বৰপেটা,২২ ফেব্ৰুৱাৰী: সুদখোৰৰ বিৰুদ্ধে কঠোৰ মুখ্যমন্ত্ৰী ড৹ হিমন্ত বিশ্ব শৰ্মা ৷ মুখ্যমন্ত্ৰীৰ নিৰ্দেশমৰ্মে বৰপেটাতো সুদখোৰৰ বিৰুদ্ধে আৰক্ষীয়ে আৰম্ভ কৰিছে অভিযান ৷ মঙলবাৰে নিশা বৰপেটা, সৰভোগ, হাউলী আৰু বৰপেটাৰোড আৰক্ষীৰ অভিযানত আটক ১২ টাকৈ সুদখোৰ ৷ আৰক্ষী সূত্ৰই জনোৱা মতে, সৰভোগ আৰক্ষীয়ে আটক কৰে দুটা সুদখোৰক ৷ ধৃত সুদখোৰ দুটা নাচিবুৰ ৰহমান আৰু বচিৰ আলী ৷
একেদৰে বৰপেটাৰোড আৰক্ষীয়ে মঙলবাৰে নিশা অভিযান চলাই উত্তম সাহা আৰু নচেৰ দেৱান নামৰ আন দুই সুদখোৰক আটক কৰে ৷ ইপিনে হাউলী আৰক্ষীয়েও সুদখোৰৰ বিৰুদ্ধে অভিযান চলাই ছফিকুল ইছলাম, চাদেক আলী আৰু আব্দুল খালেক নামৰ তিনি সুদখোৰক আটক কৰে ৷ একেদৰে বৰপেটা সদৰ থানাৰ আৰক্ষীয়ে অভিযান চলাই বিতুলাল পাঠক, কিৰণ পাঠক, যতীন্দ্ৰ নাথ তালুকদাৰ, ছহিদুল ইছলাম আৰু ছাহজাহান আলী নামৰ পাঁচ সুদখোৰক আটক কৰে ৷
লক্ষ্যণীয়ভাৱে মঙলবাৰে নিশাই বৰপেটা, হাউলী, সৰভোগ আৰু বৰপেটাৰোড আৰক্ষীয়ে অভিযান চলাই ১২ টাকৈ সূদখোৰক আটক কৰে যদিও বুধবাৰৰ নিশাহে আৰক্ষীয়ে সাংবাদিকক আটকাধীন সুদখোৰ কেইটাৰ তথ্য প্ৰদান কৰে ৷ অৱশ্যে কি কাৰণত সুদখোৰ কেইটাৰ তথ্য প্ৰদানৰ ক্ষেত্ৰত আৰক্ষীয়ে ইমান বিলম্ব কৰিলে সেয়া ৰহস্যৰ আৱৰ্তত সোমাই পৰিছে ৷
ইপিনে ডাঙৰ ডাঙৰ সূদখোৰসকলক বিচাৰি উলিওৱাৰ পৰিৱৰ্তে দুই এক সৰু-সুৰা সুদখোৰক আটক কৰাতে অভিযান সীমাৱদ্ধ নাৰাখিবলৈ আৰক্ষীৰ প্ৰতি আহ্বান জনাইছে ৰাইজে ৷ দুখীয়া বা বিপদগ্রস্ত পৰিয়ালৰ তেজ শুহি খোৱা এনে অবৈধ সুদখোৰ চক্রটোক জিলাখনৰ পৰা পুলিয়ে পোখাই উভালি পেলাবলৈ ৰাইজে আৰক্ষীক আহ্বান জনাইছে ।
লগতে পঢ়ক: লখিমপুৰত আৰক্ষীৰ জালত ২৬ সুদখোৰ
