কলিয়াবৰ, 26 মে’: মে’ মাহৰ মাজভাগৰ পৰা উৎকট গৰমে দহিছে সমগ্ৰ ৰাজ্য ৷ দৈনিক উৰ্ধমুখী হৈছে পাৰাস্তম্ভ ৷ ঘৰৰ বাহিৰে-ভিতৰে অগ্নিকুণ্ড সদৃশ পৰিস্থিতি !
অৱশ্যে এনে প্ৰখৰ ৰ’দতো নিজৰ দায়িত্ব পালন কৰিবলগীয়া হৈছে অসম আৰক্ষীয়ে ৷ প্ৰচণ্ড গৰমলৈ লক্ষ্য ৰাখি পথত কৰ্তব্য পালন কৰা আৰক্ষীসকলক পানী যোগানেৰে সহায় কৰিবলৈ আহ্বান জনাইছিল অসমৰ আৰক্ষী সঞ্চালক প্ৰধান জি পি সিঙে । অসম আৰক্ষীৰ সঞ্চালক প্ৰধানগৰাকীৰ আহ্বানৰ প্ৰতি সঁহাৰি জনাই প্ৰখৰ ৰ’দত কৰ্তব্য পালন কৰা আৰক্ষীক শীতল পানীয়ৰ যোগান ধৰিলে কলিয়াবৰৰ সৰ্বসাধাৰণ লোকে ।
উল্লেখ্য যে, 38 ডিগ্ৰী তাপমাত্ৰাত কলিয়াবৰৰ জখলাবন্ধাত প্ৰখৰ ৰ’দত কৰ্তব্য পালন কৰা আৰক্ষীক পানী যোগান ধৰে স্থানীয় লোকে । প্ৰচণ্ড গৰমৰ বাবে এটুপি শীতল পানীয়ৰ বাবে আতুৰ হৈ থকা আৰক্ষীসকলক শীতল পানীয়ৰ বটল প্ৰদান কৰাত যথেষ্ট সকাহ লাভ কৰিছে বুলি অনুভৱ প্ৰকাশ কৰে আৰক্ষীয়ে । এই কাৰ্যৰ দ্বাৰা সৰ্বসাধাৰণ লোকৰ আৰক্ষীৰ প্ৰতি থকা দায়ৱদ্ধতা তথা আৰক্ষীৰ প্ৰতি থকা সন্মানে পুনৰবাৰ প্ৰমাণ কৰিলে ।
উল্লেখ্য যে, প্ৰখৰ ৰ'দ তথা উৎকট গৰমে দহিছে ৰাজ্য ৷ মহানগৰীৰ পাৰাস্তম্ভ 38 ডিগ্ৰীৰ পৰা ইতিমধ্যে 40 ডিগ্ৰী চেলছিয়াচ স্পৰ্শ কৰিছেগৈ ৷ গৰমৰ পৰা পৰিত্ৰাণ পাবলৈ এতিয়া বহুলোকে গছৰ তল, শীতল পানীয়, ফলৰ ৰসৰ আশ্ৰয় লৈছে যদিও সাৰিব পৰা নাই গ্ৰীষ্ম দাহনৰ পৰা ৷
গৰমৰ প্ৰকোপ তথা প্ৰখৰ ৰ'দৰ বাবে এতিয়া ঘৰৰ পৰা ওলাবলৈ বহুবাৰ চিন্তা কৰিবলগীয়া হৈছে সৰ্বসাধাৰণ লোক ৷ গৰমৰ এই মাত্ৰা যদিহে অব্যাহত থাকে তেন্তে স্বাভাৱিক জীৱনযাত্ৰা অধিক ব্যাহত হৈ পৰাৰ আশংকা প্ৰকাশ কৰিছে সকলোৱে ৷
লগতে পঢ়ক: উৰ্ধমুখী পাৰাস্তম্ভ : লখিমপুৰত বছৰৰ সৰ্বোচ্চ তাপমান ৰেকৰ্ড - HEAT WAVE GRIPS Assam
