গুৱাহাটী, 17 মে’ : আজি সাংবাদিক তথা বিশিষ্ট মানৱ অধিকাৰ কৰ্মী পৰাগ কুমাৰ দাসৰ 29 সংখ্যক মৃত্যু দিৱস । আপোচবিহীন সাংবাদিকগৰাকীক স্মৰণ কৰাৰ উদ্দেশ্যে আজি ৰাজ্যৰ বিভিন্ন স্থানত বহু দল-সংগঠন তথা ব্যক্তি বিশেষে শ্রদ্ধাঞ্জলি অনুষ্ঠানৰ আয়োজন কৰিছে । একেদৰে মহানগৰীৰ ৰাজগড়ৰ যিডোখৰ স্থানত নিষ্ঠুৰ ঘাতকে নির্দয়ভাৱে সাংবাদিকগৰাকীক হত্যা কৰিছিল, সেই স্থানতে স্থাপন কৰা পৰাগ কুমাৰ দাসৰ প্রতিমূর্তিৰ সমুখত শুকুৰবাৰৰ পুৱাই শ্রদ্ধাঞ্জলি জনায় পৰিয়ালৰ লোকসকলৰ লগতে গুণমুগ্ধই ।
মানৱ অধিকাৰ সংগ্ৰাম সমিতিয়েও সাংবাদিকগৰাকীৰ প্ৰতি শ্রদ্ধাঞ্জলি জ্ঞাপন কৰে । বৰ্ষীয়ান সাংবাদিক হাইদৰ হুছেইন, সাংবাদিক তথা ৰাজ্যসভাৰ সাংসদ অজিত ভূঞা, সাংবাদিক প্ৰকাশ মহন্ত, লাচিত বৰদলৈ আদি ব্যক্তিৰ লগতে প্ৰয়াত দাসৰ পত্নীৰ লগতে পৰিয়ালবৰ্গো উক্ত অনুষ্ঠানত উপস্থিত থাকি শ্ৰদ্ধাঞ্জলি জ্ঞাপন কৰে ।
উল্লেখযোগ্য যে মানৱ অধিকাৰ সংগ্ৰাম সমিতিয়ে (মাছ) প্রতিবছৰৰ দৰে এইবাৰো আজিৰ দিনটো ছহিদ দিৱস হিচাপে পালন কৰিব । প্রতিবছৰৰ দৰে এইবাৰো নির্ভীক-সাহসী সাংবাদিকগৰাকীৰ মৃত্যু দিৱসটিত পৰাগ কুমাৰ দাস সতীর্থ মঞ্চই গুৱাহাটী প্ৰেছ ক্লাবত প্রদান কৰিব 'পৰাগ কুমাৰ দাস সাংবাদিকতা বঁটা' । দিনৰ 1 বজাৰ পৰা অনুষ্ঠিত হ'বলগীয়া এই গাম্ভীর্যপূর্ণ অনুষ্ঠানত বিশিষ্ট বুদ্ধিজীৱী, সমালোচক ড৹ হীৰেন গোহাঁইক চলিত বৰ্ষৰ বাবে মঞ্চই এই বঁটা প্রদান কৰিব ।
যশস্বী শিল্পী কুলদা কুমাৰ ভট্টাচার্যই আনুষ্ঠানিকভাবে চিন্তানায়ক ড৹ হীৰেন গোহাঁইৰ হাতত এই বঁটা তুলি দিব । দুৰ্ভাগ্যজনক বিষয় যে, 1996 চনৰ 17 মে'ত ঘাতকৰ গুলীত গুৱাহাটীৰ মাজমজিয়াত প্রাণ হেৰুওৱা নির্ভীক-সাহসী সাংবাদিকগৰাকীৰ হত্যাকাৰী আজিও চিনাক্ত নহ’ল ।
লগতে পঢ়ক: Death anniversary of Parag Kumar Das: ২৭ সংখ্যক মৃত্যু তিথিত পৰাগ দাসক স্মৰণ যোৰহাটবাসীৰ
