি প্ৰতিদিনেই এনেধৰণৰ বাতৰিয়ে সংবাদমাধ্য়মৰ শিৰোনাম দখল কৰিবলৈ লৈছে ৷ বহুতো লোকে কামৰ তাগিদাত নিজা ঘৰখন এৰি গুচি যায় যদিও উভতি আহিবলৈ সক্ষম নহয় ৷ এনেবোৰ খবৰে অসমৰ ৰাইজক ব্যৰ্থিত কৰা সময়তে এইবাৰ পুনৰ বহিঃৰাজ্যত সন্ধানহীন হৈছে নামৰূপৰ এজন ব্যক্তি ।
কামৰ সন্ধানত নামৰূপৰ ৰাঙলীৰ পৰা কেৰালালৈ গৈ থকা অৱস্থাত ৰে’লৰ পৰা সন্ধানহীন হয় শিৱ দুৱৰা (নালিয়া) নামৰ ব্যক্তিজন । পৰিয়ালৰ লোকে জনোৱা অনুসৰি, শনিবাৰে অৰ্থাৎ 11 মে’ৰ নিশা ডিব্ৰুগড়ৰ বাণীপুৰ ষ্টেশ্যনৰ পৰা যাত্ৰা আৰম্ভ কৰা শিৱ দুৱৰাই ৷ তাৰ পিচৰে পৰা সোমবাৰৰ পুৱা পৰ্যন্ত পৰিয়ালৰ লগত যোগাযোগত আছিল শিৱ ।
লগতে পঢ়ক: কেৰালাত ৰহস্য়জনকভাৱে মৃত্য়ু কলিয়াবৰৰ যুৱকৰ - Kaliabor Youth Death In Kerala
কিন্তু তাৰ পিচতে তেওঁৰ লগত যোৱা সতীৰ্থই জনোৱা অনুসৰি বিজয়নগৰ জংচনত চাহ খাবলৈ নামিছিল শিৱ ৷ কিন্তু তাৰ পিচৰ পৰা ৰে’লত নুঠিল শিৱ ৷ লগৰ কেইজনে বিচাৰ খোচাৰ কৰে যদিও শিৱৰ কোনো খা-খবৰ লাভ নকৰে ৷
পৰিয়ালৰ লোকক এই খবৰ জনোৱাৰ পিচতে পৰিয়ালৰ লোকে আৰক্ষীৰ ওচৰ চাপে আৰু সমগ্ৰ ঘটনা সন্দৰ্ভত এখন এজাহাৰ দাখিল কৰিছে ৷ তাৰ পিচৰ পৰাই আজি 6 দিন পৰ্যন্ত কোনো খবৰ নাই শিৱৰ ৷ সন্ধানহীন শিৱৰ পৰিয়াল এতিয়া শোকত ভাগি পৰিছে । শিৱৰ পৰিয়ালৰ লোকে সংবাদমাধ্যমকৰ যোগেৰে স্থানীয় বিধায়ক তৰংগ গগৈ আৰু মুখ্যমন্ত্ৰী হিমন্ত বিশ্ব শৰ্মাক এইক্ষেত্ৰত সহায়ৰ বাবে আহ্বান জনাইছে ৷ লগতে শিৱক কৰবাত দেখিলে ততালিকে খবৰ দিবলৈ আহ্বান জনায় ৷
লগতে পঢ়ক: পেটৰ তাগিদাত বহিঃৰাজ্যলৈ গৈ পুনৰ সন্ধানহীন অসমৰ যুৱক - Assam youth missing
