গুৱাহাটী, ২৬ মে': বিগত কেইবাদিনো ধৰি বলি থকা গ্ৰীষ্ম প্ৰবাহে দেশৰ আন বহু ৰাজ্যৰ লগতে অসমতো স্বাভাবিক জনজীৱন ব্যাহত কৰি তোলা পৰিলক্ষিত হৈছে । ইফালে এই তীব্ৰ গৰমত ৰে'লযাত্ৰীৰ স্বাস্থ্যজনিত দিশটোৰ প্ৰতি লক্ষ্য ৰাখি উত্তৰ-পূৱ সীমান্ত ৰে'লৱে কৰ্তৃপক্ষই অধিক যাত্ৰী সমাগম হোৱা কেবাটাও ৰে'লৱে ষ্টেচন আৰু চলন্ত ৰে'লত ৰে'লযাত্ৰাৰ সময়ত যাত্ৰীসকলক বিশুদ্ধ খোৱাপানী যোগানৰ বাবে বিশেষ তৎপৰতা আৰম্ভ কৰিছে ।
উত্তৰ-পূৱ সীমান্ত ৰে'লৱেৰ মুখ্য জনসম্পৰ্কৰক্ষী বিষয়া সব্যসাচী দে'- এ জানিবলৈ দিয়া মতে কেইবাটাও ৰে'ল ষ্টেচন চৌহদত আৰু অনব'ৰ্ড ৰে'লত বিশুদ্ধ খোৱা পানী যোগান ধৰাৰ বাবে প্ৰচেষ্টা তীব্ৰতৰ কৰি তুলিছে । কেইবাটাও মুখ্য ৰে'ল ষ্টেচনত ৱাটাৰ ভেণ্ডিং মেচিন (ডব্লিউভিএম), ৱাটাৰ কুলাৰ আৰু ৱাটাৰ টেপৰ উপলব্ধতা নিশ্চিত কৰিছে । তদুপৰি, মনোনীত ষ্টেচনসমূহত নিয়মীয়া ব্যৱধানত বা প্রযোজন অনুসৰি কুইক ৱাটাৰিং চিষ্টেম পদ্ধতি ব্যৱহাৰ কৰি সকলো দীর্ঘ দূৰত্বৰ ৰে'লত পানী পুনৰ ভৰোৱা কাৰ্য নিশ্চিতকৰণ কৰা হৈছে ।
কেইবাটাও মুখ্য ষ্টেচনৰ প্লেটফর্মত ১০০টা তকৈ অধিক ৱাটাৰ ভেন্ডিং মেচিনৰ সেৱা আগবঢ়াই আছে । কাটিহাৰ জংচন, নিউ জলপাইগুৰি, ৰায়গঞ্জ, ছামসী, নিউ কোচবিহাৰ, কোকৰাঝাৰ, হাচিমাৰা ষ্টেচনত স্থাপন কৰা ৱাটাৰ ভেণ্ডিং মেচিনসমূহে বটলত আৰু বহনযোগ্য পাত্ৰত ভৰোৱাৰ বাবে বিশুদ্ধ আৰু স্বাস্থ্যসম্মত পানী প্ৰদান কৰে । এই মেচিনসমূহৰ জৰিয়তে যাত্রীসকলে উচিত মূল্যত খোৱাপানী ক্ৰয় কৰিব পাৰিব ।
এই সুবিধাটো ২৪ ঘণ্টাই ষ্টেচনত উপলব্ধ থাকিব । যাত্রীসকলে ৰিফিলিঙৰ বাবে মাত্র ৫ টকা আৰু এক লিটাৰৰ কঢ়িয়াই নিব পৰা কণ্টেইনাৰ বটলৰ বাবে ৮ টকাত পৰিষ্কাৰ আৰু বিশুদ্ধ খোৱাপানী লাভ কৰিব । একেদৰে, ৫ লিটাৰ পানীৰ ক্ষমতাসম্পন্ন বটলসমূহৰ ৰিফিলৰ বাবে ২০ টকা আৰু কঢ়িয়াই নিয়া পাত্রসহ পানীৰ ব্যয় মাত্ৰ ২৫ টকা আদায় দিব লাগিব ।
ষ্টেচন আৰু ৰে'লত যাত্রীসকলক খোৱাপানী যোগান ধৰাৰ এই সমন্বিত প্রচেষ্টাই হাইড্ৰেচন বৃদ্ধি কৰাৰ উপৰিও যাত্ৰীসকলৰ বাবে সামগ্রিক ভ্ৰমণৰ অভিজ্ঞতা বৃদ্ধি কৰিব । উত্তৰ-পূৱ সীমান্ত ৰে'লৱেয়ে প্রতিকূল বতৰৰ পৰিস্থিতিতো সদায়ে যাত্ৰীৰ কল্যাণ আৰু আৰামক অগ্ৰাধিকাৰ দিয়াৰ ক্ষেত্ৰত কাম কৰি আহিছে বুলি জনসম্পৰ্কৰক্ষী বিষয়াজনে সদৰী কৰে ।
